سعودی عرب کے دارالحکومت ریاض کے کنگ خالد انٹرنیشنل ایئرپورٹ پر متعدد دھماکوں کے بعد کم از کم ایک طیارے کو شدید نقصان پہنچا ہے۔ یہ واقعہ ایسے وقت میں پیش آیا جب یمن کے حوثیوں نے ریاض ایئرپورٹ کو بیلسٹک میزائل سے نشانہ بنانے کا دعویٰ کیا۔
خبر رساں ادارے اے ایف پی کے مطابق معاملے سے باخبر دو ذرائع نے بتایا کہ کم از کم ایک طیارے کو انتہائی شدید نقصان پہنچا، جبکہ دوسرے ذریعے کے مطابق تین طیارے زد میں آئے۔
دوسری جانب حوثی فوجی ترجمان یحییٰ سریع نے دعویٰ کیا کہ گروپ نے ریاض کے کنگ خالد انٹرنیشنل ایئرپورٹ کی جانب بیلسٹک میزائل داغا، جس سے فضائی ٹریفک متاثر ہوئی۔ تاہم سعودی حکام نے طیارے کو پہنچنے والے نقصان کی فوری طور پر مکمل تصدیق نہیں کی۔
سعودی قیادت میں قائم اتحاد کا کہنا ہے کہ اس نے ریاض کی جانب آنے والے دو بیلسٹک میزائل اور خمیس مشیط کی سمت فائر کیا گیا ایک میزائل فضا میں تباہ کر دیا۔ میزائل کے ملبے سے ریاض میں ایک کنڈرگارٹن اور طبی مرکز کو بھی نقصان پہنچنے کی اطلاع ہے۔
رائٹرز کے مطابق ریاض ایئرپورٹ پر ایک کھڑے ہوئے طیارے سے دھواں اٹھتے دیکھا گیا، جبکہ واقعے کے بعد متعدد پروازیں تاخیر اور منسوخی کا شکار ہوئیں۔
یہ حملے سعودی عرب میں حوثیوں کی جانب سے ایئرپورٹس اور توانائی کے بنیادی ڈھانچے کو نشانہ بنانے کی حالیہ کارروائیوں میں مزید اضافہ ہیں۔ گزشتہ حملوں میں ریاض اور ابہا ایئرپورٹس پر جانی نقصان بھی ہوا، جبکہ سعودی حکام کے مطابق تین افراد ہلاک اور 36 زخمی ہوئے تھے
