سڈنی(آئی این پی )آسٹریلیا کے خلاف چوتھے ون ڈے میں بھی پاکستانی بری طرح ناکام ہو گئی۔ بالنگ اور فیلڈنگ کی کمزوریوں نے ایک بار پھر اظہر علی کی قائدانہ صلاحیتوں پر سوالیہ نشان لگا دیا۔ اظہرعلی چو تھے میچ میں واپسی پرکوئی کمال نہ دکھا سکے، کپتانی اوربیٹنگ میں ایک بار پھر ناکام رہے۔سڈنی میں گرین شرٹس کی بالنگ اور فیلڈنگ میں ناکامی کے نتیجے میں کینگروز نے تین سو چون رنز کا پہاڑ کھڑا کردیا جس سے اظہرعلی کی کپتانی کی صلاحیتوں کاپول کھل گیا۔ اس کے بعد کپتان جب اوپننگ کے لئے میدان میں آئے تو شائقین نے امیدیں باندھ لیں کہ شاید وہ اپنے بلے سے ہی کوئی کارنامہ دکھا دیں لیکن وہ آئے اور صرف سات رنز بنا کر چل دیے۔یوں ان کی انفرادی کارکردگی بھی صفررہی۔ اظہرعلی کی غیرموجودگی میں حفیظ نے دوسرے ون ڈے میں ٹیم کو فتح دلائی تو کپتان کی تبدیلی کی افواہیں گردش کرنے لگیں ر تیسرے ون ڈے میں شکست کے بعد ٹیم انتظامیہ نے ایک بار پھر اظہر علی کی کپتان برقرار رہنے کی توثیق کر دی۔
پاکستانی کرکٹ شائقین سوچنے پر مجبور ہیں کہ اگر اظہر علی کی قیادت میں ٹیم کی کارکردگی کا یہی حال رہنا ہے تو پی سی بی کو ون ڈے کپتان کی تبدیلی پر غور شروع کر دینا چاہیے۔
