امریکہ بھر میں ٹرک ڈرائیوروں کا ایک روزہ احتجاج

نیویارک (سپیشل رپورٹر سے)امریکہ بھر میں متعدد ٹرک ڈرائیوروں نے اپنے ٹرک سڑکوں سے ہٹا کر ایک روزہ احتجاج کیا۔ ڈرائیوروں کے مطابقڈیزل کی بڑھتی ہوئی قیمتوں، انشورنس کے مہنگے اخراجات، کم فریٹ ریٹس اور بروکرز کے معاملات میں شفافیت نہ ہونے کی وجہ سے ٹرکنگ کا کاروبار مشکل ہوتا جا رہا ہے۔رپورٹس کے مطابق احتجاج میں زیادہ تعداد ان ڈرائیوروں کی تھی جو اپنے ٹرک خود چلاتے اور اپنے کاروبار کے مالک ہیں، جبکہ بعض چھوٹی ٹرکنگ کمپنیوں نے بھی اس دن کام بند رکھا۔ اس احتجاج کی مجموعی تعداد واضح نہیں، تاہم سوشل میڈیا پر موجود پوسٹس اور ڈرائیوروں کے انٹرویوز سے اندازہ ہوتا ہے کہ ملک کے مختلف علاقوں میں سینکڑوں اور ممکنہ طور پر ہزاروں ٹرک ڈرائیور اس میں شریک ہوئے۔یہ احتجاج کسی بڑی ٹریڈ یونین یا باقاعدہ تنظیم کی قیادت میں نہیں بلکہ ڈرائیوروں نے سوشل میڈیا کے ذریعے خود منظم کیا۔ گزشتہ دو ہفتوں سے احتجاج کی کالز سوشل میڈیا پر گردش کر رہی تھیں اور بعض ڈرائیوروں نے احتجاجی مواد اور مطالبات تیار کرنے کے لیے مصنوعی ذہانت کی مدد بھی حاصل کی۔ڈرائیوروں کا کہنا ہے کہ موجودہ اخراجات کے مقابلے میں انہیں مال برداری کے کم معاوضے مل رہے ہیں، جس سے خاص طور پر چھوٹے ٹرک مالکان کے لیے کاروبار جاری رکھنا مشکل ہو رہا ہے۔ ایک ڈرائیور نے سوشل میڈیا پر کہا کہ ڈیزل کی قیمت تقریبا 7 ڈالر فی گیلن تک پہنچ جانا ناقابل قبول ہے اور ٹرکنگ کا شعبہ رک جائے تو ملک کی سپلائی اور مال برداری کا نظام بھی شدید متاثر ہو سکتا ہے۔امریکہ میں ٹرکنگ ملکی مال برداری کے نظام کا ایک انتہائی اہم حصہ ہے۔ دستیاب اعداد و شمار کے مطابق ٹرک سالانہ تقریبا 10 ٹریلین ڈالر مالیت کا سامان منتقل کرتے ہیں اور وزن کے لحاظ سے ملک کی تقریبا 70 سے 71 فیصد اندرونِ ملک مال برداری ٹرکوں کے ذریعے ہوتی ہے۔