جعلی ادویات انسانی زندگیوں کیلئے سنگین خطرہ ہیں: ساجد محمود

راولپنڈی(خصوصی رپورٹر)پاکستان مسلم لیگ (ن) لیبر ونگ کے سینئر نائب صدر راجہ ساجد محمود عباسی نے کہا ہے کہ جعلی اور غیر معیاری ادویات کی روک تھام کے لیے حکومت کو مزید مثر اور سخت اقدامات اٹھانا ہوں گے، کیونکہ جعلی ادویات انسانی زندگیوں کے لیے سنگین خطرہ ہیں اور ان کے استعمال سے قیمتی جانیں ضائع ہو سکتی ہیں۔اپنے ایک بیان میں انہوں نے کہا کہ ادویات انسانی صحت اور زندگی سے براہِ راست وابستہ ہیں، اس لیے جعلی ادویات کی تیاری، ذخیرہ اندوزی اور فروخت میں ملوث عناصر کے خلاف بلاامتیاز کارروائی ہونی چاہیے۔ متعلقہ اداروں کو میڈیکل اسٹورز، فارماسیوٹیکل یونٹس اور ادویات کی سپلائی چین کی باقاعدگی سے نگرانی کرنی چاہیے تاکہ عوام کو معیاری اور محفوظ ادویات کی فراہمی یقینی بنائی جا سکے۔راجہ ساجد محمود عباسی نے کہا کہ جعلی ادویات کا کاروبار صرف قانون شکنی نہیں بلکہ انسانی جانوں سے کھیلنے کے مترادف ہے۔ حکومت جدید ٹیکنالوجی کو بروئے کار لاتے ہوئے ادویات کی مثر نگرانی اور ٹریس ایبلٹی کا نظام مزید مضبوط کرے، جبکہ عوام بھی مشکوک ادویات کی خریداری سے گریز کرتے ہوئے متعلقہ حکام کو اطلاع دیں۔انہوں نے مطالبہ کیا کہ جعلی ادویات کے خلاف کارروائیوں کو مزید مثر بنایا جائے اور عوام کو صحت کی بنیادی سہولیات کے ساتھ محفوظ اور معیاری ادویات کی فراہمی یقینی بنائی جائے۔