واشنگٹن : (ویب ڈیسک) امریکی صدر جو بائیڈن نے کہا ہے کہ نارتھ اٹلانٹک ٹریٹی آرگنائزیشن ( نیٹو ) کے اتحادیوں کے طور پر ہم اتحاد کو مزید مضبوط اور قابل بنا رہے ہیں۔
غیر ملکی خبر رساں ادارے کے مطابق امریکی صدر جو بائیڈن سے جرمن چانسلر اولاف شولز نے واشنگٹن ڈی سی میں ملاقات کی ہے جس میں دونوں رہنماؤں کے درمیان یوکرین جنگ، نیٹو اتحاد اور دیگر اہم امور پر تبادلہ خیال کیا گیا ہے۔
ملاقات کے دوران بائیڈن نے یوکرین کے لیے جرمنی کی عسکری اور سیاسی حمایت کو سراہا اورجرمن ہم منصب کو بتایا کہ آپ نے یوکرین کو عسکری مدد فراہم کرنے کے لیے اہم قدم اٹھایا اور عسکری حمایت سے ہٹ کر یوکرائنیوں کو جو اخلاقی حمایت دی وہ ہمیشہ یاد رکھی جائے گی۔
امریکی صدر نے روس کے تیل اور گیس پر انحصار سے ہٹ کر دفاعی اخراجات میں اضافے اور توانائی کی فراہمی میں تنوع لانے پر بھی جرمنی کی تعریف کی۔
اس موقع پر جرمن چانسلر اولاف شولز نے یوکرین کے لیے مغربی حمایت برقرار رکھنے کی اہمیت پر زور دیتے ہوئے کہا کہ یہ ایک بہت ہی اہم سال ہے کیونکہ یوکرین پر روس کے حملے سے امن خطرے میں پڑ چکا ہے۔
جرمن چانسلر نے کیف کے لیے ضروری مدد فراہم کرنے میں امریکا اور یورپ کے درمیان بحر اوقیانوس کے تعاون کو سراہتے ہوئے کہا کہ میرے خیال میں یہ پیغام دینا بہت اہم کے ہم جب تک ضروری ہوا یوکرین کی مدد کرتے رہیں گے۔
دوسری جانب امریکا نے یوکرین کے لیے 400 ملین ڈالرز مالیت کے ایک نئے فوجی امدادی پیکج کا اعلان کیا ہے جس میں پہلی بار ٹینکوں کو منتقل کرنے کے لیے ٹیکٹیکل پلوں کو بھی شامل کیا گیا ہے۔

راولپنڈی: (ویب ڈیسک) سربراہ پاکستان عوامی مسلم لیگ اور سابق وفاقی وزیر داخلہ شیخ رشید احمد نے کہا ہے کہ الیکشن سے بھاگنے کی کوششں کی گئی تو نظریہ ضرورت جنم پائے گا، الیکشن میں ہی ملک کی بقاء ہے۔
سماجی رابطے کی ویب سائٹ ٹوئٹر پر اپنے پیغام میں شیخ رشید احمد نے لکھا کہ صدر نے تو انتخابات کی 30 اپریل کی تاریخ دے دی لیکن پی ڈی ایم کی مشاورت کا فیصلہ ابھی سامنےنہیں آیا، دیکھنا یہ ہے کہ اب 30 اپریل کو الیکشن ہوتے ہیں یا ابھی عشق کے امتحان اور بھی ہیں۔
انہوں نے کہا کہ چین نے مشکل کے وقت پاکستان سے دوستی کا حق ادا کیا ہے پھر بھی حکمران سامراج کےغلام بنے ہوئے ہیں، آئی ایم ایف کے ایگزیکٹوبورڈ میں پاکستان کا کیس ایجنڈے پر نہیں ہے، سیاستدان وڈیو آڈیو میں پھنسے ہوئے ہیں۔
سابق وزیر کا مزید کہنا تھا کہ 90 روزہ نگران وزیراعلیٰ 9 سالہ ترقیاتی کاموں کا افتتاح کر رہے ہیں، بجلی پر ساڑھے 3 روپے فی یونٹ اضافی سرچارج لگا دیا ہے، غریب حاجیوں کیلئے بھی خزانہ خالی ہے اب ڈالر والے حج کر سکیں گے۔

لاہور :(ویب ڈیسک) چیئرمین پاکستان تحریک انصاف عمران خان نے دعوی کیا ہے کہ انہیں قتل کرنے کا دوسرا منصوبہ بھی بنایا جا چکا ہے۔
سماجی رابطے کی ویب سائٹ ٹوئٹر پر جاری ویڈیو پیغام میں چیئرمین پاکستان تحریک انصاف عمران خان نے کہا کہ ہم نے آئین کو دیکھتے ہوئے اپنی حکومتیں قربان کیں، وکلاء نے بتایا کہ 90 دن سے آگے الیکشن جاہی نہیں سکتا ، عدلیہ کو اعتماد دلاتا ہوں کہ قوم ان کے ساتھ کھڑی ہے ۔
انہوں نے کہا کہ مجھے یقین ہے کہ جن تین لوگوں کو نامزد کیا وہی مجھے قتل کرانے کی کوشش میں ملوث ہیں ، جے آئی ٹی رپورٹ میں ہے کہ ملزم نوید کی انسداد دہشت گردی عدالت میں پیشی کے وقت پانچ نامعلوم افراد عدالت میں موجود تھے۔
سابق وزیراعظم کا کہنا تھا کہ تحریک انصاف ملک کی سب سے بڑی جماعت ہے ، شہباز شریف ، ڈرٹی پیری، رانا ثناءاللہ کے باعث کیس کو کور اپ کرنے کی طاقت ہے تینوں کو خوف ہے کہ عمران خان اقتدار میں نہ آجائے ۔
ان کاکہنا تھا کہ سب جانتے ہیں کہ الیکشن کمیشن جانبدار ہے جس وقت فارن فنڈنگ اور توشہ خانہ کیس عدالت میں گئے دونوں فوری ختم ہوجائیں گے۔
دوسری جانب چیئرمین تحریک انصاف عمران خان نے آج سے انتخابی مہم کے آغاز کا فیصلہ کیا ہے ، عمران خان آج انتخابی مہم کے حوالے سے اہم خطاب کریں گے ، عمران خان کا خطاب لاہور سمیت پنجاب کے دیگر اضلاع میں بڑی سکرینوں پر دکھایا جائے گا۔

منڈی بہاؤ الدین:(ویب ڈیسک) منڈی بہاؤ الدین میں مقامی تاجر کی شادی کی تقریب کے دوران نوٹوں کی بارش کر دی گئی، باراتیوں میں موبائل فونز بھی تقسیم کیے گئے۔
شادی کی تقریب میں دولہا کے دوست اور عزیز و اقارب میرج ہال کی چھت سے کافی دیر تک نوٹ نچھاور کرتے رہے۔
فضا میں ہر طرف ملکی اور غیرملکی کرنسی نوٹ اڑتے دکھائی دیئے، لوگ نوٹ سمیٹنے کے لیے بانسوں پر جال لگا کر پہنچ گئے، شہری پیسے لوٹتے لوٹتے تھک گئے لیکن لوٹانے والے مسلسل نوٹ پھینکتے رہے۔
واضح رہے کہ مقامی تاجر کی بارات پھالیہ روڈ پر واقع میرج ہال میں ہوئی۔
یاد رہے کہ دو سال قبل بھی منڈی بہاؤ الدین کے علاقہ گوڑھا محلہ میں مقامی تاجر کے بیٹے کی شادی کی تقریب میں باراتیوں نے لاکھوں روپے نچھاور کئے تھے، باراتی میرج ہال کی چھت پر کھڑے ہو کر کافی دیر تک ملکی اور غیر ملکی نوٹ نچھاور کرتے رہے۔

گوجرانوالہ :(ویب ڈیسک) صوبہ پنجاب کے ضلع گوجرانوالہ میں دوران ڈکیتی خواتین کو زیادتی کا نشانہ بنانے والے 3 ملزمان مبینہ پولیس مقابلے کے دوران ہلاک ہو گئے، پولیس نے ذیشان ، عامر اور ساجد نامی ملزمان کو گزشتہ روز گرفتار کیا تھا۔
گوجرانوالہ پولیس کے مطابق لدھے والا وڑائچ پولیس ملزمان کو برآمدگی کے لئے لے جا رہی تھی کہ راستے میں ساتھیوں نے فائرنگ کر کے ملزمان کو پولیس حراست سے چھڑوالیا ، ملزمان اور ان کے ساتھیوں کا ہرپوکی کے قریب پولیس سے آمنا سامنا ہوا۔
پولیس نے بتایا کہ تینوں ملزمان اپنے ہی ساتھیوں کی فائرنگ سے ہلاک ہوئے جبکہ ان کی لاشوں کو ہسپتال منتقل کر دیا گیا ہے۔
یاد رہے کہ ہلاک ہونے والے تینوں ملزمان نے تھانہ اروپ، تتلے عالی اور لدھیوالہ وڑائچ میں ڈکیتی کی وارداتوں کے دوران خواتین کو زیادتی کا نشانہ بنایا جبکہ ملزمان نے 26 فروری کو اروپ میں دوران ڈکیتی ماں اور بیٹی کے ساتھ اجتماعی زیادتی کی تھی جس کا مقدمہ درج کروانے پر ملزمان نے دوبارہ متاثرہ لڑکی کو زیادتی کا نشانہ بنایا تھا۔
خیال رہے کہ گوجرانوالہ میں دوران ڈکیتی زیادتی کے واقعات پر نگران وزیر اعلیٰ پنجاب محسن نقوی نے نوٹس لیا تھا۔
محسن نقوی نے انسپکٹر جنرل ( آئی جی ) پنجاب پولیس سے رپورٹ طلب کرتے ہوئے واقعات میں ملوث ملزمان کے خلاف سخت قانونی کارروائی اور قرار واقعی سزا دلانے کی ہدایت کی تھی، وزیر اعلیٰ کا کہنا تھا کہ متاثرہ خواتین کو انصاف فراہم کرنا حکومت کی ذمہ داری ہے۔

واشنگٹن :(ویب ڈیسک) انسداد دہشت گردی کے حوالے سے پاک، امریکا 2 روزہ مذاکرات 6 مارچ سے شروع ہوں گے، مذاکرات میں سرحدی سکیورٹی پر بھی گفتگو ہو گی۔
ترجمان امریکی محکمہ خارجہ کے مطابق امریکی انٹر ایجنسی وفد اگلے ہفتے پاکستان کا دورہ کرے گا تاکہ دہشت گردی سے نمٹنے کے لئے مشترکہ حکمت عملی پر غور کیا جاسکے، امریکا کے قائم مقام کوآرڈینیٹر برائے انسداد دہشت گردی کرسٹو فر لینڈ برگ وفد کی قیادت کریں گے۔
ترجمان نے بتایا کہ پاک ، امریکا انسداد دہشت گردی مذاکرات 6 اور 7 مارچ کو ہوں گے، دونوں ممالک کے درمیان سرحدی سکیورٹی اور دہشت گردوں کی مالی مدد روکنے پر بھی تبادلہ خیال ہوگا۔
ترجمان نے مزید کہا کہ دونوں ممالک کا موقف ہے کہ افغان سرزمین پاکستان کے خلاف دہشت گردی کے لئے استعمال ہو رہی ہے، کابل کے ساتھ اسلام آباد کے تعلقات اسی لئے خراب ہوئے ہیں کہ طالبان حکومت دہشت گردوں کے خلاف کریک ڈاؤن نہیں کر رہی۔
خیال رہے کہ گزشتہ ماہ اقوام متحدہ کی ایک رپورٹ میں انکشاف کیا گیا تھا کہ طالبان افغانستان میں موجود دہشت گردوں کا مقابلہ کرنے میں ناکام ہوئے ہیں۔

لاہور:(ویب ڈیسک) ملک میں جاری بدترین معاشی بحران کے دوران چین نے پاکستان کے ساتھ مشکل وقت میں ایک مرتبہ پھر دوستی کا حق ادا کرتے ہوئے 50 کروڑ ڈالر دے دیئے۔
وفاقی وزیر خزانہ اسحاق ڈار نے اپنے آفیشل ٹویٹر اکاؤنٹ پر لکھا کہ سٹیٹ بینک آف پاکستان کو انڈسٹریل اینڈ کمرشل بینک آف چائنا لمیٹڈ (ICBC) سے 1.3 بلین ڈالر کی فنانسنگ سہولت میں سے 500 ملین ڈالر (50 کروڑ ڈالر) موصول ہو گئے ہیں، جس سے ملک کے زرمبادلہ کے ذخائر کو مضبوط کرنے میں مدد ملے گی۔
ٹویٹر پر پیغام میں انہوں نے لکھا کہ 1.3 بلین ڈالر کی فنانسنگ کے حوالے سے تمام رسمی کارروائیاں مکمل کر لی گئی ہیں اور چینی بینک نے رول اوور سہولت کی منظوری دے دی ہے، یہ رقم تین اقساط میں دی جائے گی، جس میں سے پہلی قسط مرکزی بینک کو موصول ہو چکی ہے۔
اس سے پہلے دن میں اسحاق ڈار نے کہا کہ ملکی معیشت کے لیے فنانسنگ بہت اہم ہے، جسے ادائیگی کے توازن کے بحران کا سامنا ہے، سٹیٹ بینک آف پاکستان (ایس بی پی) کے پاس موجود غیر ملکی ذخائر اس سطح پر گرے ہیں جو بمشکل تین ہفتوں کا احاطہ کر سکے۔
انہوں نے کہا کہ پاکستان کو رواں مالی سال، جو جون میں ختم ہو رہا ہے، اپنے مالیاتی فرق کو ختم کرنے کے لیے 5 بلین ڈالر کی بیرونی فنانسنگ کی ضرورت ہوگی۔

لاہور :(ویب ڈیسک) لاہور ہائیکورٹ کے احکامات پر پاکستان تحریک انصاف ( پی ٹی آئی ) کے وائس چیئرمین شاہ محمود قریشی اور سیکرٹری جنرل اسد عمر سمیت پارٹی کے 83 نظر بند رہنماؤں اور کارکنان کو رہا کر دیا گیا ، سابق گورنر پنجاب عمر سرفراز چیمہ ، سابق صوبائی وزیر مراد راس اور سینیٹر ولید اقبال بھی رہائی پانے والوں میں شامل ہیں۔
خیال رہے کہ گزشتہ روزلاہور ہائیکورٹ نے پی ٹی آئی کی ’ جیل بھرو تحریک ‘ میں گرفتار ہونے والے رہنماؤں کو رہا کرنے کا حکم دیا تھا۔
شاہ محمود قریشی اٹک جیل سے رہا
عدالتی حکم کے بعد شاہ محمود قریشی کو اٹک ڈسٹرکٹ جیل سے رہا کیا گیا، ان کے بیٹے اور سابق ممبر قومی اسمبلی ( ایم این اے ) زین قریشی، بیٹی مہربانو قریشی، میجر طاہر صادق، سید یاور بخاری، قاضی احمد اکبر اور دیگر رہنماؤں نے جیل کے باہر ان کا استقبال کیا اور پی ٹی آئی کے مقامی رہنماؤں اور کارکنوں نے ان پر پھولوں کی پتیاں نچھاور کیں۔
جیل سے رہائی کے بعد شاہ محمود قریشی کا کہنا تھا کہ تمام اسیران کو مبارکباد دیتا ہوں کسی نے گھٹنے نہیں ٹیکے، ہمارے حوصلے پست نہیں بلند ہوئے ہیں، سوچ سمجھ کر پاکستان کے آئین کے لئے گرفتاری دی اور آئین کی پاسداری کے لئے پی ٹی آئی نے نیا باب رقم کیا ہے، گرفتاری دے کر خوف کا بت توڑا ہے۔
انکا کہنا تھا کہ 90 روز میں انتخابات کرانے کا حکم عدلیہ کا سنہری فیصلہ ہے، پنجاب میں ہماری حکومت بنی تو جیل اصلاحات لائیں گے، عمران خان سے کہوں گا صرف وزیر اعظم نہیں بننا قوم بنانی ہے۔
اسد عمر راجن پور جیل سے رہا
ادھر پاکستان تحریک انصاف کے سیکرٹری جنرل اسد عمر کو راجن پور جیل سے رہا کیا گیا جہاں وہ گزشتہ دس روز سے نظر بند تھے، پی ٹی آئی رہنما عون عباس بپی سمیت راجن پور، روجھان، جام پور، ڈیرہ غازی خان سے پارٹی کارکنوں کی بڑی تعداد ان کے استقبال کے لیے جیل کے باہر موجود تھی، کارکنان نے پارٹی چیئرمین عمران خان کے حق میں نعرے بھی لگائے۔
اس موقع پر اسد عمر نے کہا کہ جیل جانے پر فخر ہے، بند کمروں میں ہونے والے فیصلے ختم ہونے جا رہے ہیں۔
سرفراز چیمہ بھکر جیل سے رہا
علاوہ ازیں پاکستان تحریک انصاف کے رہنما اور سابق گورنر پنجاب عمر سرفراز چیمہ کو ڈسٹرکٹ جیل بھکر سے رہا کیا گیا۔
عمر سرفراز چیمہ کو 22 فروری کو شروع کی گئی جیل بھرو تحریک کے پہلے دن لاہور سے گرفتار کر کے ڈسٹرکٹ جیل بھکر منتقل کر دیا گیا تھا، جیل سے رہائی پر پی ٹی آئی کے مقامی رہنماؤں اور کارکنوں نے ان کا استقبال کیا۔
زلفی بخاری شاہ پور جیل سے رہا
شاہ پور جیل سے زلفی بخاری، فیاض الحسن چوہان، اور صداقت اعوان سمیت دیگر رہنماؤں کو بھی رہا کر دیا گیا، پارٹی کے حامیوں کی بڑی تعداد ان کے استقبال کے لیے جیل کے باہر جمع ہوئی۔
اس موقع پر زلفی بخاری کا کہنا تھا کہ جیل بھرو تحریک شاندار کامیابی تھی، چیئرمین پی ٹی آئی عمران خان انتخابی مہم کا آغاز کریں گے اور وہ اس کا حصہ ہوں گے۔

اسلام آباد: (ویب ڈیسک) وزیر داخلہ رانا ثنا اللہ نے کہا ہے کہ عمران خان ایک الیکشن پر سنجیدہ ہیں تو ان سے بات ہو سکتی ہے۔
نجی ٹی وی سے گفتگو کرتے ہوئے وزیر داخلہ نے کہا کہ مخاطب سیاسی قوتیں نہیں کوئی اور ہے، سیاستدان ہیں تو سیاسی قوتوں سے بات کریں، جن سے بات چیت کے لیے مرے جا رہے ہیں وہاں سے جواب نہیں ملتا۔
رانا ثنااللہ نے کہا کہ ن لیگ انتخابات کے لیے تیار ہے، اب 2018ء والی فلم چلنے والی نہیں، مقبولیت کا بخار جلد اتر جائے گا۔
انہوں نے کہا کہ ریاستی اداروں کو ٹارگٹ کرنے والے کا ایجنڈا کسی سے ڈھکا چھپا نہیں، پاکستان میں سیاست کے لیے ریاست کا پابند ہونا پڑے گا۔
رانا ثنااللہ کا کہنا تھا کہ عدالتی فیصلہ پر ریویو کا ابھی فیصلہ نہیں ہوا، عمران خان اپنی حکومت کا ایک کارنامہ بتائیں۔

اسلام آباد: (ویب ڈیسک) سپیکر قومی اسمبلی راجہ پرویز اشرف نے کہا ہے کہ گالیوں اورمنفی پراپیگنڈے سے پیدا ہونے والی ملک میں ڈپریشن کی صورتحال کو بہتر بنانے میں تعلیم یافتہ طبقہ اپنا کردار ادا کر سکتا ہے، دعوے سے کہتا ہوں پاکستان کبھی دیوالیہ نہیں ہوگا۔
پاکستان میڈیکل ایسوسی ایشن (پی ایم اے) اسلام آباد کی سالانہ کانفرنس سے خطاب کرتے ہوئے سپیکر نے کہا کہ پی ایم ڈی سی کو بحال کرنے کا وعدہ پورا کر دیا ہے، نامزدگیاں جمہوریت کی روح کے منافی ہوتی ہیں، عوام کی خدمت وہی لوگ کر سکتے ہیں جن کا انتخاب عوام کرتی ہے۔
راجہ پرویز اشرف نے کہا کہ طب وہ عظیم شعبہ ہے جو انسانیت کی ہمہ وقت خدمت کے لئے اپنا ہر ممکن کردار ادا کرتا ہے اور ڈاکٹرز انسانی زندگیاں بچاتے ہیں، پی ایم اے ڈاکٹروں کی ایک مؤثر تنظیم ہے، پاکستان ہمارے سروں پر ایک چھتری کی طرح ہے، ہمیں اس کی قدر کرنی چاہئے، ہمارے آپس میں جتنے بھی اختلافات کیوں نہ ہوں ہمیں اس ملک سے محبت کے تقاضے پورے کرنے چاہئیں۔
سپیکر کا کہنا تھا کہ پاکستانی بڑے محنتی لوگ ہیں مگر یہاں سسٹم بہتر بنانے کی ضرورت ہے، ایسوسی ایشنز نہ صرف اپنے ارکان کا خیال رکھتی ہیں بلکہ ملک کی ترقی میں بھی معاون ثابت ہوتی ہیں، پی ایم ڈی سی کو بحال کرنے کا بلاول بھٹو زرداری نے جو وعدہ کیا تھا وہ ہم نے پورا کیا ہے۔
راجہ پرویز اشرف کا کہنا تھا کہ میڈیکل کے شعبے سے وابستہ لوگوں کا صحت مند رہنا اور ان کا ہر قسم کے ذہنی دباؤ سے آزاد رہنا بہت ضروری ہے، اس کے لیے ہم ان کے ساتھ مل کر کردار ادا کریں گے، ہمیں ہر قسم کے پروپیگنڈے سے دور رہنا چاہئے۔
انہوں نے کہا کہ بار بار یہ کہا جاتا ہے کہ ملک دیوالیہ ہو جائے گا، میں دعوے سے کہتا ہوں کہ پاکستان کبھی دیوالیہ نہیں ہو گا، ملک میں ڈپریشن کی صورتحال کو دور کرنے کی ضرورت ہے، یہ اسی صورت میں ممکن ہو گا جب ہم ملک کی اچھی اچھی باتیں عوام تک پہنچائیں گے۔