اسلام آباد، لاہور (نمائندگان نیا اخبار) حکومت نے تحریک لبیک کو مذاکرات کی دعوت دیتے ہوئے کہا ہے کہ دھرنے کے شرکاہ کو آخری وارننگ دے رہے ہیں ورنہ قانون حرکت میں آئے گا، خلاف قانون مطالبات نہیں مانیں گے۔ مذاکرات کے ذریعے معاملے کا حل چاہتے ہیں۔ ان خیالات کا اظہار وزیر مذہبی امور سردار یوسف، وزیر مملکت طلال چودھری اور طارق فضل چودھری نے پریس کانفرنس کے دوران کیا۔ سردار یوسف کا کہنا تھا کہ حکومت نے ذمہ داری نبھائی اور مسئلہ ختم کیا۔ طلال نے کہا کہ حکومت نے کوشش کی کہ مذاکرات کے ذریعے معاملہ حل ہو۔ طارق فضل نے کہا کہ پوسٹ میں فرد واحد کی غلطی کا نہیں کہا گیا۔ دریں اثنا تحریک لبیک کا دھرنا 8 ویں روز داخل ہو گیا۔ شرکا اور پولیس میں تصادم کے نتیجے میں ایس ایچ او سمیت 3 پولیس اہلکار زخمی ہو گئے۔ پبلک اکاﺅنٹس کمیٹی کے اچلاس میں آئی جی خالد خٹک نے کہا کہ چاہتے ہیں کہ تین چار دن میں علاقہ کلیئر ہو جائے گا۔ لاہور سے نمائندہ خصوصی کے مطابق اہلسنت کی 20 جماعتوں نے اسلام آباد دھرنے کی حمایت کا اعلان کر دیا۔ یہ اعلان حقوق اہلسنت محاذ کے دفتر میں ہونے والے اجلاس کے بعد مشترکہ اعلامیہ کے ذریعے کیا گیا۔ جن تنظیموں کے نمائندوں نے شرکت کی ان میں پیر سید شاہد گرویزی، صاجزادہ سید مختار رجوی اور دیگر شامل ہیں ۔ رہنماﺅں نے کہا کہ مطالبات پوری قوم کی آواز ہیں۔ دوسری طرف فیصل آباد ، لاہور، رینالہ خور اور دیگر شہروں میں احتجاج کا سلسلہ جاری رہا۔
