ٹیکس بڑھانے کے بجائے ٹیکس بیس وسیع کیا جائے: ٹیکس ایڈوائزرز

لاہور( این این آئی)ٹیکس ایڈوائزرز ایسوسی ایشن نے کہا ہے کہ ملکی معیشت کے استحکام اور ٹیکس وصولیوں میں اضافے کے لیے موجودہ ٹیکس نظام
میں بنیادی اصلاحات ناگزیر ہیں، ٹیکس شرحیںبڑھانے کے بجائے ٹیکس بیس وسیع کیا جائے،ٹیکس نظام کو سادہ، شفاف اور کاروبار دوست بنائے بغیر معیشت کو دستاویزی بنانے کا ہدف حاصل نہیں کیا جا سکتا۔ ایسوسی ایشن کے صدر میاں عبد الغفار اورجنرل سیکرٹری خواجہ ریاض حسین نے اپنے مشترکہ بیان میں کہا کہ پہلے سے ٹیکس دینے والے افراد اور کاروباری اداروں پر مزید بوجھ ڈالنے کے بجائے نئے ٹیکس دہندگان کو نظام میں شامل کیا جائے۔ انہوں نے مطالبہ کیا کہ ایف بی آر کے نظام میں انسانی مداخلت کم کرکے ٹیکس معاملات کو زیادہ سے زیادہ ڈیجیٹل بنایا جائے تاکہ کرپشن اور غیرضروری ہراسانی کا خاتمہ ہو۔ ٹیکس ریٹرن، آڈٹ، ریفنڈ اور اپیل کے عمل کو آسان اور تیز بنایا جائے تاکہ کاروباری طبقے کا اعتماد بحال ہو۔ انہوں نے کہا کہ ٹیکس پالیسی میں بار بار تبدیلیاں سرمایہ کاری اور کاروباری سرگرمیوں کو متاثر کرتی ہیں اس لیے مستقل اور قابلِ پیش گوئی ٹیکس پالیسی ضروری ہے۔ ٹیکس ایڈوائزرز ایسوسی ایشن کے رہنمائوں نے تجویز دی کہ چھوٹے کاروبار اور نئے سرمایہ کاروں کے لیے آسان ٹیکس رجسٹریشن اور فائلنگ نظام متعارف کرایا جائے۔ ٹیکس چوری کے خلاف بلاامتیاز کارروائی اور بڑے نان فائلرز کو ٹیکس نیٹ میں لانے سے قومی خزانے کی آمدن میں نمایاں اضافہ ممکن ہے۔ ٹیکس وصولی میں اضافہ معیشت پر اضافی بوجھ ڈالنے سے نہیں بلکہ وسیع ٹیکس بیس، بہتر انتظامی نظام اور ٹیکس دہندگان کے اعتماد سے ممکن ہے۔