میانمار کے قریب دو کشتی حادثوں میں 500 سے زائد افراد کے جاں بحق ہونے کا خدشہ: اقوام متحدہ
اقوام متحدہ کے ادارہ برائے مہاجرین (UNHCR) اور بین الاقوامی ادارہ برائے مہاجرت (IOM) نے خدشہ ظاہر کیا ہے کہ میانمار کے ساحل کے قریب دو الگ الگ کشتی حادثات میں 500 سے زائد روہنگیا مہاجرین ہلاک ہو سکتے ہیں۔ ابتدائی اطلاعات کے مطابق دونوں کشتیاں جون کے آخر میں میانمار کی ریاست راکھین سے روانہ ہوئی تھیں، جبکہ بعض مسافر بنگلہ دیش کے کوکس بازار میں قائم مہاجر کیمپوں سے بھی سوار ہوئے تھے۔
رپورٹس کے مطابق ایک کشتی روانگی کے کچھ ہی عرصے بعد لاپتا ہو گئی، جبکہ دوسری کشتی 8 جولائی کو میانمار کے آئیراوڈی (Ayeyarwady) ساحل کے قریب خراب موسم اور سمندری طوفانی لہروں کے باعث ڈوب گئی۔ دونوں کشتیوں میں مجموعی طور پر 500 سے زائد افراد سوار تھے، جن میں خواتین اور بچے بھی شامل تھے۔
اقوام متحدہ کے مطابق یہ حالیہ برسوں میں روہنگیا مہاجرین کے لیے پیش آنے والے بدترین سمندری سانحات میں سے ایک ہو سکتا ہے۔ اداروں نے فوری سرچ اینڈ ریسکیو کارروائیوں، محفوظ نقل مکانی کے انتظامات اور روہنگیا مہاجرین کے تحفظ کے لیے عالمی برادری سے ہنگامی اقدامات کی اپیل کی ہے۔
