پاکستان سمیت بھارت میں مقبول پاکستانی اداکارہ ہانیہ عامر سے متعلق ٹی وی شو میزبان نادیہ خان نے اپنے خیالات کا اظہار کیا ہے۔
ہانیہ پاکستان میں انسٹاگرام پر سب سے زیادہ فالو کی جانے والی اداکارہ ہیں جن کی پوسٹس پر پڑوسی ملک بھارت کے مداح دل کھول کر کمنٹس اور ان کی پذیرائی کرتے ہیں۔
اداکارہ سے متعلق خبریں ہیں کہ وہ جلد بین الاقوامی شہرت یافتہ بھارتی اداکار و گلوکار دلجیت دوسانجھ اور اداکارہ سونم باجوہ کے ہمراہ پنجابی فلم میں نظر آئیں گی۔
تاہم ہانیہ کے بھارت میں کام کرنے پر نادیہ خان نے تبصرہ کیا ہے۔
نادیہ خان نے اپنے شو میں کہا کہ ہانیہ عامر بھارت میں پی آر کے ذریعے فلمیں کرکے اپنا وقت ضائع کر رہی ہیں، ہانیہ کو بھارت میں محنت اور وقت ضائع کرنے کے بجائے کہیں اور لگانا چاہیے، انہیں پاکستان میں ہی رہ کر کام کرنا چاہیے جہاں انہیں بے حد پسند کیا جاتا ہے اور پاکستان میں ہی ان کے اصلی مداح موجود ہیں۔
نادیہ خان کا کہنا تھا کہ آپ سب جانتے ہی ہیں ماضی میں پاکستانی فنکاروں کے ساتھ بھارت میں کیا ہو چکا ہے، اب بھارت میں ہانیہ کی فلم مکمل ہونے سے قبل ہی اس پر پابندی لگانے جیسے مطالبات آنا شروع ہوگئے ہیں۔
نادیہ خان نے یہ بھی کہا کہ سجل علی بھی صرف ایک فلم کرکے واپس پاکستان گئی ہیں، میرا کہنا ہے کہ ہانیہ عامر بھی وہاں اتنا وقت نہ لگائیں تو اچھا ہے۔
