لاہور: (ویب ڈیسک) ملک بھر میں آج رحمتوں اور برکتوں والی رات شبِ معراج عقیدت و احترام کے ساتھ منائی جائے گی۔
سرِ لامکاں سے طلب ہوئی
سوئے منتہی وہ چلے نبی
کوئی حد نہ ان کے عروج کی
بلغ العلیٰ بکمالہ
27 رجب المرجب کی شب حضرت محمد صلی اللہ علیہ وآلہ وسلم کو معراج کا شرف عطا کیا گیا، جب حضرت جبرائیل براق لے کر نبی آخرالزماں کی خدمت میں حاضر ہوئے اور عرض کی اے اللہ کے رسولﷺ ، آپ کا رب آپ سے ملاقات چاہتا ہے، حضور اکرم صلی اللہ علیہ وآلہ وسلم براق پر سوار ہوئے۔
اس مقدس سفر کے دوران آپﷺ مکہ سے مسجد اقصیٰ گئے اور وہاں تمام انبیائے کرام کی نماز کی امامت فرمائی، پھر آپ کو آسمانوں میں اللہ تعالیٰ سے ملاقات کرانے کے لئے لے جایا گیا، وہاں رسول اکرمﷺ کو جنت اور دوزخ بھی دکھائی گئی، آپﷺ کی ملاقات مختلف انبیائے کرام سے بھی کرائی گئی، اسی سفر میں نماز بھی فرض ہوئی۔
شب معراج کے موقع پر ملک بھر میں مساجد کو انتہائی خوبصورتی سے سجایا جاتا ہے، آج رات مساجد میں خصوصی محافل اور عبادات کا اہتمام کیا جاتا ہے، لوگ نوافل ادا کرتے ہیں اور دعائیں مانگتے ہیں، علمائے کرام واقعہ معراج اور اس کی فضلیت پر روشنی ڈالتے ہیں۔

اسلام آباد : (ویب ڈیسک) سابق صدر آصف علی زرداری کیخلاف عمران خان کے قتل کی سازش سے متعلق کیس میں عدالت نے شیخ رشید پر فردجرم عائد کرنے کیلئے 2مارچ کی تاریخ مقرر کردی۔
سابق صدر آصف علی زرداری کیخلاف عمران خان کے قتل کی سازش سے متعلق کیس کی سماعت جوڈیشل مجسٹریٹ عمر شبیر نے کی ، اسلام آباد پولیس نے سابق وزیر داخلہ شیخ رشید کیخلاف چالان پیش کردیا۔
جوڈیشل مجسٹریٹ نے تھانہ آبپارہ کے ایس ایچ او کیخلاف اندراج مقدمہ کی درخواست واپس کردی ، جوڈیشل مجسٹریٹ نے کہا کہ یہ درخواست سیشن جج کی عدالت میں جمع کرائیں ،میرا اختیار نہیں ہے ، عدالت نے شیخ رشید پر فرد جرم عائد کرنے کیلئے 2مارچ کی تاریخ مقرر کردی ۔
دوران سماعت شیخ رشید نے عدالت سے استدعا کی کہ ایک کانفرنس میں شریک ہونا ہے ، پندرہ مارچ کی تاریخ دے دیں ، جس پر عدالت نے ریمارکس دیے کہ ہائیکورٹ کے آرڈرز ہیں ، چالان آگیا ہے ،لمبی تاریخ نہیں دے سکتے ، عدالت ٹرائل شروع ہوجائے تو پھر دیکھ لیں گے ۔

شکار پور : (ویب ڈیسک) شکارپور پولیس نے ٹاؤن رستم کے قریب چمن پل لنک روڈ پر خفیہ اطلاع پر کارروائی کے دوران 30 ، 30 لاکھ انعام یافتہ دو بدنام زمانہ ڈاکو سکندر معرفانی اور اصغر مارفانی کو گرفتارکرلیا جبکہ ملزمان کے قبضے سے اسلحہ بھی برآمد کیا گیا ہے۔
سینئر سپرنٹنڈنٹ پولیس آفیسر ( ایس ایس پی ) شکار پور فیضان علی کے مطابق کارروائی کے دوران گرفتار کئے جانے والے ڈاکو ڈکیتی، قتل ، اغوا برائے تاوان، لوٹ مار، رہزنی اور قبائلی تصادم سمیت سنگین 28 مقدمات میں مطلوب تھے جبکہ حکومت سندھ کے جانب سے ملزمان کے سر کی قیمت 30 ، 30 لاکھ مقرر کی گئی تھی۔
فیضان علی نے بتایا کہ بدنام زمانہ ڈاکو سکندر معرفانی اور اصغر معرفانی پر 14 ، 14 مقدمات درج ہیں جبکہ دونوں ڈاکو ضلع میں دہشت کی علامت تھے ، ملزمان کا مزید کریمنل ریکارڈ دیگر اضلاع سے بھی طلب کرلیا گیا ہے۔
انہوں نے مزید بتایا کہ ملزمان کو گرفتاری کے بعد نامعلوم مقام پر منتقل کر کے مزید تفتیش کا آغاز کر دیا گیا ہے۔

جہلم : (ویب ڈیسک) سوہاوہ میں دو گروپوں کے درمیان معمولی تلخ کلامی پر جھگڑے کے دوران فائرنگ کے نتیجے میں چار افراد زخمی ہوگئے، تین شدید زخمی افراد کو راولپنڈی ریفر کر دیا گیا ہے۔
جہلم پولیس کے مطابق جہپم، پختون گروپوں کے درمیان تندور کے سامنے تندور لگانے پر جھگڑا ہوا ، جھگڑے کے دوران فائرنگ کے نتیجے میں 4 افراد زخمی ہوگئے جنہیں طبی امداد کے لئے ہسپتال منتقل کر دیا گیا ہے
پولیس نے بتایا کہ پولیس تھانہ سوہاوہ اور ایلیٹ فورس نے اطلاع ملنے پر موقع پر پہنچ کر متعدد افراد کو گرفتار کر لیا ہے۔
دوسری جانب ذرائع کا کہنا ہے کہ دونوں گروپوں کے درجنوں افراد ہسپتال کے باہرجمع ہیں جبکہ جہلم پولیس نے مزید نفری طلب کر لی ہے اور کسی بھی ناخوشگوار واقعہ سے نمٹنے کے لیے ایلیٹ فورس تیار ہے۔

چشتیاں : (ویب ڈیسک) چشتیاں میں دوستوں نے اپنے ہی دوست کی جان لے لی، دو ملزمان نے کھانے کی دعوت پر بلا کر دوست کو قتل کردیا۔
چشتیاں پولیس کے مطابق مقتول ساجد کی 15سال سے ملزمان عثمان اورعدنان سے دوستی تھی ، دونوں دوستوں نے کھانے پر بلاکر اپنے دوست ساجد کو تشدد کا نشانہ بنایا، مقتول صدمہ ضربات کی وجہ سے ہسپتال میں دم توڑ گیا۔
پولیس نے بتایا کہ مقتول ساجد 3 بچوں کا باپ تھا، ساجد کی لاش پوسٹ مارٹم کے بعد ورثاء کے حوالےکردی گئی ہے جبکہ ملزمان موقع سے فرار ہوگئے ہیں جن کی تلاش جاری ہے۔
پولیس نے مزید بتایا کہ مقتول کے بھائی کی مدعیت میں دونوں ملزمان کے خلاف مقدمہ درج کر لیا گیا۔