مسجد الحرام کے قریب حملے کی افواہیں بے بنیاد، سعودی حکام کی وضاحت

سعودی عرب نے سوشل میڈیا پر تیزی سے وائرل ہونے والی ان اطلاعات کی تردید کردی ہے جن میں دعویٰ کیا گیا تھا کہ مسجد الحرام کے قریب ایک شخص نے بارودی جیکٹ پہن کر خودکش حملے کی کوشش کی۔
سعودی سیکیورٹی حکام کے مطابق مکہ مکرمہ میں بم دھماکے یا خودکش حملے کی کوشش نہیں ہوئی۔ حکام نے بتایا کہ ایک شخص کو راہگیروں کو ہراساں کرنے اور ان میں خوف و ہراس پھیلانے کے الزام میں حراست میں لیا گیا اور اس کے خلاف فوری کارروائی کی گئی۔
سعودی حکام نے واضح کیا کہ سوشل میڈیا پر گردش کرنے والے وہ دعوے جن میں شخص کے پاس دھماکا خیز مواد ہونے یا خانہ کعبہ کے قریب حملے کی کوشش کا ذکر کیا گیا، حقیقت پر مبنی نہیں۔ واقعے سے متعلق مزید تفصیلات حکام کی جانب سے جاری نہیں کی گئیں۔
حکام نے عوام پر زور دیا ہے کہ غیر مصدقہ اطلاعات اور افواہوں کو آگے پھیلانے سے گریز کیا جائے اور ایسے حساس معاملات میں صرف سرکاری ذرائع سے جاری معلومات پر اعتماد کیا جائے۔