راولپنڈی: (ویب ڈیسک) آرمی چیف جنرل قمر جاوید باجوہ نے کہا ہے کہ عوام کا تحفظ اور فلاح سب سے پہلے ہے۔ جب تک سیلاب سے متاثرہ افراد کی بحالی تک چین سے نہیں بیٹھیں گے۔
پاک فوج کے شعبہ تعلقات عامہ ( آئی ایس پی آر ) کی طرف سے جاری کردہ بیان کے مطابق سپہ سالار نے بلوچستان کے سیلاب سے متاثرہ علاقوں کا دورہ کیا، دورے کے دوران گوٹھ صدوری، لاکھڑا، لسبیلہ میں قائم فلڈ ریلیف اور میڈیکل کیمپ گئے اور سیلاب سے متاثرہ لوگوں کی خیریت دریافت کی۔
بیان کے مطابق جنرل قمر جاوید باجوہ نے امدادی کارروائیوں میں مصروف فوجیوں سے بھی ملاقات کی اور مصیبت زدہ مردوں، خواتین اور بچوں کی خدمت میں ان کی کوششوں کو سراہا۔
انہوں نے ریسکیو کے لیے سول انتظامیہ کی مدد کے لیے تمام دستیاب وسائل کو بروئے کار لانے کی ہدایت کی۔
آرمی چیف کا کہنا تھا کہ سیلاب سے متاثرہ علاقوں میں لوگوں کی امداد، انفراسٹرکچر کی بحالی کیلئے ہمیں حکم کا انتظار کیے بغیر ضرورت مند بھائیوں، بہنوں تک پہنچنا چاہیے، قدرتی آفت پر قابو پانے میں ان کی مدد کرنی چاہیے۔
جنرل قمر جاوید باجوہ کا کہنا تھا کہ ہمارے لوگوں کی حفاظت اور بھلائی سب سے پہلے آتی ہے اور ہم اس وقت تک آرام سے نہیں بیٹھیں گے جب تک سیلاب سے متاثرہ ہر ایک کی بحالی تک چین نہیں بیٹھیں گے۔ عوام ہماری ترجیح ہے اور ہم اس مشکل وقت میں ان کی مدد کے لیے کوئی کسر اٹھا نہیں رکھیں گے۔چاہے کتنی ہی کوشش کیوں نہ کرنا پڑے۔
