کراچی (این این آئی) پاکستان سمیت دنیا بھر میں10ستمبرکو خودکشی سے بچاؤ کا عالمی دن منایا گیا
جس کا مقصد خودکشی کے بڑھتے ہوئے مسئلے کی جانب عالمی توجہ مبذول کرانا اور عوام میں ذہنی صحت، بروقت مدد اور خودکشی کی روک تھام سے متعلق شعور اجاگر کرنا ہے۔ اس موقع پر ماہرین نے زور دیا کہ بروقت توجہ، ہمدردانہ گفتگو، مناسب علاج اور متاثرہ فرد کو تنہا نہ چھوڑنے سے قیمتی جانیں بچائی جاسکتی ہیں۔عالمی ادارہ صحت کے مطابق دنیا بھر میں ہر سال 7 لاکھ 20 ہزار سے زائد افراد خودکشی کے باعث جان سے ہاتھ دھو بیٹھتے ہیں، جبکہ اس سے کہیں زیادہ افراد خودکشی کی کوشش کرتے ہیں۔ ماہرین کے مطابق خودکشی کے پیچھے عموماً کوئی ایک وجہ نہیں ہوتی بلکہ مختلف نفسیاتی، سماجی اور حالات سے متعلق عوامل مل کر کسی فرد کے لیے خطرہ بڑھا سکتے ہیں۔
