بنوں کےعلاقے بکاخیل میں موٹر سائیکل سوارخودکش بمبار نے خود کو دھماکے سے اڑا لیا۔ آئی ایس پی آر کے مطابق ہلاک دہشت گرد کی شناخت افغان باشندے کے طور پر ہوئی۔
پاک فوج کے شعبہ تعلقات عامہ (آئی ایس پی آر) کے مطابق ضلع بنوں کے علاقے بکہ خیل میں ایک موٹرسائیکل پر سوار خودکش بمبار نے سیکیورٹی فورسز کے قافلے سے ٹکرا کر خود کو دھماکے سے اڑا دیا، جس کے نتیجے میں 2 بے گناہ شہری شہید ہوگئے جبکہ دس افراد زخمی ہوئے۔
آئی ایس پی آر کے مطابق زخمی ہونے والوں 7 شہری اور 3 سیکیورٹی اہلکار شامل ہیں، موٹرسائیکل پر سوار خودکش بمبار کی شناخت بھی کر لی گئی جو حافظ گل بہادر گروپ سے وابستہ تھا اور بعد میں افغان شہری کے طور پر اس کی شناخت ہوئی۔
انٹرسروسز پبلک ریلیشنز کے مطابق افغان شہری افغانستان کے شناختی کارڈ تذکرے کی بنیاد پر پاکستان میں داخل ہوا تھا، دہشت گرد کا نام رابن اللہ ولد خانور گل جبکہ اُس کا تذکرہ نمبر 08916164 ہے۔
آئی ایس پی آر کے بیان میں کہا گیا کہ علاقے میں ممکنہ طور پر پائے جانے والے دیگر دہشت گردوں کے خاتمے کے لئے سینی ٹائزیشن آپریشن بھی کیا گیا۔
پاک فوج کے شعبہ تعلقات عامہ نے بتایا کہ مصدقہ ریکارڈ کے مطابق رواں سال پاکستان میں ہونے والے دہشت گردی کے واقعات میں یہ 16ھواں افغان شہری سامنے آیا ہے۔
آئی ایس پی آر نے کہا کہ سیکیورٹی فورسز دہشت گردی کے عفریت کو ختم کرنے کے لئے پرعزم ہیں اور بہادر شہریوں و جوانوں کی یہ قربانیاں ہمارے عزم کو مزید مضبوط کرتی ہیں۔
