لاہور: (ویب ڈیسک) آسٹریلیا کے مایہ ناز بلے باز ڈیوڈ وارنر نے پی ایس ایل میں شرکت کی خواہش ظاہر کردی۔
راشد خان نے لاہور قلندرز کی جیت کا جشن مناتے ہوئے سوشل میڈیا پر اپنے پیغام میں لکھا کہ کیا شاندار کھیل ہوا، بھرپور سپورٹ کرنے والے کراؤڈ کا شکریہ، ڈیوڈ وارنر نے جواب دیا کہ میں کب کھیل سکتا ہوں۔
یاد رہے کہ گزشتہ سال دورہ پاکستان میں بھی ڈیوڈ وارنر نے کہا تھا کہ پی ایس ایل میں شرکت کرنا چاہتا ہوں مگر انٹرنیشنل مصروفیات آڑے آجاتی ہیں۔

لاہور: (ویب ڈیسک) پاکستان سپر لیگ (پی ایس ایل) 8 میں لاہور قلندرز اور ملتان سلطانز کا ہائی وولٹیج ٹاکرا آج ہوگا جبکہ میزبان ٹیم فتوحات کا تسلسل برقرار رکھنے کیلئے پرعزم ہے۔
پی ایس ایل 8 میں لاہور قلندرز آج مجموعی طور پر پانچویں اور ہوم گراؤنڈ پر مسلسل چوتھی فتح کا عزم لیے میدان میں اتریں گے، ابھی تک ایونٹ کی کامیاب ترین ٹیم نے 6 میں سے 5 میچز جیتے ہیں، کپتان شاہین شاہ آفریدی کو جارح مزاج اوپنرز فخرزمان اور طاہر بیگ کی خدمات حاصل ہیں۔
عبداللہ شفیق، سیم بلنگز اور حسین طلعت بھی چھکے چھڑانے کی صلاحیت رکھتے ہیں، یہ سب کوئٹہ گلیڈی ایٹرز کیخلاف بڑی اننگز کھیلنے میں ناکامی کا ازالہ کرنے کی کوشش کریں گے، مشکل وقت میں ناقابل شکست 71 رنز بنانے سے سکندر رضا کا اعتماد بلندیوں کو چھو رہا ہے۔
ڈیوڈ ویزا اور راشد خان بھی سکور میں تیزی سے اضافہ کرنے کی صلاحیت رکھتے ہیں، گزشتہ میچز میں زبردست کارکردگی کا مظاہرہ کرنے والی باؤلنگ لائن میں شاہین شاہ آفریدی، حارث رؤف، زمان خان اور ڈیوڈ ویزا موجود ہیں، ان میں سے کسی ایک کی کارکردگی میں کمی آئی تو دوسروں نے چیلنج قبول کیا، راشد خان اور سکندر رضا کی سپن کا جادو بھی چل رہا ہے۔
ملتان سلطانز نے 6 میں سے 4 میچز جیتے ہیں، افتتاحی میچ میں ہوم گراؤنڈ پر لاہور قلندرز کے ہاتھوں مات ہوئی، دوسری شکست گذشتہ میچ میں کراچی کنگز نے دی، اوپنرز محمد رضوان اور شان مسعود تو اچھی فارم میں ہیں، مڈل آرڈر میں رائیلی روسو، ڈیوڈ ملر اور خوشدل شاہ کی ناکامی کے سبب پوری ٹیم 101رنز پر ڈھیر ہو گئی تھی۔
ملتان سلطانز کو ٹاپ آرڈر سے بہتر بیٹنگ کی توقع ہے، لاہور قلندرز کی مضبوط باؤلنگ لائن کیخلاف ذمہ دارانہ کھیل کی ضرورت ہو گی، پیسر احسان اللہ کی کارکردگی میں تسلسل ہے، عباس آفریدی، انورعلی اور کارلوس بریتھ ویٹ کو بھی ان کا ساتھ دینا ہو گا، سپن کے شعبے میں اسامہ میر متاثر کر رہے ہیں، عقیل حسین ابھی تک توقعات پر پورا نہیں اترسکے۔

ایتھنز : (ویب ڈیسک) یونان میں ٹرین حادثے میں57 افرادکی ہلاکت کے خلاف ملک بھر میں مظاہرے جاری ہیں۔
غیر ملکی میڈیا کے مطابق دارالحکومت ایتھنز سمیت ملک بھر میں ہزاروں افراد انصاف کی فراہمی کے لیے سڑکوں پر نکل آئے اور حکومتی بدانتظامی کے خلاف شدید احتجاج کیا، مختلف شہروں میں پولیس اور مظاہرین کے دوران جھڑپیں بھی ہوئیں۔
مظاہرین کا کہنا تھا کہ یہ حادثہ نہیں جرم ہے، اس پر خاموش نہیں رہ سکتے ، ذمہ دار افراد کے خلاف سخت کارروائی کی جائے۔
یونان کی حکومت نے ملکی تاریخ کے سب سے مہلک ٹرین حادثے کے بعد تین روزہ قومی سوگ کا اعلان کررکھا ہے۔
یونانی وزیر ٹرانسپورٹ نے حادثے کی ذمہ داری قبول کرتے ہوئے اپنے عہدے سے بھی استعفی دے دیا ہے ، یونانی وزیراعظم نے بھی جائے حادثہ کے دورے میں کہا کہ حادثہ بظاہر انسانی غلطی سے پیش آیا ہے۔
واضح رہے کہ بدھ کو یونانی دارالحکومت ایتھنز اور تھیسالونیکی کے درمیان واقع شہر لاریسا کےقریب مسافر اور مال بردار ٹرین کی ٹکر کے نتیجے میں مسافر ٹرین کی 4 بوگیاں پٹری سے اتر گئی تھیں جبکہ 2 بوگیوں میں آگ لگی تھی ، مسافر ٹرین میں تقریباً 350 مسافر سوار تھے۔

جکارتہ : (ویب ڈیسک) انڈونیشیا کے دارالحکومت جکارتہ میں تیل کے گودام میں اچانک آگ بھڑکنے سے 17 افراد جھلس کر ہلاک جبکہ 40 سے زائد زخمی ہوگئے۔
ریسکیو حکام کے مطابق آگ رات 8 بجے جکارتہ کے ایک گنجان آباد علاقے میں موجود تیل کے گودام میں لگی ، جس کے فوری بعد ہونے والے دھماکوں کے باعث آگ گرد و نواح کے رہائشی علاقوں تک پھیلنا شروع ہوگئی ، حکام نے ہزاروں کی تعداد میں موجود قریبی آبادی کو خالی کروادیا۔
حکام کا کہنا ہے کہ سرکاری تیل اور گیس کمپنی پرٹامینا کے زیر انتظام شمالی جکارتہ کے علاقے تانا میرا کےگنجان آباد علاقے میں موجود پلمپنگ فیول اسٹوریج اسٹیشن سے انڈونیشیا کی ضروریات کا 25 فیصد ایندھن سپلائی کیا جاتا ہے۔
ریسکیو حکام کے مطابق 260 سے زائد فائر فائٹرز اور 52 فائر بریگیڈ کی گاڑیاں آگ پر قابو پانے کی کوششوں میں مصروف ہیں، آگ لگنے کے واقعے میں 2 بچوں سمیت 17 افراد جھلس کر ہلاک ہو ئے جبکہ 50 زخمیوں کو ہسپتال منتقل کردیا گیا۔
حکام کا مزید کہنا ہے کہ ابتدائی تحقیقات کے مطابق بارشوں کے دوران بجلی گرنے سے پائپ لائن پھٹنے کے باعث گودام میں آگ بھڑکنے کا واقعہ پیش آیا، گودام میں آگ لگنے سے ملک میں ایندھن کی سپلائی متاثر نہیں ہوگی۔