اپنے سرکاری ہسپتال پر عدم اعتماد ایڈمن افیسر کا نجی ہسپتا ل سے علاج

کراچی ( عبدالستار آزاد) لیاری جنرل ہسپتال اور شہید محترمہ بے نظیر بھٹو میڈیکل کالج لیاری کراچی
کے ایڈمن آفیسر محمد عزیر ولد محمد رستم عرف عزیر لال کی جانب سے تھائی رائیڈ کے علاج کے لیے سرکاری ہسپتال کے بجائے مہنگے نجی ہسپتال سے علاج کرانے کا معاملہ سامنے آگیا، جس نے سرکاری طبی سہولیات اور انتظامیہ پر اعتماد کے حوالے سے سوالات کھڑے کردیئے۔دستیاب بل کے مطابق عزیر رستم نے 9 ستمبر 2026 کو کراچی کے ساؤتھ سٹی ہاسپٹل (پرائیویٹ) میں داخل ہوکر تھائی رائیڈ کے بائیں حصے کی سرجری LEFT THYROID LOBECTOMY کرائی۔ بل نمبر IFB/2026/009921 کے مطابق علاج پر مجموعی طور پر 5 لاکھ 44 ہزار 136 روپے خرچ ہوئے۔ دستاویز کے مطابق کنسلٹنٹ پروسیجر کی فیس 3 لاکھ 23 ہزار 500 روپے، روم چارجز 77 ہزار 500 روپے جبکہ فارمیسی کے اخراجات 68 ہزار 446 روپے درج ہیں۔ ذرائع کا دعویٰ ہے کہ تھائی رائیڈ کی اس نوعیت کی سرجری سرکاری ہسپتالوں میں بھی دستیاب ہے اور مستحق مریضوں کو یہ سہولت مفت یا کم خرچ میں فراہم کی جاتی ہے۔ ایسے میں سرکاری ہسپتال کے انتظامی افسر کی جانب سے نجی ہسپتال کا انتخاب عوامی حلقوں کے لیے سوال بن گیا ہے۔ سماجی حلقوں نے سوال اٹھایا ہے کہ اگر سرکاری ہسپتال کا انتظام سنبھالنے والا افسر بھی اپنے ادارے میں علاج کرانے کے بجائے لاکھوں روپے خرچ کرکے نجی ہسپتال کا رخ کرے تو عام غریب مریض سرکاری نظام پر کیسے اعتماد کرے؟ عوامی حلقوں نے مطالبہ کیا ہے کہ سرکاری ہسپتالوں میں طبی سہولیات، ڈاکٹروں اور علاج کے معیار کے حوالے سے صورتحال واضح کی جائے۔