اسلام آباد: (ویب ڈیسک) صدر مملکت ڈاکٹر عارف علوی نے پنجاب اسمبلی کے عام انتخابات 30 اپریل بروز اتوار کو کرانے کا اعلان کر دیا۔
صدر مملکت نے تاریخ کا اعلان الیکشن کمیشن کی جانب سے تجویز کردہ تاریخوں پر غور کرنے کے بعد کیا۔
الیکشن کمیشن نے 30 اپریل سے 7 مئی کے دوران پنجاب اسمبلی کے عام انتخابات کرانے کیلئے تاریخ تجویز کی تھی، الیکشن کمیشن نے انتخابات ترجیحاً اتوار کے روز کرانے کی تجویز بھی دی تھی۔
اس سے قبل الیکشن کمیشن کا اہم اجلاس سکندر سلطان راجہ چیف الیکشن کمشنر کی سربراہی میں ہوا، جس کے بعد الیکشن کمیشن کی جانب سے صدر مملکت کو خط ارسال کیا گیا، خط میں الیکشن کمیشن نے صوبہ پنجاب کے انتخابات کے انعقاد کے لئے 30 اپریل سے 7 مئی 2023 تک کی تاریخیں تجویز کیں۔
خط میں کہا گیا کہ صدر مملکت کی طرف سے تاریخ کے انتخاب کے بعد الیکشن کمیشن اپنے آئینی اور قانونی فرائض انجام دینے کے لئے تیار ہے۔

لاہور: (ویب ڈیسک) وفاقی تحقیقاتی ادارے (ایف آئی اے) کی عدالت نے فرح گوگی کے ناقابل ضمانت وارنٹ گرفتاری جاری کر دئیے۔
عدالت نے فرح گوگی کے ناقابل ضمانت وارنٹ گرفتاری منی لانڈرنگ کے مقدمہ میں شامل تفتیش نہ ہونے کی بنیاد پر ایف آئی اے کی درخواست پر جاری کیے۔
ایف آئی اے نے فرح گوگی کے خلاف منی لانڈرنگ کے ناقابل تردید ثبوت حاصل کر لیے ہیں، فرح گوگی نے کرپشن، رشوت ستانی اور غیر قانونی سیاسی اثر و رسوخ و دباؤ کے ذریعے اربوں روپے کمائے اور پھر منی لانڈرنگ کے ذریعے اثاثہ جات بنائے۔
فرح گوگی نے سرکاری افسران پر دباؤ کے ذریعے ٹھیکہ جات کے ٹینڈرز غیر قانونی طور پر ایوارڈ کروانے کی مد میں بھی کروڑوں روپے بطور رشوت لیے، تحقیقات کے دوران فرح گوگی کے نام پر اربوں روپے کے بینک اکاؤنٹ ملنے کا انکشاف ہوا۔

لاہور: (ویب ڈیسک) پاکستان تحریک انصاف (پی ٹی آئی) نے جیل بھرو تحریک میں پارٹی رہنماؤں کی نظر بندی اور گرفتاری لاہور ہائیکورٹ میں چیلنج کر دی۔
تحریک انصاف کے سینئر رہنما اور سابق وفاقی وزیر فواد چودھری نے پارٹی رہنماؤں کی نظربندی کے خلاف لاہور ہائیکورٹ میں درخواست دائر کی ہے۔
درخواست گزار کی جانب سے مؤقف اختیار کیا گیا ہے کہ جیل بھرو تحریک میں گرفتاری دینے والے رہنماؤں کو نظربند کر دیا گیا، نظربندیوں کے احکامات غیر قانونی طور پر جاری کئے گئے ہیں۔
درخواست میں استدعا کی گئی کہ لاہور ہائیکورٹ تحریک انصاف کے نظر بند ہونے والے رہنماؤں اور کارکنوں کو رہا کرنے کا حکم دے۔

لاہور : (ویب ڈیسک) الیکشن کمیشن نے پنجاب میں عام انتخابات کے لئے30اپریل اور 7مئی کی تاریخیں تجویز کردیں ۔
الیکشن کمیشن کا اہم اجلاس سکندر سلطان راجہ چیف الیکشن کمشنر کی سربراہی میں ہوا ، الیکشن کمیشن کی جانب سے صدر مملکت کو خط ارسال کردیا گیاہے۔
الیکشن کمیشن کی جانب سے جاری اعلامیے کے مطابق صوبہ پنجاب کے انتخابات کے انعقاد کے لئے مورخہ 30اپریل سے 7مئی 2023 تک کی تاریخیں تجویز کی ہیں۔
اعلامیے میں کہا گیا ہے کہ صدر مملکت کی طرف سے تاریخ کے انتخاب کے بعد الیکشن کمیشن اپنے آئینی اور قانونی فرائض انجام دینے کے لئے تیار ہے ۔
الیکشن کمیشن نے گورنر خیبر پختونخوا کو بھی مراسلہ بھیج دیا گیا ہے ، سپریم کورٹ کے احکامات کی روشنی میں گورنر خیبرپختونخوا کے جواب کے منتظر ہیں۔
پنجاب اسمبلی کے انتخابات کی تاریخ تجویز کرنے کے لیے صدر مملکت ڈاکٹر عارف علوی کو ارسال کیے گئے خط کی منظوری کے بعد پولنگ کا شیڈول جلد جاری کر دیا جائے گا۔
فواد چودھری کا ردعمل
پاکستان تحریک انصاف کے رہنما فواد چودھری نے الیکشن کمیشن کی جانب سے پنجاب میں انتخابات کی تاریخوں کی تجویز کو خوش آئند قرار دیا ہے۔
انتخابات کی تاریخوں کی تجویز پر ردعمل میں فواد چودھری کا کہنا تھا کہ یہ پنجاب، پاکستان کے عوام اور جمہوریت کی فتح ہے، الیکشن کمیشن نے سپریم کورٹ کے احکامات پر عملدرآمد کیا ہے، 14اپریل کو 90 دن کی مدت ختم ہورہی ہے، الیکشن کمیشن کہہ رہا ہے 30 اپریل سے 7 مئی کے درمیان الیکشن کروائیں۔
رہنما تحریک انصاف نے کہا اب صدر مملکت تاریخ منتخب کریں گے کہ کونسی تاریخ بہتر ہے، یہ پاکستان کے آئین کی کامیابی ہے، سپریم کورٹ کے احکامات پر عملدرآمد ہوا ہے، سمجھتا ہوں یہ خوش آئند بات ہے، الیکشن کمیشن نے اپنی ذمہ داری ادا کی ہے، الیکشن کے لئے ہماری تیاری پوری ہے۔

لاہور : (ویب ڈیسک) چئیرمین نیب کے مستعفی ہونے کے بعد ڈی جی نیب لاہور علی سرفراز کو عہدے سے ہٹا دیا گیا۔
ذرائع کے مطابق ڈی جی نیب لاہور کو عہدے سے ہٹا کر ان کی خدمات پنجاب حکومت کے سپرد کردی گئی ہیں۔
علی سرفراز کو چئیرمین پی اینڈ ڈی کے عہدے پر تعینات کیے جانے کا امکان ہے۔

اسلام آباد: (ویب ڈیسک) صدر مملکت عارف علوی نے ملک عبدالولی کاکڑ کو گورنر بلوچستان تعینات کرنے کی منظوری دے دی ۔
وفاقی حکومت کی جانب سے ملک کے سب سے بڑے صوبے بلوچستان کے گورنر کو بدلنے کا فیصلہ کرلیا گیا ، ملک ولی کاکڑ کا تعلق بی این پی مینگل سے ہے ۔
صدر مملکت نے تعیناتی آئین کے آرٹیکل 48 ایک اور 101 کے تحت وزیر اعظم کی ایڈوائس پر کی ۔
پی ڈی ایم نےگونربلوچستان کاعہدہ بی این پی مینگل کودینےکافیصلہ کیا تھا۔

پشاور : (ویب ڈیسک) پشاور ہائیکورٹ نے خیبرپختونخوا میں 16 اور 19 مارچ کو ہونے والے ضمنی انتخابات کا ملتوی کردیئے۔
پشاور ہائی کورٹ میں سپیکر قومی اسمبلی کے استعفوں کی منظوری کے خلاف اور ضمنی الیکشن ملتوی کرنے کے لئے دائر درخواستوں پر سماعت ہوئی، عدالت نے محفوظ فیصلہ سناتے ہوئے قومی اسمبلی کی نشستوں پر ضمنی انتخابات ملتوی کردیئے ۔
عدالت نے 16 اور 19 مارچ کو ہونے والے ضمنی انتخابات کا الیکشن شیڈول معطل کر دیا، فریقین کو نوٹس جاری کرتے ہوئے سماعت 7 مارچ تک ملتوی کردی ، عدالت نے سماعت کے دوران فیصلہ محفوظ کیا تھا ۔
واضح رہے کہ خیبرپختونخوا میں قومی اسمبلی کی 24 نشستوں پر ضمنی انتخابات ہونا تھے ۔

لاہور: (ویب ڈیسک) چیئرمین پاکستان تحریک انصاف اور سابق وزیر اعظم عمران خان کی جانب سے انتخابی مہم کا آغاز کر دیا گیا۔
چیئرمین پی ٹی آئی انتخابی مہم کی قیادت سنبھالنے کیلئے سڑکوں پر آنے کو تیار ہیں، ڈاکٹرز نے عمران خان کو سیاسی سرگرمیوں کے لئے گرین سگنل دے دیا ہے۔
سابق وزیراعظم پنجاب اور خیبرپختونخوا میں انتخابی جلسوں سے خطاب کریں گے، عمران خان براہ راست انتخابی جلسوں میں شریک ہوں گے، کل انتخابی مہم کیلئے اپنے سیاسی لائحہ عمل کا اعلان کریں گے۔
عمران خان نے خیبرپختونخوا اور پنجاب میں سیاسی قیادت کو انتخابی جلسوں کے شیڈول کی تیاری کی ہدایت جاری کر دی ہے۔
مہم کے آغاز کے حوالے سے عمران خان کا خطاب بڑی سکرینوں پر دکھانے کا فیصلہ کیا گیا ہے، جنوبی پنجاب کے اضلاع میں چیئرمین پی ٹی آئی کا خطاب بڑی سکرینوں پر دکھایا جائے گا۔
سابق وزیراعظم عمران خان کا خطاب شام 6 بجے دکھایا جائے گا، جنوبی پنجاب کے اضلاع میں بڑی سکرینوں پر خطاب دکھانے کے مقامات کا اعلان کر دیا گیا۔

اسلام آباد: (ویب ڈیسک) سابق وفاقی وزیر اور پاکستان تحریک انصاف ( پی ٹی آئی) کے سیکرٹری اطلاعات فواد چودھری کی اپنے بھائی فیصل چودھری ایڈووکیٹ سے گفتگو کی مبینہ آڈیو لیک ہوگئی ہے۔
منظر عام پر آنے والی مبینہ آڈیو لیک میں فواد چودھری اپنے بھائی فیصل چودھری سے بات کر رہے ہیں، جس میں ججز اور وکیل سے متعلق بات چیت کی گئی۔
مبینہ آڈیو میں بظاہر فواد چودھری لگنے والا شخص اپنے بھائی ( فیصل چودھری ) سے کہتے ہیں کہ اچھا ! میں نے کہا کہ ’سی جے‘ (چیف جسٹس) لاہور کہہ رہا ہے کہ میری کوئی جنرل بات کرائیں بندیال کے ساتھ۔
انہوں نے اپنے بھائی سے مزید کہا کہ دوسرا اپنا، مظاہر کے ساتھ ڈار صاحب کے ذریعے، ان کو زرا مل لیں، اُن سے کہیں کہ آپ کے ساتھ پورا ٹرک کھڑا ہے، آپ بتائیں کیا کریں؟
فواد چودھری نے فیصل چودھری ایڈووکیٹ سے کہا کہ میری ذاتی تجویز یہ ہے کہ تارڑ پر تین چار جگہ استغاثہ کرائیں اور اس پر 228 لگوا کر اسے سزا دلوائیں تاکہ ان پر پریشر تو آئے۔
جس پر فواد چودھری کے بھائی فیصل چودھری نے کہا کہ میں صبح کرلیتا ہوں، فواد چودھری نے کہا کہ صبح ان سے پوچھ کر مجھے بتانا، جس پر فیصل چودھری نے کہا کہ ٹھیک ہے۔
فواد چودھری کا ردعمل
مبینہ آڈیو لیک پر سابق وفاقی وزیر اور پی ٹی آئی رہنما فواد چودھری نے ردعمل دیتے ہوئے کہا ہے کہ ایک اور جعلی آڈیو میرے نام سے مارکیٹ میں پھینک دی گئی ہے،اس آڈیو کا مجھ سے کوئی تعلق نہیں۔

اسلام آباد: (ویب ڈیسک) چیئرمین پاکستان تحریک انصاف اور سابق وزیراعظم عمران خان کی 9 مارچ کو پیشی کیلئے رجسٹرار آفس اسلام آباد ہائیکورٹ نے سکیورٹی اور دیگر ایس او پیز کا نوٹیفکیشن جاری کر دیا۔
نوٹیفکیشن کے مطابق چیف جسٹس اسلام آباد کے کمرہ عدالت میں انٹری پاس کے ذریعے داخلے کی اجازت ہوگی، اسلام آباد انتظامیہ اور پولیس کو سکیورٹی انتظامات کرنے کی ہدایت کر دی گئی ہے۔
سابق وزیراعظم عمران خان کے وکلاء کو 15 ناموں کی لسٹ مہیا کرنے کی ہدایت کی گئی ہے جبکہ اٹارنی جنرل آفس اور ایڈووکیٹ جنرل اسلام آباد کو 5، 5 ناموں کی لسٹ دینے کا کہا گیا ہے۔
اسلام آباد ہائیکورٹ جرنلسٹ ایسوسی ایشن کو 30 صحافیوں کی لسٹ دینے کی ہدایت کی گئی ہے، سرکلر میں 8 مارچ سہ پہر 3 بجے سے پہلے تمام متعلقہ افراد کی لسٹ دینے کا کہا گیا ہے۔