لاہور: (ویب ڈیسک) سپریم کورٹ کی خالی نشستوں پر تقرری کے لیےجسٹس منصور علی شاہ اور جسٹس سردار طارق مسعود نے خط لکھ دیا۔
سپریم کورٹ میں خالی نشتوں پر ججز کی تقرری سے متعلق جسٹس منصور علی شاہ اور جسٹس سردار طارق مسعود نے چیف جسٹس آف پاکستان کو خط لکھ دیا ۔ خط میں جوڈیشل کمیشن کا فوری اجلاس بلانے کا مطالبہ کیا گیا ہے ۔
خط میں کہا گیا ہے کہ مزید افواہوں اور قیاس آرائیوں سے بچنے کیلئے جوڈیشل کمیشن کا اجلاس بلایا جائے ۔ نو ماہ گزر جانے کے باوجود پانچ خالی نشستیں پُر نہیں کی جاسکیں ۔ رولز کے مطابق جج کی ریٹائرمنٹ کے بعد30 دن کے اندر نیا جج لگانا لازمی ہے ۔
خط میں کہا گیا ہے کہ ہماری رائے میں نئے ججز کیلئے ہائیکورٹس کے چیف جسٹسز کے ناموں پر غور کیا جائے ۔ دوسری رائے یہ ہے کہ ہر ہائیکورٹ کے دو سینیئر ججز کے ناموں پر غور کیا جائے۔
جج صاحبان نے خط میں مزید کہا ہے کہ سینیئر جج جسٹس قاضی فائز عیسیٰ بھی اٹھائیس ستمبر کو اجلاس بلانے کیلئے خط لکھ چکے ہیں۔ جوڈیشل کمیشن سپریم کورٹ نہیں ہے بلکہ ایک آزاد آئینی باڈی ہے۔

چلاس: (ویب ڈیسک) چلاس میں المناک حادثہ، بوسیدہ مکان کی چھت گرنے سے ماں اور 8 بچے جاں بحق ہو گئے۔
تفصیلات کے مطابق بوسیدہ مکان کی چھت گرنے کا واقع چلاس کے علاقے بونر داس میں پیش آیا جس میں ایک ہی خاندان کے 9 افراد جاں بحق ہو گئے۔
پولیس کا کہنا ہے کہ جاں بحق افراد میں ماں، 4 بیٹے اور 4 بیٹیاں شامل ہیں، تمام نعشیں ملبے سے نکال لی گئی ہیں۔

لاہور: (ویب ڈیسک) وزیراعلیٰ پنجاب چودھری پرویز الہٰی نے چیف سیکرٹری پنجاب کامران علی افضل کی مزید 30 یوم کی رخصت منظور کر لی۔
چیف سیکرٹری پنجاب کامران علی افضل نے چھٹی مکمل ہونے کے باوجود کام کرنے سے انکار کردیا اور تیسری بار 30 روز کی چھٹی کی درخواست دی، وزیراعلیٰ پنجاب نے رخصت منظور کرلی جس کا محکمہ سروسز اینڈ جنرل ایڈمنسٹریشن ڈیپارٹمنٹ نے نوٹیفکیشن جاری کر دیا ہے۔
نوٹیفکیشن کے مطابق چیف سیکرٹری پنجاب 8 اکتوبر سے 6 نومبر تک رخصت پر ہوں گے، مزید 30 روز کے لئے چیئرمین محکمہ ترقیاتی امور اور منصوبہ بندی عبداللہ سنبل کو قائم مقام چیف سیکرٹری کے طورپر کام جاری رکھنے کا حکم دیا گیا ہے۔
یاد رہے کہ 6 اگست کو کامران علی افضل نے پنجاب میں بطور چیف سیکرٹری کام کرنے سے انکار کر دیا تھا۔

اسلام آباد: (ویب ڈیسک) قومی ادارہ صحت (این آئی ایچ) نے کہا ہے کہ گزشتہ 24 گھنٹوں کے دوران ملک بھر میں 10 ہزار 876 کورونا ٹیسٹ کئے گئے ہیں۔
این آئی ایچ کی جانب سے جاری کردہ اعداد و شمار کے مطابق گزشتہ 24 گھنٹوں کے دوران 10 ہزار 876 کورونا ٹیسٹ کئے گئے جن میں سے 54 افراد کے کورونا ٹیسٹ مثبت آئے ہیں۔
اس طرح گزشتہ 24 گھنٹوں میں کئے گئے مثبت کورونا ٹیسٹ کی شرح 0.50 فیصد رہی ہے، مزید برآں اس دوران کورونا وائرس سے کوئی بھی مریض جاں بحق نہیں ہوا جبکہ 36 مریضوں کی حالت تشویشناک ہے۔

سوات: (ویب ڈیسک) سی ٹی ڈی مالاکنڈ ریجن اور سکیورٹی فورسز کی سوات میں مشترکہ کارروائی، دومبینہ دہشت گرد ہلاک ہوگئے ہیں، اسلحہ بھی برآمد کیا گیا ہے۔
سی ٹی ڈی مالاکنڈ ریجن کے مطابق مارے جانے والے شدت پسند سوات کے علاقے انگرو ڈھیرئی کے ایک مکان میں دہشت گردی کی منصوبہ بندی کر رہے تھے،اطلاع ملنے پرسکیورٹی فورسزاور سی ٹی ڈی اہلکاروں نے مشترکہ طور پر کارروائی کی، چھاپے کے دوران فائرنگ کے نتیجے میں شدت پسند علی سید اور اس کا بیٹا موقع پر ہی ہلاک ہوگئے۔
کائونٹر ٹیراازم ڈیپارٹمنٹ کا کہنا ہے کہ مرنے والے دہشت گرد افغانستان میں دہشت گردوں سے رابطے میں تھے، فائرنگ کے تبادلے میں ایک سکیورٹی آفیسر سمیت تین سپاہی بھی زخمی ہوئے، ہلاک ہونے والے شدت پسند ٹی ٹی پی سوات کے کمانڈر نوید اور مراد کے ساتھی تھے، دہشت گردوں نے افغانستان میں آئی ای ڈی بنانے کی تربیت بھی حاصل کر رکھی تھی۔

لاہور: (ویب ڈیسک) پاکستان بھر میں آج جشن آمد رسول صلی اللہ علیہ وآلہ وسلم عقیدت و احترام کے ساتھ منایا جا رہا ہے، شہر شہر چراغاں، مسجدوں، گھروں اور عمارتوں کو برقی قمقموں سے سجا دیا گیا۔
دن کے آغاز پر وفاقی دارالحکومت میں 31 اور صوبائی دارالحکومتوں میں21 ، 21 توپوں کی سلامی دی گئی، عید میلاد النبیﷺ پر ملک بھر میں محافل سماع کا بھی اہتمام کیا جارہا ہے، ملک بھر کے تمام چھوٹے بڑے شہروں قصبوں اور دیہات میں عید میلاد النبیﷺ کے جلوس برآمد ہوں گے، محافل درود و سلام منعقد ہوں گی اور پیغمبرِ امنﷺ کا پیغام گھر گھر پہنچایا جائے گا۔

اسلام آباد: (ویب ڈیسک) خاتم النبیین حضرت محمد مصطفیؐ کا یوم ولادت آج اتوار کو انتہائی مذہبی عقیدت و احترام سے منایا جائے گا، جشن عید میلادالنبیؐ کے موقع پر وزارت مذہبی امور نے دو روزہ بین الاقوامی سیرت النبیؐ کانفرنس کا اہتمام کیا ہے جس کا آغاز ہفتہ کو ہو گیا ہے، رواں سال کانفرنس کا موضوع ”معاشرے کی اخلاقیات کی اصلاح اور تربیت سیرت طیبہ کی روشنی میں ” رکھا گیا ہے ۔
ربیع الاول کا ماہ مبارک تمام مسلمانوں کے لئے بڑی اہمیت کا حامل ہے۔ اس موضوع پر ملک کے نامور اہل علم حضرات 12 ربیع الاول کوبین الاقوامی سیرت النبی ؐکانفرنس میں اپنے خیالات کا اظہار بھی فرمائیں گے اور بتائیں گے کہ کیسے تعلیمات نبویؐ کی روشنی میں ہم اعلی اخلاقی قدروں کو پھر سے معاشرے میں پیدا کرسکتے ہیں۔اس ماہ مبارک میں ہمارے پیارے نبی حضرت محمد ؐاس دنیا میں تشریف لائے۔
اس سال وزارت مذہبی امور وبین المذاہب ہم آہنگی کی جانب سے47ویں دو روزہ بین الاقوامی سیرت النبیؐ کانفرنس کا انعقاد اس ماہ مبارک کی اہمیت کو اجاگر کرنے کی ایک کاوش ہے۔
وزارت مذہبی امور کی یہ بھی کوشش ہے کہ ملک کے اندرونی حالات کے پیش نظر مذہبی ہم آہنگی و رواداری ، اخوت و مساوات، احترام انسانیت ، عدم تشدد ، اتحاد واتفاق ،مفاہمتی عمل اور ڈائیلاگ کے کلچر پر مبنی تعلیمات کو زیادہ سے زیادہ فروغ دیا جائے۔
عید میلادالنبیؐ کو شایان شان اور عقیدت و احترام سے منانے کے لئے سرکاری اور نجی سطح پر تیاریوںکا سلسلہ یکم ربیع الاول کے آغاز سے ہی کر دیا گیا ہے،
ہر سال کی طرح اس مرتبہ بھی سرکاری اور نجی سطح پر خصوصی تقریبات کا انعقاد کیا جارہا ہے اور ان تقریبات کے سلسلے میں وفاقی دارالحکومت اسلام آباد سمیت ملک بھر میں حضور نبی پاکؐ کے یوم ولادت کے موقع پر نبی کریمؐ کو بھر پور انداز میں خراج عقیدت پیش کرنے کے لئے خصوصی انتظامات کئے گئے ہیں۔
قومی سیرت کانفرنس میں ملک کے ممتاز مذہبی سکالرز ، سیاسی قائدین، اراکین پارلیمنٹ، سفارتکار اور دیگر اہم شخصیات شرکت کریں گی۔
صوبائی، ڈویژنل اور ضلعی سطح پر سیرت کانفرنسوں اور میلادالنبیؐ کے جلوسوں کا اہتمام کیا جائے گا۔ رواں سال بھی وزارت مذہبی امور کی طرف سے سرکار دوعالم ۖ کی سیرت طیبہ اور حیات طیبہ کے مختلف پہلوئوں کو اجاگر کرنے کے لئے کتب سیرت ، کتب نعت ، مقالات سیرت اور خواتین کے لئے مذہبی کتب کے مقابلے منعقد کئے گئے ہیں ۔
دنیا بھر میں پاکستانی سفارتخانوں اور فارن مشنز میں بھی سیرت طیبہ کے مختلف پہلوئوں کو ا جاگر کرنے کے لئے سیرت کانفرنسز کا انعقاد کیا جائے گا۔
قومی اور صوبائی سطح پر تمام تعلیمی اداروں میں سیرت النبیؐ کانفرنسز منعقد ہوں گی، اسی طرح سیرت طیبہ کے حوالے سے نعت خوانی اور تقاریر کے مقابلے ہوں گے ۔
بچوں میں سیرت کے حوالے سے ذوق و شوق پیدا کرنے کے لئے سیرت کوئز منعقد ہوں گے اور اس موقع پر ملک کی ترقی اور خوشحالی کے لئے خصوصی دعائیہ تقاریب بھی منعقد ہوں گی ۔ نجی سطح پر میلادالنبی ؐکے جلوس نکالے جائیں گے۔
ملک بھر میں سرکاری اور نجی عمارتوں پر چراغاں ہوگا ، گھر ، گلیاں اور بازار سجائے جائیں گے ۔ 12ربیع الاول کو وفاقی دارالحکومت میں 31 اور صوبائی دارالحکومتوں میں21 ، 21 توپوں کی سلامی دی جائے گی۔ آپ ۖ کے یوم ولادت کے موقع پر سکولوں ، کالجوں میں یتیموں ، بیوائوں ، بے گھر افراداور خصوصی افراد میں کھانے اور مٹھائیاں تقسیم کی جائیں گی ۔
ٹی وی چینلز نے بھی اس سلسلے میں اپنے معمول کے پروگراموں کی بجائے حضور نبی پاک ؐ کی تعلیمات کو اجاگر کرنے کے لئے پروگرام ترتیب دیئے ہیں جبکہ اخبارات میں خصوصی ایڈیشن شائع ہوں گے ۔ عیدمیلاد النبی ؐپر ملک بھر میں محافل سماع کا بھی اہتمام کیا جارہا ہے۔
ملک بھر کے تمام چھوٹے بڑے شہروں قصبوں اور دیہات میں عید میلاد النبی کے جلوسوں اور مساجد میں خصوصی محا فل میلاد کی سیکورٹی کے لئے خصوصی انتظامات اور ٹریفک پلانز جاری کئے گئے ہیں۔

اسلام آباد: (ویب ڈیسک) وزیراعظم شہباز شریف نے 12 ربیع الاول پر جاری پیغام میں کہا ہے کہ حضرت محمد ﷺ نے اپنی ارفع اور پاکیزہ تعلیمات کے ذریعے زندگی کا فطری تصور پیش کیا، بڑائی کی بنیاد اچھے اعمال اور اعلی ٰ اخلاق پر رکھی اور ظلم و ناانصافی کی ہر شکل کو ممنوع قراردیا۔
شہباز شریف نے کہا کہ میری طرف سے اس نعمتِ عظمٰی کی تشریف آوری پر قوم کو مبارک ہو، یہ اللہ تعالیٰ کا احسانِ عظیم ہوا کہ اس نے حضور ﷺ کو تمام جہانوں کے لیے رحمت بناکر بھیجا، آپ ﷺ کی تشریف آوری سے دکھی انسانوں کو سکون ملا، بے سہاروں کو سہارا ملا، یتیموں اور بیواؤں کو پناہ ملی، غریبوں کو خوداری، غلاموں کو عزت اور امیروں کو سخاوت نصیب ہوئی۔
انہوں نے کہا کہ حضور اکرم ﷺ کی بعثت نے تہذیب کو وقار، ثقافت کو تقدس، علم کو وسعت، فکر کو ندرت، عمل کو طہارت، نفرتوں اور عداوتوں میں سسکتی انسانیت کو اُخوت ومحبت کے تحفے اور انسان کو اپنے خالق تک رسائی کی معرفت نصیب فرمائی، حضور نبی کریم ﷺ کی سیرت مقدسہ تمام انبیا و رسل کی خوبیوں کا جامع ہے۔
شہباز شریف نے کہا کہ آپ ﷺ کے اثر انگیز ارشادات اور اسوۃ حسنہ کا نتیجہ یہ نکلا کہ صدیوں کے دشمن بھائی بھائی بن گئے اور غریبوں اور کمزورں کے سر پر لٹکتی ظلم کی تلوار ٹوٹ گی، جہالت کی جگہ علم وعرفان نے لے لی اور افلاس ومحکومی کے بدلے معاشرے کو غنا اور آزادی نصیب ہوئی۔