آئیسکو انتظامیہ کی مجرمانہ غفلت،حیات سر روڈ پر موت کا سامان تیار

گوجر خان (نمائندہ خبریں )شہر کی سب سے مصروف ترین شاہراہ حیات سر روڈ، عامر نہاری والے کے بالکل سامنے، آئیسکو حکام کی بے حسی اور لاپرواہی کا منہ بولتا ثبوت بن چکی ہے۔ سڑک کے بالکل کنارے بنا کسی حفاظتی تدابیر کے لاوارث چھوڑا گیا موبائل ٹرانسفارمر کسی بھی وقت ایک خوفناک اور جاں لیوا حادثے کا سبب بن سکتا ہے۔حکام کی اس سنگین غفلت کا عالم یہ ہے کہ گنجان آباد علاقے اور مصروف سڑک کے کنارے پڑے اس خطرناک موبائل ٹرانسفارمر کے گرد نہ تو کوئی حفاظتی باڑ لگائی گئی ہے اور نہ ہی کوئی خبردار کرنے والا بورڈ موجود ہے۔ محلے کے معصوم اور بے خبر بچے کھیل ہی کھیل میں اس موت کے ٹرانسفارمر پر چڑھ جاتے ہیں۔ اگر خدا نخواستہ ذرا سی بھی شارٹ سرکٹ یا کرنٹ کا دھماکہ ہوا تو لمحوں میں کئی گھروں کے چراغ گل ہو سکتے ہیں۔یہ محض انتظامی سستی نہیں بلکہ شہریوں کی زندگیوں سے براہ راست کھلواڑ ہے۔ کیا آئیسکو انتظامیہ اور مقامی ایس ڈی او کسی بڑے سانحے اور لاشوں کے گرنے کا انتظار کر رہے ہیں؟ کیا انتظامیہ کی آنکھیں تبھی کھلیں گی جب کوئی معصوم لخت جگر اس نااہلی کی بھینٹ چڑھ جائے گا؟عوام کی آواز اور حقائق کی پاسداری کرتے ہوئے "جہاں ظلم، وہاں خبریں” کے پلیٹ فارم سے آئیسکو کے اعلی حکام، ایکسیئن اور چیف ایگزیکٹو سے پرزور مطالبہ کیا جاتا ہے کہ اس غفلت کا فوری نوٹس لیا جائے۔ اس موبائل ٹرانسفارمر کو بلا تاخیر وہاں سے ہٹایا جائے اور شہریوں کو اس منڈلاتے ہوئے خطرے سے نجات دلائی جائے، قبل اس کے کہ وقت ہاتھ سے نکل جائے