لاہور (خصوصی رپورٹ) پولیس کی بھاری نفری نے گزشتہ رات پنجاب یونیورسٹی نیو کیمپس ہاسٹلز میں سرچ اینڈ سویپ آپریشن کیا۔ ایس پی اقبال ٹاﺅن، ڈی ایس پی مسلم ٹاﺅن، 4 تھانوں کے ایس ایچ اوز سمیت ڈیڑھ سو پولیس افسران و اہلکاروں نے آپریشن میں حصہ لیا۔ اس موقع پر پولیس کے ہمراہ یونیورسٹی انتظامیہ بھی موجود تھی۔ ان ٹیموں نے ہاسٹلز میں 4 سو 50 کمروں کی تلاشی لی۔ وہاں مقیم طلبہ کی بائیومیٹرک مشینوں کے ذریعے کوائف چیک کئے گئے۔ پولیس نے 10 طلبہ کو اپنی حراست میں لے لیا۔ بعدازاں ان کی شناخت ہونے پر انہیں چھوڑ دیا گیا۔ پولیس کے مطابق یہ آپریشن کرنے کا مقصد اس بات کو یقینی بنانا تھا کہ یونیورسٹی ہاسٹلز میں کوئی غیرطلبہ عناصر موجود نہ ہوں۔

اسلام آباد (خصوصی رپورٹ) فیڈرل بورڈ آف ریونیو نے 15فیصد ٹیکس ادا کر کے بیرون ملک خفیہ اثاثوں کو قانونی قرار دلوانے سے متعلق ٹیکس ریفارمز کمیشن کی مجوزہ ایمنسٹی سکیم سے لاتعلقی ظاہر کرتے ہوئے اسے مسترد کر دیا ہے۔ ایف بی آر کے اس تازہ ترین مو¿قف کے بعد بجٹ میں غیر ملکی اثاثہ جات اور آف شور کمپنیوں کو قانونی قرار دلوانے سے متعلق ایسی کسی نئی ایمنسٹی سکیم کے آنے کے امکانات معدوم ہو گئے ہیں۔ بجٹ سازی میں مصروف ایف بی آر کے ایک سینئر افسر نے سینٹ کی قائمہ کمیٹی برائے خزانہ کے اجلاس میں ایف بی آر نے غیرملکی اثاثہ جات کو15فیصد ٹیکس ادا کر کے قانونی قرار دلوانے سے متعلق جو تجویز پیش کی تھی کیا اس کے تحت پاناما لیکس اور بہاماس لیکس کے تحت سامنے آنیوالے غیر ملکی اثاثہ جات اور آف شور کمپنیوں کو بھی اس سکیم کے تحت قانونی قرار دلوایا جاسکے گا یا نہیں تو بجٹ سازی میں مصروف سینئر افسر نے نام ظاہر نہ کرنے کی شرط پر بتایا کہ پہلے تو یہ وضاحت ضروری ہے کہ یہ تجویز ایف بی آر کی نہیں بلکہ ٹیکس ریفارمز کمیشن کی ہے اور دوسری اہم بات یہ ہے ایف بی آر اس تجویز کو بالکل سپورٹ نہیں کرتا لہٰذا اس سکیم کے تحت کیا کور ہوگا اور کیا نہیں وہ بے معنی ہے۔

لاہور (کرائم رپورٹر،اپنے سٹاف رپورٹر سے) ایف آئی اے کاوزات داخلہ سے فری ہینڈ ملنے کے بعد گردوں کی خرید فروخت کرنے والوں کے خلاف پہلا کامیاب چھاپہ، ای ایم ای سوسائیٹی میں واقع ایک گھر سے گردوں کی غیر قانونی خرید فروخت کر نےوالا گروہ گرفتار ، مزید تفتیش کیلئے نامعلوم مقام پر منتقل کر دیاگیا ۔بتایا گیا ہے کہ وزارت داخلہ کی جانب سے ایف آئی اے کو فری ہینڈ دیا گیا کہ گردوں کی غیر قانونی خرید و فروخت کی روک تھام اور گھناﺅنے کاروبار میں ملوث افراد کے خلاف فوری اور سخت ایکشن لیا جائے جس کے بعد ایف آئی اے کی ٹیم نے خفیہ انفارمیشن پر لاہور کے علاقہ ای ایم ای سوسائٹی میں واقع ایک گھر پر چھاپہ مار کر 2گردے فروخت کر نے والے اور 2گردے خریدنے والے افراد کو موقع سے گرفتار کر لیا گیا ۔ ایف آئی اے ذرائع کے مطابق جب ٹیم موقع پر پہنچی تو ایک شخص کا گردہ پیٹ سے باہر نکال کر رکھا گیا تھا جوکہ خریدار کے پیٹ میں فٹ کرنا تھا جبکہ دوسرے فروخت کندہ کا ابھی گردہ باہر نکالنا تھا کہ ایف آئی اے نے چھاپہ مار کر ڈاکٹروں سمیت تمام افراد کو موقع سے گرفتار کر لیا۔ ملزمان کے خلاف ہیومن آرگن ٹرانسپلانٹ ایک کے تحت مقدمہ درج کر کے تفتیش شروع کر دی ہے۔ یاد رہے کہ ہیومن آرگن ٹرانسپلانٹ کے تحت ایف آئی اے کی یہ پہلی کاروائی ہے جس کے تحت ملزمان کو 10سال قید اور 10لاکھ روپے جرمانے کی سزا دی جاتی ہے ۔ایف آئی اے حکام کا کہنا ہے کہ اس طرح کی مزید کاروئیاں عمل میں لائی جائیں گی تاکہ اس ناسور کا ملک سے مکمل اور ہمیشہ کیلئے خاتمہ کیا جاسکے ۔ گرفتار ڈاکٹر التمش ینگ ڈاکٹرز ایسوسی ایشن کا جنرل سیکر ٹری ہے۔

اسلام آباد (خصوصی رپورٹ) آئل اینڈ گیس ریگولیٹری اتھارٹی (اوگرا) نے یکم مئی سے پٹرولیم مصنوعات کی قیمتوں میں ردوبدل کی سمری وزارت خزانہ کو ارسال کر دی جس میں مٹی کے تیل کی قیمت میں 15روپے اور لائٹ ڈیزل کی قیمت میں 10 روپے فی لٹر اضافے کی تجویز دی گئی ہے۔ وزارت خزانہ آج 30اپریل کو وزیراعظم کی منظوری کے بعد نئی قیمتوں کا اعلان کرے گی۔ تفصیلات کے مطابق اوگرا نے مٹی کے تیل کی قیمت میں 15 روپے اور لائٹ ڈیزل کی قیمت میں 10 روپے اضافے کی سمری بھجوا دی۔ پٹرول اور ہائی سپیڈ ڈیزل کی قیمت میں ایک روپے کمی کی تجویز بھی دی گئی ہے۔ وزارت خزانہ 30 اپریل کو وزیراعظم کی منظوری کے بعد نئی قیمتوں کا اعلان کرے گی۔

لاہور(مانیٹرنگ ڈیسک ) چینل فائیو سے گفتگو کرتے ہوئے لندن سے تجزیہ کار شمع جونیجو نے کہا ہے کہ نیوز لیکس نوٹی فکیشن پر دونوں طرف سے غلط طریقہ کار اختیار کیا جارہا ہے جو پاکستان کو ایک بری صورتحال کی طرف لے جائے گا جبکہ موجود صورتحال میں ہم کسی قسم کے انارکی برداشت نہیں کرسکتے، مخالفت برائے مخالفت کی جارہی ہے۔وزیر داخلہ نے بھی کہا کہ یہ رپورٹ وزرات داخلہ جاری کرنا تھی، پرنسپل سیکرٹری نے کیسے کردی، اسحاق ڈار بڑے سیاستدان ہیں، معاملے کو دبانے کی کوشش کررہے ہیں، انکایہ کہنا کہ نوٹی فکیشن کا ایک حصہ ہے ابھی دوسرا حصہ آنا ہے، پھر کہنا یہ کہ پرویز رشید بھی ذمہ دار تھے لیکن انہیں بتا چکے ہیں اس لئے نوٹی فکیشن میں انکا نام نہیں تو ہر جگہ غلطیاں ہورہی ہیں، وزیراعظم پانامہ کیس کو تو ہینڈل کرگئے، لیکن جس طرح انہوںنے نیوز لیکس رپورٹ کو میس ہینڈل کیا ہے وہ سوتے شیر کو جگانے کے مترادف ہے، وزیر داخلہ کے بیانات ثابت کرتے ہیں کہ حکومت ایک پیج پر نہیں، یہ معاملہ جلدی انتخابات کے بجائے عدالت میں جاتا دکھائی دے رہاہے، حکومت بری صورتحال سے دوچار ہے، پہلے ہی پانامہ کیوجہ سے دباو¿ میں ہے، ایسے میں خود اپنے پاو¿ں پر کلہاڑی مارنے کی کیا ضرورت تھی، جب وہ خود ہی ایک پیج پر نہیں ہیں، انہوں نے کہا کہ حکومت و آرمی دونوں پھنس چکے ہیں، نکلنے کا کوئی قانونی راستہ نہیں ہے،6 ہزار ٹویٹس ہوچکے ہیں جو اب واپس نہیں ہوسکتے، وزیراعظم کو آرمی چیف سے ملاقات کرکے مشاورت کرنی چاہئے، انہیں تھوڑا جھکنا پڑے گا، اگر وہ فوج ودیگر اداروں کے سربراہان کو منانے میں کامیاب ہوتے ہیں تو بہتری آسکتی ہے لیکن لگتا نہیں کہ یہ معاملہ اب بہتری کی طرف جائے گا، اب یہ خراب ہی ہونے جارہا ہے، آرمی جس شخص کو ذمہ دار دیکھنا چاہتی ہے، وزیراعظم ہاو¿س اسے ذمہ دار قرار نہیں دے گا، جس سے تصادم بڑھے گا۔