حضرت علی ہجویری کا مزار روحانی ‘ تاریخی اہمیت کا حامل:اسحاق ڈار

لاہور (این این آئی) نائب وزیراعظم و وزیر خارجہ محمد اسحاق ڈار نے کہا ہے کہ حضرت علی ہجویری المعروف حضرت داتا گنج بخش کا مزار منفرد روحانی و
تاریخی اہمیت کا حامل ہے اور لاکھوں عقیدت مندوں کے لیے گہری عقیدت و احترام کا مرکز ہے،داتا دربار پر پاکستان بھر اور بیرونِ ملک سے بڑی تعداد میں زائرین حاضری دیتے ہیں۔ ان خیالات کا اظہار انہوں نے گزشتہ روز داتا دربار لاہور کے دورے کے موقع پر کیا۔ اس موقع پر سیکرٹری/چیف ایڈمنسٹریٹر اوقاف پنجاب ڈاکٹر احسان بھٹہ، ایڈمنسٹریٹر داتا دربار محمد علی خان، ایکسین قیصر منیر اور داتا دربار کے دیگر افسران بھی موجود تھے۔ قبل ازیں نائب وزیراعظم محمد اسحاق ڈار نے مزار پر حاضری دی، فاتحہ خوانی کی اور ملک کی سلامتی، ترقی، خوشحالی اور استحکام کے لیے خصوصی دعا کی۔ نائب وزیراعظم و وزیر خارجہ سینیٹر محمد اسحاق ڈار نے چین کے ساتھ تجارت و سرمایہ کاری، علاقائی روابط، سی پیک، زراعت، سائنس و ٹیکنالوجی، تعلیم اور عوامی سطح پر روابط سمیت مختلف شعبوں میں آہنی بھائی چارے اور سدابہار تذویراتی تعاون پر مبنی شراکت داری کو مزید مضبوط اور گہرا کرنے کی اہمیت پر زور دیا۔ ہفتہ کو دفتر خارجہ سے جاری بیان کے مطابق پاکستان کے چین کے لیے نامزد سفیر علی اسد گیلانی نے نائب وزیراعظم و وزیر خارجہ سینیٹر محمد اسحاق ڈار سے ملاقات کی۔نائب وزیراعظم و وزیر خارجہ نے علی اسد گیلانی کو چین کے لیے سفیر مقرر ہونے پر مبارکباد دی اور اس بات پر زور دیا کہ پاکستان چین کے ساتھ اپنے آزمودہ اور دیرینہ تعلقات کو خصوصی اہمیت دیتا ہے۔انہوں نے تجارت و سرمایہ کاری، علاقائی روابط، سی پیک، زراعت، سائنس و ٹیکنالوجی، تعلیم اور عوامی سطح پر روابط سمیت مختلف شعبوں میں آہنی بھائی چارے اور سدابہار تذویراتی تعاون پر مبنی شراکت داری کو مزید مضبوط اور گہرا کرنے کی اہمیت پر زور دیا۔