نیویارک (سپیشل رپورٹر سے )ٹیکساس کے ٹیرنٹ کائونٹی میں بزرگ شہریوں کو مبینہ طور پر دھوکا دے کر ان کی جمع پونجی، سونا اور کرپٹو کرنسی ہتھیانے والے ایک بڑے فراڈ نیٹ ورک کے اہم ملزم کو نیویارک کےJFK ایئرپورٹ سے گرفتار کر لیا
گیا۔ حکام کے مطابق مزمل احمد سعودی عرب جانے والی یک طرفہ (ون وے )پرواز کا انتظار کر رہے تھے، جب انہیں گرفتار کیا گیا۔ تفتیش کاروں کا کہنا ہے کہ نیو جرسی اس مبینہ نیٹ ورک کا ایک اہم آپریشنل مرکز تھا۔حکام کے مطابق اس کیس میں اب تک 40سے زائد افراد پر فردِ جرم عائد کی جا چکی ہے، جبکہ ملک بھر میں 200سے زیادہ بزرگ متاثرین سامنے آئے ہیں اور مجموعی مالی نقصان 20 کروڑ ڈالر سے زائد بتایا گیا ہے۔مبینہ طور پر فراڈ کرنے والے افراد بزرگ شہریوں کو فون کرکے انہیں خوفزدہ کرتے تھے کہ ان کا بینک اکائونٹ، سوشل سکیورٹی نمبر یا ذاتی معلومات ہیک یا متاثر ہو گئی ہیں۔ اس کے بعد انہیں اپنی رقم نکالنے، سونے کی اینٹیں یا بٹ کوائن خریدنے اور بعض اوقات نقد رقم کسی مبینہ ایجنٹ کے حوالے کرنے پر مجبور کیا جاتا تھا۔ تفتیش کاروں کے مطابق چوری کیا گیا سونا مختلف ذرائع سے ریفائنریوں اور زیورات کے کاروبار تک پہنچایا جاتا، جہاں اسے پگھلا کر دوسری شکل میں تبدیل کیا جاتا، جبکہ رقم کو شیل کمپنیوں کے ذریعے منتقل اور کرپٹو کرنسی میں تبدیل کرکے بیرون ملک بھیجا جاتا تھا۔ حکام کا کہنا ہے کہ اس نیٹ ورک میں کال سینٹرز، رقم یا سونا وصول کرنے والے افراد اور دیگر سہولت کار شامل تھے۔ مزید برآں، نیویارک اور شکاگو کے ایئرپورٹس سے دو دیگر مشتبہ افراد کو بھی گرفتار کیا گیا، جو مبینہ طور پر کینیڈا جانے کی تیاری میں تھے۔حکام نے بزرگ شہریوں اور ان کے اہل خانہ کو خبردار کیا ہے کہ کوئی سرکاری ادارہ فون کرکے سونا خریدنے، نقد رقم نکالنے یا کرپٹو کرنسی خرید کر محفوظ رکھنے کا نہیں کہتا۔ ایسی کال موصول ہونے پر فورا فون بند کریں اور متعلقہ ادارے سے براہِ راست رابطہ کریں۔
