بھارت’ امتحان میں چیٹ جی پی ٹی استعمال کرنے والے طالب علم نے خودکشی کر لی

ممبئی (آئی این پی)بھارتی انسٹی ٹیوٹ آف ٹیکنالوجی ممبئی کے دوسرے سال کے ایک طالب علم نے گزشتہ شب موبائل فون کے ذریعے امتحان میں نقل کرتے پکڑے جانے کے بعد خودکشی کر لی۔ادارے کے مطابق انرجی سائنس اینڈ انجینئرنگ کے شعبے کے طالب علم نے امتحان کے دوران جوابات حاصل کرنے کے لیے امتحانی سوالنامہ چیٹ جی پی ٹی پر اپ لوڈ کیا تھا۔حکام نے بتایا ہے کہ طالب علم کے خلاف کوئی تادیبی کارروائی نہیں کی گئی تھی۔انسٹرکٹر اور شعبے کے سربراہ نے بھی طالب علم سے اس معاملے پر بات کی، اسے سمجھایا اور یقین دلایا کہ اس واقعے سے اس کے تعلیمی مستقبل پر منفی اثر نہیں پڑے گا۔گفتگو کے بعد طالب علم اپنے ہاسٹل کے کمرے میں واپس چلا گیا، بعد ازاں شام کو اسے اپنے کمرے میں مردہ پایا گیا۔بھارتی میڈیا کی رپورٹس کے مطابق آئی آئی ٹی کے پوائی کیمپس میں گزشتہ 6 ماہ کے دوران یہ تیسرا خودکشی کا واقعہ ہے، یہ خبر سامنے آتے ہی کیمپس کے باہر طلبہ نے احتجاج شروع کر دیا۔احتجاج کرنے والے طلبہ نے الزام عائد کیا ہے کہ ادارہ واقعے سے متعلق مکمل حقائق سامنے نہیں لا رہا۔احتجاج کرنے والے طلبہ نے الزام عائد کیا ہے کہ تادیبی کارروائی کے خوف اور دبائو نے ممکنہ طور پر طالب علم کو یہ انتہائی قدم اٹھانے پر مجبور کیا تاہم اس دعوے کی آزادانہ طور پر تصدیق نہیں ہو سکی ہے۔