لنڈے کا کالا کوٹ پہن کر کوئی وکیل نہیں بن جاتا: کیپٹن (ر) صفدر

اسلام آباد، لاہور (نیوز ایجنسیاں ) مسلم لیگ
ن کے رہنما کیپٹن (ر)صفدر نے کہا ہے کہ لنڈے کا کالا کوٹ پہن لینے سے کوئی شخص وکیل نہیں بن جاتا، میرا ون پوائنٹ ایجنڈا صرف یہ ہے کہ جن پر سوال اٹھے ہیں وہ اپنی اصلی ڈگری دکھا دیں، ہم خود ان کے گھر مٹھائی لے کر جائیں گے۔میڈیا سے گفتگو کے دوران وکلاء کی ڈگریوں اور بار کونسل کے الیکشنز کے تنازعہ پر اپنا سخت ردِعمل دیتے ہوئے انہوں نے کہا کہ میں کسی پر کیچڑ نہیں اچھالوں گا کیونکہ میری ایسی تربیت نہیں ہے اور نہ ہی میں اخلاق سے گری ہوئی کوئی بات کروں گا لیکن میری ایک ہی سادہ اور واضح شرط ہے کہ آپ بس اپنی تعلیمی و قانونی ڈگری دکھا دیں، اگر آپ ڈگری دکھا دیتے ہیں تو ہم آپ سے معافی بھی مانگیں گے، آپ کے گھر خوشی سے مٹھائی بھی لے کر آئیں گے اور آپ کو بری امام سرکار کے دربار لے جا کر عزت کے ساتھ چادر بھی چڑھائیں گے۔کیپٹن ریٹائرڈ صفدر نے وکلا برادری اور بار کی سیاست پر بات کرتے ہوئے کہا کہ لنڈے کا کالا کوٹ پہن کر گھومنے سے کوئی شخص قانون دان یا وکیل نہیں بن جاتا۔ ڈگری تو ہر صورت دکھانی ہی پڑے گی، اعظم نذیر تارڑ بالکل ٹھیک کہہ رہے ہیں کہ جو لوگ وکیل نہیں ہیں وہ بار کی سیاست سے دور رہیں، میرا بھی یہی چٹان جیسا موقف ہے کہ جن افراد کے پاس وکالت کی قانونی ڈگری موجود نہیں ہے، انہیں بار کے الیکشنز سے مکمل طور پر پرے اور دور رہنا چاہیے۔دریں اثناء کیپٹن (ر) محمد صفدر نے کہا ہے کہ مجھے بیشک عدالت میں لے جانے کی دھمکیاں دیں ،مجھے پتہ ہے احسن بھون درخواست کا ایک پیرا ڈرافٹ نہیں کر سکتے ۔ ایک ویڈیو بیان میں کیپٹن (ر) صفدر نے کہا کہ ایک طرف آپ عدالت میں پیش ہوں اور دوسری طرف میں پیش ہوکر دکھائوں گا،آپ بھی اپنا کیس پیش کرنا میں بھی اپنے دلائل دوں گا۔ آپ دعویٰ کرنا جواب دعویٰ میں دوں گا۔وہ اور لوگ ہیں جن کو آپ نے ڈرا لیا ہو گا،لاہور کی ایک پروین بی بی اور ندیم کوآپ نے ڈر الیا تھا ۔ میں آپ کو کہتاہوںٹریفک کا قانون ہے لائسنس دکھانا ،آپ اتنے بڑے منصب پر بیٹھے ہوئے ہیں ڈگری دکھائیں ، ” مختیاریا گل ود ھ گئی اے”
کیپٹن ( ر) صفدر