راولپنڈی: (ویب ڈیسک) آسٹریلیا کے خلاف پنڈی ٹیسٹ میچ کا پہلے روز پاکستان کے نام رہا، قومی ٹیم نے امام الحق کی شاندار سنچری کی بدولت صرف 1 وکٹ کے نقصان پر 245 رنز بنالئے ہیں۔
راولپنڈی کرکٹ سٹیڈیم میں پاکستان اور آسٹریلیا کے مابین پہلا ٹیسٹ میچ جاری ہے جس میں قومی ٹیم کے کپتان بابر اعظم نے ٹاس جیت کر پہلے بیٹنگ کا فیصلہ کیا۔ پاکستان کی جانب سے عبداللہ شفیق اور امام الحق نے اننگز کا آغاز کیا اور قومی ٹیم کو پہلا نقصان 105 رنز پر ہوا جب عبداللہ شفیق چھکا لگانے کی کوشش میں نیتھن لیون کی گیند پر کیچ آؤٹ ہو گئے، انہوں نے 44 رنز کی اننگز کھیلی۔
اوپننگ بلے باز امام الحق نے اپنے ٹیسٹ کیریئر کی پہلی سنچری سکور کی، وہ 132رنز اور اظہر علی64 سکور بناکر وکٹ پر موجود ہیں۔
قبل ازیں قومی کپتان بابر اعظم کا کہنا تھا کہ سیریز کیلئے پر جوش ہیں، کوشش کریں گے کہ اچھا کھیل پیش کریں، ٹیم میں 2 سپنرز شامل کیے ہیں۔
آسٹریلیا کے خلاف میچ کے لئے قومی ٹیم کے سکواڈ میں کپتان بابر اعظم، محمد رضوان، امام الحق، عبداللہ شفیق، اظہر علی، فواد عالم، افتخار احمد، ساجد خان، نعمان علی، شاہین شاہ آفریدی اور نسیم شاہ شامل ہیں۔
پاکستان کے خلاف میچ کے لئے آسٹریلین سکواڈ میں کپتان پیٹ کمنز، عثمان خواجہ، ڈیوڈ وارنر، مارنس لبوشین، سٹیو سمتھ، ٹریوس ہیڈ، کیمرون گرین، الیکس کیری، مچل سٹارک، نیتھن لیون اور جوش ہیزل ووڈ شامل ہیں۔
راولپنڈی ٹیسٹ کا پہلا روز پاکستان کے نام،ایک وکٹ پر 245 رنز بنالیے
