پنجاب یونیورسٹی کو جاری منصوبے کے دوسرے پی سی ون کی منظوری مل گئی

لاہور (جنرل رپورٹر) پنجاب یونیورسٹی کو اہم کامیابی حاصل ہوگی، پنجاب یونیورسٹی لاہور میں تعلیمی و تحقیقی پروگراموں کے استحکام کے عنوان سے
جاری منصوبے کے دوسرے نظرثانی شدہ پی سی ون کی منظوری دے دی گئی ہے، جس کے لیے مجموعی طور پر4.15 ارب روپے مختص کیے گئے ہیں۔ نظرثانی شدہ پی سی ون کی منظوری سنٹرل ڈویلپمنٹ ورکنگ پارٹی (سی ڈی ڈبیلو پی) کے اجلاس میں دی گئی، جس کی صدارت وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نے کی۔ میڈیا کو جاری بیان میں وائس چانسلر پروفیسر ڈاکٹر محمد علی نے کہا کہ نظرثانی شدہ پی سی ون کی منظوری یونیورسٹی کے تعلیمی اور تحقیقی ڈھانچے کو مزید مضبوط بنانے کی جانب ایک اہم قدم ہے۔ انہوں نے کہا کہ اس منصوبے کا مقصد یونیورسٹی کی بنیادی تحقیقی صلاحیتوں کو جدید بنانا، تعلیمی پروگراموں کو مضبوط کرنا، تحقیقی سہولیات کو بہتر بنانا اور اعلیٰ معیار کی تدریس، تعلیم اور تحقیق کے لیے مزید سازگار ماحول فراہم کرنا ہے۔ انہوں نے کہا کہ 4.15 ارب روپے کی نظرثانی شدہ رقم، منصوبے پر موثر انداز میں عملدرآمد کے لیے اہم مالی معاونت فراہم کرے گی اور پنجاب یونیورسٹی کو جدید تعلیمی و تحقیقی انفراسٹرکچر کی ترقی کے اپنے اہداف حاصل کرنے میں مدد دے گی۔ انہوں نے مزید کہا کہ پنجاب یونیورسٹی کی انتظامیہ اس اہم کامیابی پراللہ تعالی کا شکر ادا کرتی ہے اور ہائر ایجوکیشن کمیشن آف پاکستان اور وزارتِ منصوبہ بندی، ترقی و خصوصی اقدامات کی جانب سے فراہم کردہ تعاون، رہنمائی اور معاونت کو سراہتی ہے۔ نظرثانی شدہ پی سی ون کی منظوری کو پنجاب یونیورسٹی کو اعلیٰ تعلیم اور تحقیق کے ایک مزید مضبوط مرکز میں تبدیل کرنے کے عمل میں ایک اہم پیشرفت قرار دیا جا رہا ہے۔ توقع ہے کہ اس منصوبے سے تعلیمی پروگراموں کے معیار کو بہتر بنانے اور پنجاب یونیورسٹی کی تحقیقی صلاحیتوں کو وسعت دینے میں نمایاں مدد ملے گی۔ پنجاب یونیورسٹی کی انتظامیہ نے اس عزم کا بھی اظہار کیا ہے کہ منظور شدہ وسائل کو موثر اور بہترین انداز میں استعمال کرتے ہوئے تعلیمی معیار، تحقیق اور ادارہ جاتی ترقی کو مزید فروغ دیا جائے گا۔