مردان (خصوصی رپورٹ) عبدالولی خان یونیورسٹی مردان میں توہین مذہب پر ہزاروں طلباءنے ساتھی طالب علم کو تشدد کرکے ہلاک کردیا۔ لاش کو جلانے کی کوشش۔ مشتعل طلباءنے ہاسٹل کے کمرے میں گھس کر عبداللہ اور مشال کو تشدد کا نشانہ بنایا۔ اطلاع ملتے ہی پولیس کی بھاری نفری موقع پر پہنچ گئی۔ 50 طالب علموں کو حراست میں لے لیا گیا۔ ادھر انتظامیہ نے یونیورسٹی کو غیرمعینہ مدت کیلئے بند کردیا۔ ڈی آئی جی مردان عالم شنواری کے مطابق قتل ہونے والے طالب علم پر توہین ذہب کا الزام تھا۔ موقع پر موجود ایک عینی شاہد نے بتایا کہ مشال اور عبداللہ دونوں پر فیس بک پر احمدی فرقے کا پرچار کرنے کا الزام عائد کیا جارہا تھا۔ تاہم وہ احمدی فرقے کے ساتھ اپنے تعلق سے انکار کرتا رہا۔ عینی شاہد نے بتایا کہ مشتعل طلباءنے ہاسٹل کے کمرے میں عبداللہ کو گھیرے میں لے لیا اور اسے زبردستی قرآنی آیات پڑھائیں اور اس کے بعد اسے تشدد کا نشانہ بنایا۔ واقعہ کی سامنے آنے والی ویڈیو میں دیکھا گیا کہ مشال زمین پر پڑا ہوا ہے اور اس کے اردگرد لوگ کھڑے تھے۔ مارے گئے طالب علم کے جسم پر تشدد کے نشانات بھی نظر آئے جبکہ لوگ اسے لاتیں بھی مار رہے تھے۔ ویڈیو کے آخر میں ایک شخص طالب علم کے کپڑے بھی اتار دیتا ہے۔ ہاسٹل کے وارڈن محمد علی کے مطابق اس نے تین سے چار ہزار طالب علموں کو آتا دیکھ کر دروازے بند کردیئے تھے لیکن ہجوم نے دروازہ توڑ دیا اور اندر آگئے۔ محمد علی کے مطابق مشتعل طلباءنے مثال پر فائرنگ کی اور پھر اسے مارنا شروع کردیا۔ عبدالولی خان یونیورسٹی انتظامیہ نے واقعہ کی رپورٹ گورنر اقبال ظفر جھگڑا کو ارسال کردی۔

اسلام آباد (خصوصی رپورٹ) وفاقی حکومت نے موٹروے پولیس میں ہزاروں کی تعداد میں بھرتیوں کا فیصلہ کرلیا۔ وزیراعظم کی منظوری کے بعد موٹرو ے پولیس کی تین ہزار اسامیوں کا اشتہار دیا جائے گا جس میں جونیئر پٹرولنگ آفیسر‘ پٹرولنگ آفیسر اور سینئر پٹرولنگ آفیسر کے عہدوں پر بھرتیاں کی جائیں گی۔

قصور‘ پھولنگر‘ کراچی (خصوصی رپورٹ) ملک کے مختلف علاقوں میں بڑھتی ہوئی گرمی کے باعث پارہ چڑھنے لگا جبکہ لوڈشیڈنگ نے بھی جینا دوبھر کر دیا۔ غیرعلانیہ لوڈشیڈنگ کے خلاف شہری سڑکوں پر نکل آئے۔ احتجاجاً روڈز بلاک کر دیں۔ حکومت کے خلاف
شدید نعرے بازی کی گئی۔ تفصیلات کے مطابق سندھ اور جنوبی پنجاب کی طرح کراچی بھی شدید گرمی کی لپیٹ میں آ گئے ہیں۔ پارہ بھی مسلسل بڑھنے لگا۔ محکمہ موسمیات کے مطابق کراچی میں سمندری ہوئیں بند ہونے سے میدانی علاقوں سے آنے والے ہوا کے گرم تھپیڑوں نے مسلسل تیسرے روز درجہ حرارت 40سے تجاوز کر گیا۔ شدید گرمی اور کے الیکٹرک کی جانب سے غیرعلانیہ لوڈشیڈنگ کے باعث شہریوں کی زندگی اجیرن ہو گئی۔ محکمہ موسمیات نے کہا کہ شہر کا درجہ حرارت 42ڈگری سے تجاوز کر سکتا ہے تاہم ہیٹ سٹروک کا خدشہ نہیں۔ محکمہ موسمیات کے مطابق دن 12بجے تک حیدرآباد‘ رحیم یارخان اور شہید بینظیر آباد میں 43موہنجوداڑو‘ لاڑکانہ اور دادو میں 42‘ لسبیلہ اور سکھر میں 41‘ مٹھی 40جبکہ کراچی میں 39ڈگری سینٹی گریڈ ریکارڈ کیا گیا۔ نوابشاہ میں پارہ 47ڈگری تک پہنچ گیا۔ حیدرآباد اور سبی میں درجہ حرارت 46ڈگری سینٹی گریڈ رہا۔ ادھر قصور کے علاقے راﺅ خانوالہ میں محمدشفیق کونسلر کی زیرقیادت بجلی کی غیرعلانیہ لوڈشیڈنگ کے خلاف سینکڑوں شہریوں نے احتجاج کیا۔ مظاہرین نے ٹائر جلا کر قصور رائیونڈ روڈ کو بلاک کردیا جس پر سڑک کے دونوں جانب گاڑیوں کی لمبی قطاریں لگ گئیں۔ مظاہرین نے حکومت کی پالیسیوں کو شدید تنقید کا نشانہ بنایا اور حکومت کے خلاف نعرے بازی کرتے رہے۔ مظاہرین نے مقامی پولیس کی یقین دہانی پر ایک گھنٹے بعد مظاہرہ ختم کردیا اور مظاہرین پرامن منتشر ہو گئے۔ پھولنگر شہر اور قرب و جوار میں گزشتہ روز بھی غیرعلانیہ لوڈشیڈنگ کا سلسلہ بغیر کسی وقفے کے جاری رہا اور ہر گھنٹے کے بعد ایک گھنٹے کی لوڈشیڈنگ کی جا رہی ہے۔ اس کے علاوہ مرمت کے نام پر بھی مسلسل کئی کئی گھنٹے بجلی بند رکھنے کا سلسلہ بھی رکنے کا نام نہیں لے رہا۔ گزشتہ روز بھی صفائی کے نام پر پھولنگر گرڈ سے بجلی فراہم کرنے والے درجن بھر فیڈر صبح 9بجے سے شام 5بجے تک بند رہیں گے۔ اس صورتحال پر شہریوں میں تشویش پائی جاتی ہے۔
گرمی‘ لوڈشیڈنگ