پاکستان کا دوام سیاسی و معاشی استحکام سے وابستہ ہے، عائشہ جاوید

لاہور (جنرل رپورٹر) پنجاب اسمبلی کی سابقہ ممبر
اور سماجی و سیاسی شخصیت عائشہ جاوید نے کہا ہے کہ پاکستان کا دوام سیاسی و معاشی استحکام سے وابستہ ہے۔ صوبوں کے درمیان تلخیاں پیدا کرنے سے گریز کیا جائے، جمہوری قوتوں کے درمیان نفاق سے وفاق پر منفی اثر پڑتا ہے۔ صاف نیت، درست سمت اور انتھک خدمت سے پاکستان کی کایا پلٹ سکتی ہے۔ معاشرے کے محروم طبقات کی بحالی اور خوشحالی کیلئے مہنگائی کا سیلاب روکا جائے۔ جمہوری قوتوں کے مابین باہمی تعاون کے فروغ سے ملک دشمن قوتوں کے ہاں صف ماتم بچھ جائے گی۔ چاروں صوبوں کے سیاستدان قومی وحدت، ریاست کی سالمیت اور اس کے مفادات کو اپنی اپنی ترجیحات میں سرفہرست رکھیں۔ اپنے ایک بیان میں عائشہ جاوید نے مزید کہا کہ پاکستان کو درپیش اندرونی و بیرونی خطرات کا مقابلہ کرنے اور دہشت گردی کا آسیب بوتل میں بند اور سمندر برد کرنے کیلئے جمہوری قوتوں کے درمیان مثالی اتحاد و یکجہتی کی اشد ضرورت ہے۔ تعمیر ریاست کیلئے تعمیری سیاست کی اہمیت اورضرورت سے انکار نہیں کیا جاسکتا۔