لاہور (مانیٹرنگ ڈیسک) سرگودھا کی ایک درگاہ کے گدی نشین نے اپنے ساتھیوں سمیت خنجروں اور ڈنڈوں کے وار کرکے چار خواتین سمیت 20 افراد کو قتل کر دیا۔ گدی نشین عبدالوحید سمیت 8افراد گرفتار۔ وزیراعلیٰ نے 10گھنٹے میں رپورٹ طلب کرلی ہے۔ تفصیلات کے مطابق سرگودھا کے ڈپٹی کمشنر علی چٹھہ کے مطابق نواحی علاقے 95 شمالی میں قائم درگاہ مینہ طور پر علی محمدگجر کے گدی نشین عبدالوحید نے اپنے ساتھیوں سمیت درگاہ میں موجود چھ خواتین سمیت 22 افراد کو نشہ آور چیز کھلا کر بے ہوش کیا پھر ڈنڈوں اور خنجروں کے وار کیے۔ اس دوران درگاہ سے دو خواتین سمیت تین افراد زخمی حالت میں بھاگ کر ڈی ایچ کیو ہسپتال پہنچ گئے۔ اس واقعہ میں چار خواتین سمیت بیس افراد جاں بحق ہوئے۔ ملزم عبدالوحید نے واردات کا اعتراف کرلیا ہے۔ زخمیوں کے ہسپتال پہنچنے کے بعد اس واقعہ کا علم ہوا۔ ڈپٹی کمشنر لیاقت علی چٹھہ کا کہنا تھا کہ ملزم عبدالوحید کی ذہنی حالت ٹھیک نہیں تھی وہ الیکشن کمیشن سرگودھاکا ملازم بھی ہے۔ واقعہ گدی نشینی کا تنازع معلوم نہیں ہوتا۔ دربار علی گجر دو سال قبل آبادی سے دور تعمیرا ہوا تھا۔ ڈپٹی کمشنر سرگودھا کا مزید کہنا تھا کہ عبدالوحید مردوں کو درگاہ پر درس دیتا تھا اور ان پر تشدد بھی کرتا تھا۔ ملزم سے سرگودھا الیکشن آفس کا کارڈ بھی برآمد ہوا ہے۔ قتل ہونے والے افرادمیں دو کا تعلق اسلام آباد ، ایک میانوالی جبکہ باقی تمام مقامی تھی۔ پولیس نے تمام مقتولین کی نعشیں ریسکیو کے ذریعے ہسپتال پہنچا دی ہیں جہاں ان کا پوسٹمارٹم ہو رہا ہے۔ انچارج ریسکیو کاکہنا تھاکہ جب وہ وہاں پہنچے تو تمام نعشیں برہنہ حالت میں تھیں۔ خنجروں اور ڈنڈوں سے بری طرح مسخ تھیں۔ اکثر کی ٹانگیں اور بازوں کی ہڈیاں ٹوی ہوئی تھیں۔ اس واقعہ میں ہلاک19 میں سے 17 افراد کی شناخت ہو گئی ہے جبکہ دو افراد کا ابھی تک علم نہیں ہوسکا۔ ڈپٹی کمشنر کا مزید کہناتھا کہ ملزم مریدوں کو مارتا اور کہتا کہ تمہارا جسم پاک ہو رہا۔ عبدالوحید مہینے میں ایک بار درگاہ آتا۔ ڈاکٹر امتیاز ڈی ایچ کیو ٹیچنگ ہسپتال کا کہنا تھا کہ تین زخمیوں کی حالت خطرے سے باہر ہے۔ زخمی افراد نے بتایاکہ پہلے انہیں کچھ پینے کے لیے دیا گیا تھا، زخمیوں کے جسموں پر تیز دھار آلے اور ڈنڈوں سے زخمی ہونے کے نشان ہیں۔ وزیراعلیٰ پنجاب میاں شہباز شریف نے واقعہ کا نوٹس لیتے ہوئے رپورٹ طلب کرلی ہے۔

کراچی (خصوصی رپورٹ) لیاری گینگ وار کا گرفتار سرغنہ عزیر بلوچ بھی بدنام زمانہ بھارتی خفیہ ایجنسی ”را “کا ایجنٹ نکلا۔ گینگ وار کے سرغنہ کے خلاف مقدمہ فوجی عدالت میں بھیجے جانے کا امکان ہے۔ ذرائع کے مطابق پیپلز امن کمیٹی کے سربراہ عزیر بلوچ کے را اور ایرانی انٹیلی جنس کے لیے جاسوسی کا انکشاف ہوا ہے جس کے بعد عزیر بلوچ کے مقدمات فوجی عدالت میں بھیجنے کا فیصلہ کیا گیا ہے۔نئے انکشافات کے مطابق عزیر بلوچ بلوچستان میں کالعدم علیحدگی پسند جماعتوں کی معاونت کیا کرتا تھا جس کے لیے وہ ”را“ اور ایرانی انٹیلی جنس ادارے کے ساتھ بھی رابطے میں تھا۔ گینگ وار کے سرغنہ نے ایران کے خفیہ دورے بھی کئے۔واضح رہے کہ 30 جنوری 2016 ءکو سندھ رینجرز نے کراچی میں کارروائی کرتے ہوئے لیاری گینگ وار کے سرغنہ عزیر بلوچ کو تحویل میں لے لیا تھا۔عزیر بلوچ کی گرفتاری سے متعلق ترجمان رینجرز کا کہنا تھا کہ عزیر بلوچ کو کراچی میں داخل ہوتے ہوئے مضافاتی علاقے سے گرفتار کیا گیا ہے جو ارشد پپو قتل کیس سمیت دہشت گردی، قتل اور بھتہ خوری کے 20 سے زائد مقدمات میں مطلوب تھا۔کہ امن کمیٹی کے سربراہ 37 سالہ عزیر بلوچ کے سابق صوبائی وزرا سمیت پیپلز پارٹی کے معتدد رہنماﺅں سے بھی قریبی تعلقات تھے اور اس وقت کے صوبائی وزیر داخلہ ذوالفقار مزرا نے بھی عزیر بلوچ سے دیرینہ تعلقات کا اعتراف کیا تھا۔یاد رہے کہ عزیر بلوچ کو مسقط سے بذریعہ سٹرک جعلی دستاویزات پر دبئی جاتے ہوئے انٹر پول نے 29 دسمبر 2014 کو گرفتار کیا تھا۔ ذرائع کے مطابق ملزم کا پاکستان سے گرفتار بھارتی خفیہ ایجنٹ کلبھوشن یادیو سے بھی رابطوں کا انکشاف ہوا ہے۔ علاوہ ازیں انسداد دہشت گردی کی خصوصی عدالت نے پولیس اہلکاروں سمیت 25 سےزائد افراد کی ٹارگٹ کلنگ سے متعلق مختلف مقدمات میں لیاری امن کمیٹی کے سربراہ عزیز بلوچ سمیت دیگر ملزمان پر فرد جرم عائد کردی ۔ کراچی کی انسداد دہشت گردی کی خصوصی عدالت میں 2012ءمیں لیاری آپریشن کے دوران پولیس اہلکاروں سمیت 25 سے زائد افراد کی ٹارگٹ کلنگ سے متعلق 7مختلف مقدمات کی سماعت ہوئی۔

اسلام آباد (آن لائن) عوامی مسلم لیگ کے سربراہ شیخ رشید نے کہا ہے کہ عسکری ادارے کبھی ایک گھوڑے پر شرط نہیں لگاتے، اداروں کے پاس کئی گھوڑے اور جیکی ہیں۔ عسکری اداروں کا پی پی کے ساتھ بھی رابطہ ہے، فوج کا سب سے بڑا مسئلہ ڈان لیکس ہے۔ آئندہ 30روز ملکی سیاست میں اہم ہیں۔ ن اور قانون میں سے کسی ایک کا جنازہ نکلے گا۔ عمران خان کی آرمی چیف اور وزیراعظم کی ڈی جی آئی ایس آئی سے ملاقات اہم ہے۔ جنرل قمر جاوید باجوہ راحیل شریف سے کم نہیں۔ نواز شریف برصغیر کا سب سے بڑا ڈکٹیٹر ہے۔ زرداری چاہتے ہیں کہ نواز شریف فارغ ہو جائے۔ ہفتے کے روز نجی ٹی وی سے گفتگو کرتے ہوئے شیخ رشید نے کہا کہ عمران خان کی آرمی چیف سے اور وزیراعظم کی ڈی جی آئی ایس آئی سے ملاقات اہم ہے ۔ عمران خان نے آرمی چیف سے ملاقات کے بارے میں بریفنگ نہیں دی۔ فوج کا سب سے بڑا مسئلہ نیوز لیکس ہے۔ فوج کو پرویز رشید اور طارق فاطمی کا صدقہ قبول نہیں۔ انہوں نے کہا کہ عسکری ادارے نے ابھی تک کسی گھورے پر کاٹھی نہیں ڈالی۔ عسکری ادارہ کسی ایک گھوڑے پر شرط نہیں لگاتے۔ اداروں کے پاس کئی گھوڑے اور جیکی ہیں۔ اداروں کا رابطہ پیپلز پارٹی سے بھی ہے۔ قمر جاوید باجوہ راحیل شریف سے کم نہیں ۔ شیخ رشید نے کہا کہ میں نے اور عمران خان نے پانامہ کیس میں ہار یا جیت کی حکمت عملی تیار کر لی ہے۔ میں اور عمران خان خون کے آخری قطرے تک لڑیں گے۔ عمران خان کو مشورہ دیا ہے کہ آئندہ انتخابات میں چھوٹی جماعتوں کو ساتھ ملائیں اور 100ٹیکس چھوٹی جماعتوں کو دیں۔ عمران خان کا پی پی کے ساتھ اتحاد کرنا درست فیصلہ ہے۔ انہوں نے کہا کہ آئندہ 30روز میں پانامہ کیس کا فیصلہ آ جائے گا۔ پانامہ کیس کا فیصلہ برصغیر کی تاریخ کا سب سے اہم فیصلہ ہو گا۔ پانامہ کیس کا جو بھی فیصلہ ہو گا۔ آرمی ساتھ ہو گی۔ 30روز میں ملکی سیاسی جماعتیں اپنی حکمت عملی بنا لیں گی۔ ساری سیاسی پارٹیاں الیکشن مہم میں آ گئی ہیں۔ انہوں نے کہا کہ نواز شریف برصغیر کے سب سے بڑے ڈکٹیٹر ہیں۔ آصف زرداری چاہتے ہیں کہ نواز شریف فارغ ہو جائیں۔