اسلام آباد: (ویب ڈیسک) امریکہ میں پاکستان کے سفیر مسعود خان نے وزیر خزانہ اسحاق ڈار سے اسلام آباد میں ملاقات کی جس میں پاکستان اور امریکہ کے درمیان دوطرفہ اقتصادی اور تجارتی تعلقات پر تبادلہ خیال کیا گیا۔
ملاقات میں سفیر مسعود خان نے کہا کہ امریکہ اور پاکستان کے درمیان دوستانہ تعلقات مزید مضبوط ہو رہے ہیں، وزیر خزانہ نے کہا کہ مسعود خان کے دور میں امریکہ کے ساتھ دوطرفہ تعاون مزید بڑھے گا۔
مزید برآں وزیر خزانہ اسحاق ڈار نے دونوں ممالک کے درمیان کاروباری تعاون کو مزید بڑھانے کیلئے کوششیں کرنے پر زور دیا اور سفیر مسعود خان کو اپنی مکمل حمایت اور تعاون کا یقین دلایا۔

اسلام آباد: (ویب ڈیسک) پاکستان بیورو آف سٹیٹسٹکس (پی بی ایس) نے عوام کی سہولت کے پیش نظر خودشماری کی آخری تاریخ میں ایک ہفتہ کی توسیع کر دی۔
ترجمان ادارہ شماریات کے مطابق خودشماری کی آخری تاریخ 3 مارچ تھی، جس میں ایک ہفتہ کی توسیع کر دی گئی ہے۔
ادارہ شماریات کے ترجمان نے بتایا کہ توسیع تمام صوبوں کے پُرزور اصرار پر کی گئی ہے۔

اسلام آباد: (ویب ڈیسک) ملک بھر میں جان بچانے والی ادویات سمیت کئی ادویات کی شدید قلت پیدا ہوگئی، وفاقی وزارت صحت کے حکام نے ڈرگ ریگولیٹری اتھارٹی آف پاکستان کو خط لکھ دیا۔
مارکیٹ میں عدم دستیاب ادویات زیادہ تر ملٹی نیشنل فارماسیوٹیکل کمپنیوں کی ہیں، اسلام آباد سمیت پورے ملک میں 131 ضروری ادویات میسر نہیں۔
وزارت صحت نے خط میں درخواست کی ہے کہ ادویات کی بلا تعطل سپلائی کے اقدامات کیے جائیں، اکثر ملٹی نیشنل کمپنیوں نے ادویات کی قیمتوں کے تنازعے پر پیداوار بند کر دی ہے۔
ڈریپ حکام کا کہنا ہے کہ ناپید ہونے والی اکثر ادویات کی قیمتوں میں اضافہ کیلئے ڈریپ نے سفارش کر رکھی ہے، ادویات کی کی عدم دستیابی کے معاملے کا بغور جائزہ لے رہے ہیں۔

اسلام آباد: (ویب ڈیسک) سپریم کورٹ اور ہائی کورٹس کیساتھ معزز کا لفظ لکھنا درست نہیں، جسٹس قاضی فائز عیسیٰ نے پانچ صفحات پر مشتمل تحریری فیصلہ جاری کر دیا۔
فیصلے کے مطابق دوران سماعت وکیل کی جانب سے بار بار معزز عدالت کا لفظ استعمال کیا گیا، آئین میں سپریم کورٹ اور ہائی کورٹ کیلئے معزز کا اعزازی لفظ نہیں لکھا گیا، مناسب ہوگا کہ اعلیٰ عدلیہ کیلئے آئین میں استعمال ہونے والی زبان ہی استعمال کی جائے۔
فیصلے میں کہا گیا کہ برطانیہ میں اعلیٰ عدلیہ کیساتھ معزز کا لفظ استعمال نہیں کیا گیا، اداروں کا نام لیتے ہوئے معزز کہنا درست نہیں، آئین میں قومی و صوبائی اسمبلیوں، سینیٹ کیلئے بھی معزز کا لفظ استعمال نہیں ہوا، معزز کا لفظ ججز کیساتھ استعمال ہوسکتا ہے کسی ادارے کیلئے نہیں۔
سپریم کورٹ آف پاکستان کی جانب سے یہ فیصلہ سٹیٹ لائف کے ملازم کی پنشن کے کیس میں دیا گیا۔

اسلام آباد / پشاور: (ویب ڈیسک) الیکشن کمیشن نے خیبرپختونخوا اسمبلی انتخابات کی تاریخ کے لیے گورنر کو خط لکھ دیا جس میں گورنر کو سپریم کورٹ کےفیصلے کی روشنی الیکشن کی تاریخ مانگی گئی ہے۔
الیکشن کمیشن آف پاکستان کی جانب سے گورنر خیبرپختونخوا حاجی غلام علی کو خط لکھ دیا جس میں سپریم کورٹ آف پاکستان کے فیصلے کا حوالہ دیا گیا ہے کہ خیبرپختونخوا اسمبلی کے انتخابات کے لیے گورنر الیکشن کی تاریخ دیں گے۔
خط میں گورنر کولکھا گیا کہ عدالتی فیصلے کی روشنی میں 90 روز کے اندر انتخابات کرانے ہیں جس کے لیے الیکشن کی تاریخ دی جائے تاکہ سپریم کورٹ کو انتخابات کی تاریخ کے حو الے سے آگاہ کیا جاسکے۔
واضح رہے کہ اس سے قبل الیکشن کمیشن کی سفارش پر صدر مملکت نے 30 اپریل کو پنجاب اسمبلی کے الیکشنز کروانے کی منظوری دی۔ یہ پیشرفت سپریم کورٹ کے از خود نوٹس کیس کے فیصلے کے بعد ہوئی ہے۔
الیکشن کمیشن نے سپریم کورٹ کے فیصلے کی روشنی میں صدر مملکت کو خط ارسال کیا تھا جس میں صوبہ پنجاب کے انتخابات کے انعقاد کے لیے 30اپریل سے 7مئی 2023 تک کی تاریخیں تجویز کی گئی تھی۔ الیکشن کمیشن کی تجویز کے مطابق صدر مملکت نے پولنگ ڈے کے لیے اتوار کے دن کی منظوری دی۔

سیالکوٹ: (ویب ڈیسک) تھانہ حاجی پورہ کے علاقہ اقبال ٹاؤن میں دوہرے قتل کی واردات ہوئی جس میں میاں بیوی جان کی بازی ہار گئے ہیں۔
مقتول محمود بٹ اور اس کی زوجہ صائمہ بازار سے سودا سلف لے کر گھر پہنچے تو انہیں قتل کر دیا، واقعہ سے متعلق مزید تفصیلات تاحال سامنے نہیں آ سکیں، مقتولین کی بیٹی فائرنگ کی آواز سن کر کمرے میں پہنچی تو دونوں کی نعشیں ڈارئنگ روم میں پڑی تھیں۔
واقعہ کی اطلاع ملتے ہی پولیس کی بھاری نفری جائے وقوعہ پر پہنچ گئی، پولیس نے نعشوں کو تحویل میں لے کر تفتیش کا آغاز کر دیا ہے۔

لاہور: (ویب ڈیسک) سابق وزیراعلیٰ پنجاب چودھری پرویز الہٰی نے کہا ہے کہ سپریم کورٹ نے جو فیصلہ کیا ہے صدر مملکت کا اقدام اس جانب پیشرفت ہے، تمام اداروں کا فرض ہے کہ اب الیکشن کیلئے ضروری تعاون کریں۔
اپنے ایک بیان میں سابق وزیراعلیٰ پنجاب چودھری پرویزالٰہی نے صدر مملکت کی جانب سے پنجاب میں الیکشن کی تاریخ مقرر کرنے کے اقدام کا خیر مقدم کرتے ہوئے کہا کہ صدر عارف علوی کی جانب سے تاریخ کا اعلان خوش آئند ہے۔
چودھری پرویزالٰہی کا مزید کہنا تھا کہ ملک کے مفاد میں ہے کہ الیکشن کا عمل شفاف انداز سے مکمل کیا جائے، صدر عارف علوی کی جانب سے تاریخ کے اعلان کے بعد اب سیاسی جماعتوں کو انتخاب کی تیاری کرنی چاہیے۔