لاہور(ویب ڈیسک) ذرائع کے مطابق پی آئی اے کی پرواز پی کے 307 کی فلائٹ کا روٹ لاہور سے کراچی کیلئے شیڈول تھا۔ اسے گزشتہ رات 9 بجے پرواز کرنا تھی تاہم اسے آج صبح اڑایا گیا۔ پرواز کے مقررہ وقت پر نہ اڑنے سے مسافر ویسے ہی پریشان تھے، انھیں جیسے ہی پتہ چلا کہ انھیں کراچی کے بجائے مسقط پہنچا دیا گیا ہے تو وہ ششدر رہ گئے۔ اب یہ تمام پاکستانی مسافر اپنی سرزمین کے بجائے ایک دوسرے ملک کے ایئرپورٹ پر موجود ہیں۔ سونے پر سہاگہ یہ ہے کہ رومنگ نہ ہونے کی وجہ سے وہ اپنے رشتہ داروں اور اہلخانہ کو اپنے اس ایڈونچر کے بارے میں آگاہ بھی نہیں کر سکتے۔ پی کے 307 کو مسقط لے جانے پر پی آئی اے حکام کی جانب سے ابھی تک کوئی وضاحت یا معلومات نہیں دی گئی ہیں۔
