احسن اقبال نے شاہ محمود کی تقریر کو وزارت عظمیٰ کیلئے انٹرویو قرار دے دیا

اسلام آباد: (ویب ڈیسک) ن لیگ کے رہنما احسن اقبال نے وزیر خارجہ شاہ محمود قریشی کی قومی اسمبلی میں تقریر کو وزارت عظمیٰ کیلئے انٹرویو قرار دے دیا۔
احسن اقبال نے کہا کہ شاہ محمود قریشی نے خود کو عمران خان کے متبادل کے طور پر پیش کیا، اپنا کام کرنے کے بجائے شاہ محمود ہر کسی کے کام میں ٹانگ اڑا رہے ہیں اسی لیے وزارت خارجہ کا یہ حال ہے۔
خیال رہے کہ وزیر خارجہ شاہ محمود قریشی نے قومی اسمبلی میں اظہار خیال کرتے ہوئے مہنگائی کو حکومت کے لیے چیلنج قرار دیا ہے۔
قومی اسمبلی میں اظہارِ خیال کرتے ہوئے شاہ محمود قریشی نے کہا کہ ہم نےگزشتہ سالوں میں مشکل فیصلے کیے اور کڑوی گولی کھائی لیکن اب ہم استحکام سے ریکوری کی جانب بڑھ رہے ہیں، یہ میں یا آپ نہیں، ورلڈ بینک کہہ رہا ہے۔
ان کا کہنا تھا کہ اپوزیشن ہمارا چیلنج نہیں، مہنگائی ہے، اپوزیشن درست کہتی ہے کہ کھاد کی قیمت بڑھی ہے، بالکل بڑھی ہے ، دیکھنا ہوگا کہ کیوں کھاد کی قیمت بڑھی ہے، پاکستان میں دیگر ممالک کے مقابلے میں کسان کو سستی کھاد مل رہی ہے۔