تلہ گنگ(ویب ڈیسک) پاکستان تحریک انصاف کے چئیر مین عمران خان کا کہنا ہے کہ آصف زرداری نے بھی اگلا الیکشن لڑنا ہے اور ہم آپ سے پوچھیں گے سرے محل کتنے پیسوں کا لیا لہذا آپ بھی کسی قطری شہزادے کو پکڑ لو کیونکہ آپ کو بھی اس کی ضرورت پڑے گی۔
تلہ گنگ میں جلسہ عام سے خطاب کرتے ہوئے پاکستان تحریک انصاف کے رہنما عمران خان کا کہنا تھا کہ بہت جلد ملک بدلنے والا ہے، 21 سال سے مل کو بدلنے کی جدوجہد کررہے ہیں، تحریک انصاف ایک صوبے کی نہیں بلکہ ملک کی جماعت ہے اور پی ٹی آئی ہی ملک کے مسائل حل کرے گی کیونکہ باقی ساری جماعتیں صرف صوبوں تک محدود ہیں لیکن تحریک انصاف پورے ملک میں پھیلی ہوئی ہے۔ انہوں نے کہا کہ ہمیں بہت کچھ ملا ہے لیکن ہم نے فائدہ نہیں اٹھایا، پی ٹی آئی خیبرپختونخوا میں کئی جگہ تبدیلی لائی ہے، ہم نے کے پی کے کی پولیس کو ٹھیک کیا اور پولیس سے سیاسی مداخلت ختم کرکے ایماندار آئی جی لگایا کیونکہ جب آئی جی میرٹ پر آئے گا تو پولیس بھی ٹھیک کام کرے، خیبر پختونخواہ کی پولیس بین الاقوامی پولیس کا مقابلہ کرتی ہے لیکن سندھ کے آئی جی اے ڈی خواجہ کو اس لیے تبدیل کیا کیونکہ وہ غلط کام نہیں کرنے دے رہے تھے۔
عمران خان نے کہا کہ پاکستان کا سب سے بڑا مسئلہ کرپشن ہے اور اقتدار میں آکر اپنی ذات کو فائدہ پہنچانے کو کرپشن کہتے ہیں، شرجیل میمن نے 5 ارب کی کرپشن کی لیکن وہ پاکستان اس طرح آئے جیسے کہ ورلڈ کپ جیت کر آئے ہوں، ڈاکٹر عاصم پر 460 ارب روپےکی کرپشن کی جب کہ خیبر پختونخواہ کا صرف ترقیاتی فنڈ ہی113 ارب روپے ہے لہذا اگر اپنے بچوں اور ملک کا مستقبل بچانا ہے تو سب کو اکھٹا ہونا پڑے گا۔ انہوں نے کہا کہ منی لانڈرنگ کرنے والے ملک کو دوگنا نقصان پہنچاتے ہیں، نواز شریف کا پاناما کا کیس کرپشن اور منی لانڈرنگ کا ہے، یہاں سے پیسہ لے گئے اور لندن میں بڑے بڑے محل خریدے، جب عدالت نے نواشریف سے پوچھا کہ کدھر سے پیسہ آیا تو پھر درمیان میں قطری آگیا،نواز شریف نقل کرنے کے لیے بھی عقل چاہیے۔

لاہور(ویب ڈیسک) نوازشریف کی صاحبزادی مریم نواز کا والدین کی شادی کی سالگرہ پر اپنی ٹوئٹ میں کہنا تھا کہ محبت کی ہر کہانی خوبصورت ہے لیکن میرے لئے اپنے والدین کا پیار سب سے خوبصورت اور پسندیدہ ہے۔سماجی رابطے کی ویب سائٹ ٹویٹر پر وزیراعظم کی صاحبزادی نے نوازشریف اور خاتون اول کلثوم نواز کی شادی کی سالگرہ کی تصویریں پوسٹ کرتے ہوئے کہا کہ محبت کی ہر کہانی خوبصورت ہے لیکن میرے لئے اپنے والدین کا پیار سب سے خوبصورت اور پسندیدہ ہے۔ اوراس دنیا میں کوئی شے مکمل ( پرفیکٹ ) نہیں لیکن ا?پ دونوں کا معاملہ مختلف ہے۔ ماشا اللہ 46 سال تک ایک ساتھ۔
نوازشریف کی صاحبزادی کا کہنا تھا کہ والدین نے اپنے شادی کی 46 ویں سالگرہ دادی کے گھر میں منائی جس میں وزیراعلیٰ پنجاب شہباز شریف بھی موجود تھے اور شادی کا کیک نوازشریف کے بہن بھائی لائے تھے۔

کوٹ ادو‘ کراچی (خصوصی رپورٹ) سندھ اور پنجاب میں 16فیصد سیلز ٹیکس عائد کئے جانے کے خلاف آل پاکستان آئل ٹینکرز ایسوسی ایشن نے ہڑتال کر کے ملک بھر میں تیل کی سپلائی روک دی۔ ایسوسی ایشن کے چیئرمین میر یوسف شاہوانی نے پورے ملک میں ہڑتال کا اعلان کرتے ہوئے کہا ہے کہ ٹرانسپورٹرز پر ناجائز ٹیکس فوری طور پر ختم کیا جائے‘ جب تک حکومت ٹیکس واپسی کا اعلان نہیں کرتی اس وقت تک ہڑتال جاری رہے گی۔ تیل کی سپلائی نہ ہونے سے ملک بھر میں پٹرولیم مصنوعات کی شدید کمی ہو جائے گی جس کی تمام تر ذمہ داری حکومت پر ہو گی۔ یوسف شاہوانی نے کہا کہ حکومت ہمیں برباد کرنا چاہتی ہے‘ حکومت نے اتنے ٹیکس لگا دیئے ہیں کہ ٹرانسپورٹرز کمانے کی بجائے جائیدادیں بیچ کر ٹیکس ادا کر رہے ہیں۔ حکومت پورے ملک کو تباہی کے دہانے پر لا چکی ہے۔ انہوں نے وزیراعظم سے اپیل کی کہ ٹرانسپورٹروں کے ساتھ ظلم و زیادتی ختم کی جائے۔ ادھر کراچی میں آئل ٹینکرز کنٹریکٹرز ایسوسی ایشن نے حکومت کی یقین دہانی پر پیر تک اپنی ہڑتال جزوی طور پر موخر کرتے ہوئے صرف کراچی کیلئے سپلائی بحال کر دی جبکہ آئل ٹینکرز ایسوسی ایشن نے پورے ملک میں ہڑتال بدستور جاری رکھنے کا اعلان کیا ہے۔ آئل ٹینکرز کنٹریکٹرز ایسوسی ایشن کے رہنما انور سعادت نے کہا ہے کہ حکومت نے پیر کی صبح تک سیلزٹیکس کی واپسی کا نوٹیفکیشن جاری نہ کیا تو کراچی میں بھی سپلائی روک دی جائے گی۔
آئل ٹینکرز‘ ہڑتال