اسلام آباد : (ویب ڈیسک) مسلم لیگ ن کے رہنما مفتاح اسماعیل نے وزیراعظم شہباز شریف سے ہفتے کی چھٹی ختم کرنے کے فیصلے پر نظر ثانی کی درخواست کردی۔
تفصیلات کے مطابق مسلم لیگ ن کے رہنما مفتاح اسماعیل نے سماجی رابطے کی ویب سائٹ ٹوئٹر پر اپنے بیان میں کہا کہ رمضان میں ایک دن میں کام کے اوقات کم ہوتے ہیں ، ہمارے پاس عید کی چھٹیوں کے کئی دن ہوں گے۔
مفتاح اسماعیل کا کہنا تھا کہ وزیر اعظم نے ہفتے کو وفاقی ملازمین کے لیے کام کا دن بنانے کا فیصلہ کیا ، درخواست کروں گا کہ عید کے بعد اس فیصلے پر نظر ثانی کریں۔
یاد رہے وزیراعظم شہباز شریف نے منصب سنبھالتے ہی ہفتے میں دو سرکاری تعطیلات ختم کرنے کا اعلان کیا تھا، جس کے تحت سرکاری دفاتر میں اب ہفتے میں صرف ایک تعطیل ہوگی۔
وزیراعظم شہباز شریف نے سرکاری دفاتر کے اوقات کار میں تبدیلی کی تھی ، جس کے بعد سرکاری دفاتر10 بجے کے بجائے صبح 8 بجے کام شروع کریں گے۔

اسلام آباد : (ویب ڈیسک) پاکستان مسلم لیگ ن کے رہنما مفتاح اسماعیل نے سابق وزیراعظم عمران خان پر تنقید کرتے ہوئے کہا ہے کہ پٹرول کی قیمت منجمد کرنا عمران خان کا تباہ کن فیصلہ تھا۔
سماجی رابطوں کی ویب سائٹ ٹوئٹر پر ٹوئٹ کرتے ہوئے سابق مشیر خزانہ مفتاح اسماعیل نے کہا کہ عمران خان نے سی پیک روکا، آئین کو پامال کیا، بزدارمقرر کیا، مودی کی جیت کی خواہش کی۔
مفتاح اسماعیل نے مزید کہا کہ سابق حکومت میں رانا ثنااللہ کی گاڑی میں منشیات ڈالی گئی، ڈسکہ الیکشن میں پولنگ عملےاہلکاروں کو اغوا کیا اور ضبط شدہ رقم ملک ریاض کو واپس کردی۔
واضح رہے کہ سابق وزیراعظم عمران خان نے گزشتہ فروری میں پٹرول اور ڈیزل کی قیمتوں میں 10 روپے فی لیٹر اور بجلی کی قیمتوں میں 5 روپے فی یونٹ کمی کا اعلان کیا تھا۔
اس وقت قوم سے اپنے خطاب میں عمران خان نے کہا تھا کہ پٹرول اور بجلی کی قیمتوں میں آئندہ بجٹ تک اضافہ نہیں کیا جائیگا۔

سابق وزیر خارجہ شاہ محمود قریشی نے کہا ہے کہ عمران خان کو بیرونِ ملک مقیم پاکستانیوں کی ضرورت ہے۔سماجی رابطے کی ویب سائٹ ٹوئٹر پر اپنے ایک پیغام میں انہوں نے بیرونِ ملک مقیم تمام غیرت مند پاکستانیوں کو مخاطب کرتے ہوئے کہا کہ پاکستان اور عمران خان کو آپ کی ضرورت ہے، آگے بڑھو اور اپنے کپتان کا ساتھ دو۔انہوں نے مزید کہا کہ ہم سب نے مل کر دنیا کو بتانا ہے کہ پاکستان ایک خود مختار ملک ہے اور ہم کسی صورت سازشی عناصر کو ملک پر قابض ہونے نہیں دینگے۔

اسلام آباد : (ویب ڈیسک) وزیر اعظم شہباز شریف کو سعودی ولی عہد شہزادہ محمد بن سلمان نے سعودی عرب دورے کی دعوت دے دی۔
سعودی ولی عہد نے وزیر اعظم شہباز شریف کو فون کر کے دورہ سعودی عرب کی دعوت دے دی۔ محمد بن سلمان نے شہباز شریف کو وزارت عظمیٰ کا منصب سنبھالنے پر مبارکباد دی۔
وزیر اعظم شہباز شریف نے کہا کہ پاکستان اور سعودی عرب کے برادرانہ تعلقات ہیں اور وزیر اعظم شہباز شریف نے مبارکباد پر سعودی ولی عہد کا شکریہ ادا کیا۔
وزیر اعظم شہباز شریف نے حرمین شریفین کے متولی شاہ سلمان بن عبدالعزیز اور ولی عہد شہزادہ محمد بن سلمان کو ان کی دور اندیش قیادت میں مملکت کی نمایاں ترقی کرنے پر زبردست خراج تحسین پیش کیا۔
وزیر اعظم شہباز شریف نے دوطرفہ اور بین الاقوامی فورمز پر تاریخی اور مسلسل حمایت اور تعاون پر سعودی عرب کا شکریہ ادا کیا۔ جبکہ ولی عہد کو یقین دلایا کہ پاکستان ہر وقت مملکت کے ساتھ کھڑا رہے گا۔
سعودی ولی عہد نے وزیراعظم شہباز شریف کو جلد از جلد مملکت کا سرکاری دورہ کرنے کی دعوت دی۔ ولی عہد کی دعوت پر شکریہ ادا کرتے ہوئے وزیراعظم شہباز شریف نے ولی عہد کو پاکستان کے سرکاری دورے کی دعوت بھی دی۔

اسلام آباد : (ویب ڈیسک) ڈپٹی کمشنراسلام آباد حمزہ شفقات کو تبدیل کردیا گیا۔
ڈی سی اسلام آباد حمزہ شفقات کو عہدے سے ہٹا دیا گیا۔ حمزہ شفقات کو اسٹیبلشمنٹ ڈویژن رپورٹ کرنے کی ہدایت کر دی گئی۔
حمزہ شفقات نے اپنے تبادلے کی تصدیق کرتے ہوئے کہا ہے کہ اسلام آباد کےلیے کام کرنا میرے لیے باعث فخر رہا۔
حمزہ شفقات کی جگہ عرفان نواز کو اسلام آباد کا نیا ڈپٹی کمشنر تعینات کیا گیا ہے۔اسٹیبلشمنٹ ڈویژن نے عرفان نواز کی تعیناتی کا نوٹیفکیشن جاری کردیا ہے۔

کراچی: (ویب ڈیسک) بلقیس ایدھی کی نماز جنازہ ادا کر دی گئی۔
بلقیس ایدھی کی نماز جنازہ میں وزیر اعلیٰ سندھ سید مراد علی شاہ سمیت وزرا اور اراکین اسمبلی نے بھی شرکت کی۔ نماز جنازہ میں عوام کی بھی بڑی تعداد نے شرکت کی۔
سندھ پولیس کے دستے نے بلقیس ایدھی کی میت کو سلامی دی اور ان کی تدفین سرکاری سطح پر کرنے کے انتظامات کیے گئے۔
اس سے قبل سندھ حکومت نے بلقیس ایدھی کی تدفین سرکاری سطح پر کرنے کا فیصلہ کیا تھا اور سید مراد علی شاہ کا کہنا تھا کہ ایدھی صاحب کا پورا خاندان فلاحی کاموں میں مصروف ہے۔
ان کا کہنا تھا کہ ایدھی صاحب کی آخری رسومات سرکاری سطح پر ہوئی تھیں اور ہماری کوشش ہے کہ بلقیس ایدھی کی آخری رسومات بھی اسی طرح ہوں۔

اسلام آباد: (ویب ڈیسک) اسپیکر قومی اسمبلی راجہ پرویز اشرف نے تحریک انصاف کے ارکان کے استعفے ڈی سیل کر کے پیش کرنے کا حکم دے دیا۔
ایاز صادق نے قومی اسمبلی میں اظہار خیال کرتے ہوئے کہا کہ اسپیکر کو موصول ہونیوالے استعفے ہاتھ سے لکھے ہوئے نہیں جو رولز کے خلاف ہیں، اسپیکر کو موصول ہونیوالے استعفوں کی فرداً فرداً تصدیق نہیں ہوئی۔ جس پر سپیکر راجہ پرویز اشرف نے کہا کہ اسمبلی سیکرٹریٹ کو ہدایت کرتا ہوں استعفے ڈی سیل کر کے مجھے دیں تاکہ قانون اور آئین کے مطابق دیکھ سکوں۔
قبل ازیں راجہ پرویز اشرف نے پینل آف چیئر ایاز صادق سے سپیکر قومی اسمبلی کا حلف لیا۔ راجہ پرویز اشرف نے کہا کہ اپنے قائد آصف زرداری، شہدا کے وارث بلاول بھٹو کا ممنون ہوں، وزیراعظم، خالد مگسی، اختر مینگل سمیت ایک ایک رکن کا مشکور ہوں، مجھے 22 ویں اسپیکر کے طور پر بلا مقابلہ منتخب کیا گیا۔
راجہ پرویز اشرف کا کہنا تھا کہ تاریخ میں پہلا موقع ہے ایک سابق وزیراعظم کو اسپیکر کا عہدہ دیا گیا، اس ایوان کا خادم اور وفادار رہوں گا، شہید ذوالفقار بھٹو بھی اس ایوان کے بلا مقابلہ اسپیکر منتخب ہوچکے ہیں، مسائل کا حل نعرے کی سیاست میں نہیں، مشاورت اور باہمی اتفاق میں ہے، یہ ایوان حق اظہار رائے کا نگہبان اور محافظ ہے۔

لاہور: (ویب ڈیسک) مریم نواز نے کہا ہے کہ غنڈہ گرد اور سڑک چھاپ پی ٹی آئی کا جڑ سے خاتمہ ہر پاکستانی کا اولین فرض ہے، یہ کلچر کسی طرح بھی ملک و قوم کے لیے اچھا نہیں بلکہ تباہی ہے۔
پاکستان مسلم لیگ نون کی رہنما مریم نواز نے سماجی رابطے کی ویب سائٹ پر پنجاب اسمبلی میں ہونے والی ہنگامہ آرائی پر ٹویٹ کرتے ہوئے کہا کہ اس کا فوری سدباب اور خاتمہ ضروری ہے، پنجاب کے عوام ان کے چہرے پہچان لیں۔ انہوں نے کہا کہ جتنا چاہے پھڑپھڑا لو، پنجاب کا حق پنجاب کے عوام کو آج انشاءاللّہ مل کر رہے گا، وہ ترقی جو 2018 میں ان سے چھین لی گئی تھی، وہ پنجاب واپس لے کر رہے گا۔

لاہور: (ویب ڈیسک) چودھری پرویزالہٰی نے کہا کہ ملکی تاریخ میں کبھی ایسا نہیں ہوا، پولیس کیسے ایوان کے اندر داخل ہوئی ،آئی جی کو ایک ماہ کی سزا دی جائے گی۔
ادھر پنجاب اسمبلی میں ڈپٹی سپیکر دوست مزاری پر حکومتی ارکان نے حملہ کر دیا، اراکین نے تھپڑوں کی بارش کر دی۔ حکومتی ارکان کی جانب سے ڈپٹی سپیکر پر لوٹے پھینکے گئے۔ حکومتی ارکان نے ڈپٹی اسپیکر کی نشست کا گھیراؤ کیا۔- ڈپٹی اسپیکر دوست مزاری پر حکومتی ارکان نے حملہ کر کے بال نوچ لئے۔ سکیورٹی اہلکار ڈپٹی اسپیکر کو ایوان سے باہر لے گئے۔
قبل ازیں ڈپٹی سپیکر دوست مزاری کا میڈیا سے گفتگو میں کہنا تھا کہ تمام دوستوں سے تعاون کی اپیل ہے، اسمبلی رولز کے مطابق الیکشن کراؤں گا، عدالت کا فیصلہ ہے وزیراعلیٰ کا انتخاب شفاف ہونا چاہیئے، کوئی سمجھتا ہے ماحول خراب کرے گا تو پریشر لوں گا نہیں پریشر دوں گا، آج انتخاب صاف اورشفاف ہوگا، کل آئی جی سے ملاقات ہوئی، سکیورٹی پر کوئی سمجھوتہ نہیں کریں گے۔
خیال رہے پنجاب اسمبلی کے ایوان میں وزیراعلیٰ پنجاب کے انتخاب کیلئے اوپن ووٹنگ سے فیصلہ ہوگا۔ پنجاب اسمبلی میں پی ٹی آئی کے 183، ق لیگ کے 10 ارکان ہیں۔ ن لیگ کے 165 اور پیپلزپارٹی کے 7 ارکان ہیں۔ راہ حق پارٹی کا ایک اور 4 آزاد ارکان ہیں۔ کامیاب امیدوار کو کم از کم 186 ووٹ حاصل کرنا ہوں گے۔