گزشتہ سال شادی کے بندھن میں بندھنے والے پاکستان کرکٹ ٹیم کے آل راؤنڈر شاداب خان نے اپنی جلدی میں طے پانے والی شادی کا دلچسپ قصہ بیان کیا ہے۔
کرکٹر نے حال ہی میں ایک انٹرویو کے دوران منگنی اور شادی کی کہانی سنائی۔
شاداب نے بتایا کہ دسمبر 2022 میں بگ بیش لیگ میں حصہ لینے کے دوران وپ وہ زخمی ہوکر نیوزی لینڈ کے خلاف آئندہ سیریز سے باہر ہوگئے تھے۔
اس دوران ثقلین مشتاق نے شاداب کے اہل خانہ کو اپنے نئے گھر کی مناسبت سے تقریب کی دعوت دی۔
ثقلین کی رہائش گاہ پر قرآن خوانی کے دوران شاداب کی والدہ نے اپنی ہونے والی بہو کو پسند کرلیا اور جھٹ پٹ رشتہ بھی ڈال دیا۔
دلچسپ بات یہ ہے کہ صرف تین دن کے اندر ان کی شادی ہو گئی۔
شاداب نے بتایا کہ شادی کے بعد وہ پہلے ہی کی طرح ثقلین مشتاق کو ثقی بھائی اور ان کی اہلیہ کو بھابھی کہہ کر ہی پکارتے ہیں۔
شاداب خان نے کرکٹ کے علاوہ اپنے فٹ بال کھیلنے کے ابتدائی شوق کا بھی انکشاف کیا۔
کرکٹر کے مطابق انہیں بچپن سے فٹبال کھیلنے کا شوق تھا اور وہ کرکٹ سے جان چھڑاتے تھےجس کی ایک وجہ ہارڈ بال کرکٹ کھیلنے سے گھبرانا بھی تھی۔وہ کوچ سے چھپ کر دوسرے گیٹ پر جاکر ٹیپ بال یا پھرفٹبال کھیلتے تھے۔
اسی دوران فٹبال ٹیسٹ بھی کلیئر کیا لیکن پھر ان کے والد کے جاننے والے ایک شخص نے کہا کہ پاکستان میں فٹبال کا کوئی کیرئیرنہیں ہے جس کے بعدشاداب نے کرکٹ کھیلناشروع کردی۔
