ممبئی: (ویب ڈیسک)
کنگنا رناوت نے عالیہ بھٹ کی آنے والی فلم ’’گنگو بائی کاٹھیا واڑی‘‘ کے حوالے سے پیشگوئی کرتے ہوئے کہا ہے کہ فلم باکس آفس پر کوئی کمال نہیں دکھا سکے گی۔
اداکارہ کنگنا رناوت نے انسٹاگرام اسٹوری پر عالیہ بھٹ کی آنے والی فلم ’’گنگو بائی کاٹھیاواڑی‘‘ کو اپنی طرف سے فلاپ فلم قرار دیا ہے۔ اداکارہ نے لکھا اس جمعہ کو باکس آفس پر 200 کروڑ روپے جل کر راکھ ہوجائیں گے ۔ کنگنا نے عالیہ پر طنز کرتے ہوئے انہیں پاپا کی پری بھی کہا جو کہ برطانوی پاسپورٹ رکھنا پسند کرتی ہے۔
اداکارہ کنگنا رناوت نے اپنی انسٹاگرام اسٹوری میں فلم کا نام لیے بغیر اس کی کاسٹنگ پر اعتراض اٹھایا اور کہا فلم کی سب سے بڑی خرابی اس کی غلط کاسٹ ہے، یہ نہیں سدھریں گے۔ جب تک مووی مافیا کے پاس طاقت ہے بالی ووڈ کی تباہی مقدر ہے۔
واضح رہے کہ اس جمعہ یعنی 25 فروری کو عالیہ بھٹ کی فلم ’’گنگو بائی کاٹھیاواڑی‘‘ ریلیز ہورہی ہے۔ بالی ووڈ کے مایا ناز فلمساز سنجے لیلا بھنسالی کی فلم ’’گنگو بائی کاٹھیاواڑی‘‘ میں اداکارہ عالیہ بھٹ مرکزی کردار ادا کررہی ہیں جو کہ 1960 کی دہائی کے دوران ممبئی کے ریڈ لائٹ ایریا کماٹھی پورہ کی سب سے زیادہ طاقتور خواتین میں سے ایک تھیں۔
کنگنا نے عالیہ کی فلم ’’گنگو بائی کاٹھیا واڑی‘‘ کو ریلیز سے قبل فلاپ قرار دیدیا
