اسلام آباد(آن لائن) جے آئی ٹی کے سامنے پیش ہونے کے لئے آنیوالی شریف خاندان کی شخصیات کے پروٹوکول پر سرکاری خزانے سے تقریبا 2 کروڑ 18 لاکھ 86 ہزار 710 روپے سے زائد خرچ ہو گئے۔معتبر ذرائع کے مطابق نواز شریف کی جے آئی ٹی کے سامنے پیشی پر 2523 اہلکار و افسرا تعینات رہے، جس میں رینجرز، پولیس، سپیشل برانچ، انٹیلی جنس بیورو، ایف سی، ٹریفک پولیس و دیگر اداروں کے ملازمین شامل ہیں۔ جن پر سرکاری خزانے سے تقریبا 38 لاکھ 39 ہزار روپے خرچ ہوئے جبکہ نواز شریف کے بھائی شہباز شریف، نواز شریف کے سمدھی اسحاق ڈار کی پیشیوں کے موقع پر 13500 اہلکار وافسرتعینات رہے، ان کے پروٹوکول پر تقریبا 1 کروڑ 35 لاکھ 41 ہزار 888 روپے کا خرچ آیا جو کہ سرکاری خزانے سے ادا کیا گیا۔اعلی حکومتی شخصیات کے پروٹوکول پر جہاں سرکاری ملازمین و افسر تعینات رہے، وہاں وفاقی وصوبائی وزرائ، پارلیمانی سیکرٹریز، وزرائے مملکت، وفاقی و صوبائی سیکرٹریز و دیگر افسران بھی ان کے پروٹوکول کے لئے جوڈیشل اکیڈمی کے سامنے پہنچے، سرکاری پروٹوکول لیکر وفاقی وصوبائی وزرائ، وزرائے مملکت و دیگر عہدیدارا اپنی سیاسی جماعت کے حق میں اور اپنے لیڈر کے حق میں نعرے لگانے کے لئے جوڈیشل اکیڈمی پہنچے اور وہاں نعرے لگاتے رہے۔ذرائع کا دعویٰ ہے کہ وزیراعظم ہاو¿س کی جانب سے خصوصی طور پر یہ احکامات دیئے گئے تھے کہ سکیورٹی بڑھائی جائےاور انٹیلی جنس بیورو، سپیشل برانچ و دیگر ادروں کے افسران وملازمین کی خصوصی ڈیوٹیاں بھی لگائی گئیں اور ان کو مختلف اہم ذمہ داریاں دیکر رات گئے ہی تعینات کر دیا جاتا رہا ہے۔
