عام طور پر 14 سال کی عمر میں بچے زیادہ تر ویڈیو گیمز یا دیگر کھیلوں پر زیادہ توجہ مرکوز کرتے ہیں۔
مگر چین میں ایک 14 سالہ لڑکا چی جیانگ پنگ کوئی عام بچہ نہیں۔
طیاروں سے محبت کرنے والے اس بچے نے بہت کم عمری میں ہی ہوا بازی کے شعبے کی تعلیم خود حاصل کرنا شروع کر دی تھی اور اب اس نے اپنے ہاتھوں سے ایک فعال ٹربو جیٹ انجن تیار کیا ہے۔
چی جیانگ پنگ اسکول کے آغاز سے ہی کاغذی جہازوں کو دیکھ کر مسحور ہو جاتا تھا اور اس نے پیپر بال اور کاغذ کے جہاز کو ہاتھ سے پھینکنے کے فرق کو جان لیا تھا۔
اسے یہ تجسس تھا کہ آخر یہ کاغذی جہاز فضا میں تیرتا کیوں ہے اور پھر اس نے اپنے گھر میں ایسے کاغذی جہازوں کے لیے ایک تجرباتی لیبارٹری قائم کی، مگر یہ تو محض آغاز تھا۔
والدین کے مطابق چی جیانگ پنگ نے ایک بار عزم کیا تھا کہ وہ روزانہ 3 گھنٹے ہوا بازی سے متعلق سائنسی کتابیں پڑھے گا اور تیسری جماعت میں اس نے خود کو ایرو ڈائنامکس اور دیگر چیزوں کی تعلیم دینا شروع کی۔
یہاں تک کہ اس نے پیچیدہ سافٹ وئیرز جیسے کمپیوٹر ایڈڈ ڈیزائن پر بھی کام شروع کر دیا۔
جب اس نے آن لائن ویڈیو زکو دیکھا تو اپنے لیے کچھ حقیقی تیار کرنے کا فیصلہ کیا اور ایک چھوٹا فعال جیٹ انجن تیار کیا۔
مگر وہ کسی اور کا ڈیزائن کاپی نہیں کرنا چاہتا تھا بلکہ اپنا ڈیزائن خود تیار کرنا چاہتا تھا۔
چی جیانگ پنگ نے ایک انٹرویو میں بتایا کہ ‘کچھ افراد نے بلیو پرنٹس کو آن لائن پوسٹ کیا تھا تاہم اگر میں براہ راست نقل کرلیتا تو یہ بے مقصد ہوتا اور میں خود کچھ سیکھ نہیں پاتا اور بس وقت ہی ضائع ہوتا’۔
اپنے خواب کو پورا کرنے کے لیے اس بچے نے شروع سے تمام چیزوں کا ڈیزائن بنانا شروع کیا، کمپیوٹر ایڈڈ ڈیزائن میں 2 ڈی ڈرائنگز تیار کیں، سولڈ ورکس میں 3 ڈی ماڈلز تیار کیے، ہوا کے بہاؤ، درجہ حرارت اور دیگر پہلوؤں کا تجزیہ کیا۔
6 مہینے میں اس نے ایک پروٹوٹائپ انجن تیار کرلیا مگر اس کا ٹیسٹ ناکام رہا تو چی جیانگ پنگ نے اس میں موجود مسائل کو خود شناخت کیا۔
اس کا کہنا تھا کہ ‘پہلی کوشش میں کوئی بھی کامیاب نہیں ہوتا، میں بھی کامیاب نہیں ہوا مگر میں کچھ نیا سیکھا اور دوبارہ انجن تیار کرنے کا عزم مضبوط ہوا’۔
اب وہ نئے اور پہلے سے بہتر فعال ٹربو یٹ انجن کی تیاری پر کام کر رہا ہے اور جلد اس کی آزمائش کرنے والا ہے۔
