راولپنڈی(شاہد ملک سے) حساس ادارے نے ڈومیسائل برانچ راولپنڈی کہچری میں چھاپہ مارکر ملازمین کو حراست میں لے لیا ہے، مبینہ طور پر
راولپنڈی کے مختلف علاقوں غیر قانونی طور پر مقیم افغان شہریوں کو دستاویزات کی فراہمی میں مدد فراہم کرنے کا سنگین الزام ہے۔ذرائع کے مطابق یہ کاروائی اس وقت عمل میں آئی جب موصول ہونے والی شکایات پر ڈپٹی کمشنر راولپنڈی کیپٹن ریٹائرڈ ندیم ناصر نے ڈومیسائل برانچ پر اچانک چھاپہ مارا۔ اس چھاپے اور ابتدائی شواہد کے سامنے آنے کے بعد ڈومیسائل برانچ کی مرکزی حیثیت کو ختم کر دیا گیا ہے اور اس کے تمام اختیارات متعلقہ اسٹنٹ کمشنرز کو منتقل کر دیے گئے ہیں۔واضح رہے کہ اس پورے معاملے کی شفاف تحقیقات کے لیے ایڈیشنل ڈپٹی کمشنر سوشل سروسز فضائل مدثر کی سربراہی میں ایک تین رکنی کمیٹی تشکیل دی گئی تھی، جس میں اسسٹنٹ کمشنر ہیڈ کوارٹر بھی شامل تھے۔ اس کمیٹی نے ابتدائی انکوائری مکمل کر کے اپنی رپورٹ ڈپٹی کمشنر راولپنڈی کو پیش کر دی تھی۔ رپورٹ ملنے کے بعد ابتدائی طور پر اس معاملے کو اینٹی کرپشن کے سپرد کرنے کا فیصلہ کیا گیا تھا، تاہم بعد ازاں قانون نافذ کرنے والے حساس اداروں نے کارروائی کرتے ہوئے برانچ کے ایک ملازم کو اپنی تحویل میں لے لیا ہے۔ ذرائع کا یہ بھی انکشاف ہے کہ اس گھنانے کھیل میں ایک اور کلرک کے بھی مبینہ طور پر ملوث ہونے کی اطلاعات موصول ہوئی ہیں، جن کی مزید تفتیش جاری ہے۔
