پشاور(ویب ڈیسک)پاک فوج کے شعبہ تعلقاتِ عامہ آئی ایس پی آر کے ڈائریکٹر جنرل میجر آصف غفور نے آرمی پبلک اسکول حملے میں نشانہ بننے والے طالب علم احمد نواز کو جی سی ایس ای امتحان میں نمایاں کامیابی حاصل کرنے پر مبارکباد دی اور مستقبل کے لیے نیک خواہشات کا اظہار کیا۔ احمد نواز، جو اب برطانیہ میں زیر تعلیم ہیں، پشاور کے آرمی پبلک اسکول کے طالب علم تھے اور 2014 میں دہشت گردی کے حملے میں زخمی ہوئے تھے جبکہ اسی اسکول میں زیر تعلیم ان کے بھائی حارث نواز اس حملے میں شہید ہوگئے تھے۔ میجر جنرل آصف غفور کا مزید کہنا تھا کہ’ آپ نے اپنی ہمت، مضبوط ارادے اور تعلیم کی طاقت سے دشمنوں کو شکست دے کر ہم سب کا سر فخر سے بلند کردیا‘۔ احمد نواز نے برطانوی امتحان میں کل 8 پرچوں میں سے 6 پرچوں میں اے گریڈ جبکہ 2 پرچوں میں اے ون گریڈ حاصل کیے اور اس بات کا اعلان انہوں نے ایک ٹوئٹ کے ذریعے کیا جس کے بعد معروف شخصیات سمیت بہت سے افراد کی جانب سے انہیں مبارکباد دینے اور نیک خواہشات کے اظہار کا تانتا بندھ گیا۔احمد نے امتحان میں نمایاں کامیابی حاصل کرنے پر خوشی کا اظہار کیا اور مزید تعلیم کے لیے آکسفورڈ یونیورسٹی میں داخلے کا فیصلہ کیا ہے۔آرمی پبلک اسکول حملے کے وقت احمد کی عمر 14 برس جبکہ ان کے شہید ہونے والے بھائی اور سب سے قریبی دوست حارث کی عمر 13 برس تھی، اس حملے میں احمد نواز کا بازو بری طرح زخمی ہوا تھا، جس کے بعد وہ برطانوی دارالحکومت لندن کے علاقے برمنگھم کے کوئین ایلزبتھ ہسپتال میں 3 ماہ زیرِ علاج رہے۔کچھ دن قبل برطانوی اخبار دی مرر کو دیے گئے ایک انٹرویو میں احمد نواز کا کہنا تھا کہ ’میں نے اپنی آنکھوں کے سامنے اپنے اساتذہ اور دوستوں کو شہید ہوتے ہوئے دیکھا ہے میں ان کی مدد کرنا چاہتا تھا لیکن میں نیچے گر گیا اور کچھ نہ کرسکا، میرا بچ جانا ایک معجزہ ہے‘۔بھائی کو کھو دینے کے بعد احمد نواز کو شدید صدمہ پہنچا جس کے بعد انہوں نے دہشت گردوں سے انتقال لینے کے لیے فوج میں شمولیت اختیار کرنے کا سوچا لیکن ہسپتال میں گزارے گئے دنوں کے دوران برطانوی خبریں دیکھ انہیں افسوس ہوا کہ ‘نوجوان انتہا پسندی کی جانب مائل ہورہے ہیں’۔جس کے بعد ان کی سوچ میں واضح تبدیلی آئی اور انہوں نے فیصلہ کیا کہ وہ اپنے ساتھ پیش آنے والے واقعات لوگوں تک پہنچا کر انتہا پسندی کی سوچ کو پروان چڑھنے سے روکیں گے تاکہ ان کی طرح کوئی اور اپنا بھائی نہ کھو سکے۔صحت یابی کے بعد احمد نواز نے برطانوی محکہ داخلہ کے ساتھ مل کر انتہا پسندی کے فروغ پاتے رجحانات کے خلاف کام کیا اور اس ضمن میں متعدد مواقع پر لیکچرز دیے جبکہ کئی ایوارڈ بھی حاصل کیے۔

لاہور (ویب ڈیسک)عید الاضحیٰ کو پکوانوں کا تہوار کہا جائے تو غلط نہیں ہوگا، کیونکہ ہر ایک ہی مختلف طرح کے کھانوں سے لطف اندوز ہوتا ہے۔مگر کیا آپ اس عید ایک ایسا پکوان کھانا پسند کریں گے جو کہ حضرت محمد صلی اللہ علیہ و آلہ وسلم کا پسندیدہ ترین پکوان تھا؟اگر ہاں تو ثرید نامی پکوان کو کبھی کھا کر آپ نے دیکھا جو عام طور پر شوربے میں روٹی کو بھگو کر تیار کیا جاتا ہے۔اس حوالے سے کئی احادیث بھی موجود ہیں جیسے حضرت ابن عباس رضی اللہ تعالیٰ فرماتے ہیں ‘حضور نبی کریم صلی اللہ علیہ وآلہ وسلم کا محبوب ترین کھانا روٹی کا ثرید تھا’۔ (ابو داو¿د شریف)اسی طرح صحیح بخاری میں آیا ہے ‘عائشہ صدیقہ رضی اللہ تعالٰی عنہا کی فضیلت تمام عورتوں پر ایسے ہے جیسے ثرید کی فضیلت تمام کھانوں پر’یہ زودہضم ہونے کی وجہ سے نظام ہاضمہ کے لیے بھی بہترین ہے، جبکہ اس کے دیگر فوائد بھی ہیں اور کچھ افراد کے خیال میں یہ طبیعت مالش ہونے پر بھی فائدہ مند ثابت ہوتا ہے۔
ثرید کے لیے درکار اجزائ
600 گرام بون لیس بھیڑ یا گائے کا گوشت جسے چھوٹی بوٹیوں میں کاٹ لیں
لوکی کا آدھا حصہ جسے ٹکڑوں میں کاٹ لیں
دو کھانے کے چمچ زیتون کا تیل
ایک بڑے سائز کی پیاز، جسے اچھی طرح کاٹ لیں
لہسن کی تین سے چار پوتھیاں، اچھی طرح کاٹ لیں
ادرک کا آدھا انچ کا ٹکڑا، اچھی طرح کاٹ لیں
ایک چائے کا چمچ ٹماٹر کا پیسٹ
ایک بڑے سائز کا ٹماٹر، جسے کاٹ لیں
نمک اور کالی مرچ حسب ذائقہ
1/4 چائے کا چمچ ہلدی
1/4 چائے کا چمچ سرخ مرچ پاﺅڈر
1/4 چائے کا چمچ گرم مصالحہ پاﺅڈر
1/4 چائے کا چمچ دھنیا پاﺅڈر
1/4 چائے کا چمچ زیرہ پاﺅڈر
ایک چائے کا چمچ دہی
ایک لیٹر ابلا ہوا پانی
پکانے کا طریقہ
زیتون کے پکانے کے برتن میں ڈال کر چولہے پر رکھ دیں اور پھر اس میں پیاز، لہسن اور ادرک کا اضافہ کریں، انہیں اس وقت تک تلیں جب تک ہلکے سے گولڈن رنگ کے نہ ہوجائیں۔اس کے بعد اس میں مصالحے ڈالر کر اس مکسچر کو ایک منٹ تک پکائیں۔اس پر ٹماٹر کا پیسٹ اور کٹے ہوئے ٹامٹر ڈال دیں جبکہ حسب ذائقہ نمک اور معمولی سا پانی بھی۔ اس مکسچر کو اس وقت تک پکائیں جب تک ٹماٹر پیسٹ کی شکل اختیار نہ کرلیں اور تیل مکسچر سے الگ نہ ہوجائے۔اس کے بعد گوشت کا اضافہ کریں اور چولہے کی آنچ بڑھا دیں، جبکہ مکسچر کو چمچ سے ہلاتے رہیں۔اس کے بعد ابلے وئے پانی کا اضافہ کرکے اسے ابلنے کے لیے رکھ دیں، جب یہ ابل جائے تو آنچ کو ہلا کرکے برتن کو ڈھانک دیں اور گوشت کو اس تک پکائیں جب تک وہ گل نہ جائیں۔جب گوش گل جائے تو اس میں دہی اور لوکی کو ڈال کر مزید پندرہ منٹ تک پکائیں۔جب سالن پک جائے تو چولہا بند کرکے دھنیا پودینا سے اسے سجائیں اور چپاتی یا روٹی توے پر تیار کرکے ٹکڑے کریں اور پلیٹ میں رکھ دیں۔اب اس کے اوپر ثرید کو ڈالیں اور گرم گرم ہی پیش کریں۔

لاہور(و یب ڈیسک)شہبازشریف کیخلاف تہلکہ خیز بیانات داغنے والے عابد باکسر خود مشکل میں پھنس گئے ،عدالت نے پنجاب پولیس کے سابق ایس ایچ او عابد باکسر کی عبوری ضمانتیں خارج کر دیں۔میڈیا رپورٹس کے مطابق لاہور کی مقامی عدالت کے ایڈیشنل سیشن جج نے پنجاب پولیس کے سابق ایس ایچ او عابد باکسر کی 2مقدمات میں عبوری ضمانتیں خارج کر دیں۔عدالت نے ریمارکس دیئے کہ عابد باکسر عبوری ضمانتیں کرانے کے بعد عدالت میں پیش نہیں ہوئے اور مقدمات کی عدم پیروی پر ضمانتیں خارج کی گئیں ہیں پنجاب پولیس کے سابق ایس ایچ او عابد باکسر کے خلاف حساس ادارے کے افسر کی بیوی کے قتل سمیت 8 مقدمات درج ہیں،عابدباکسر پر کئی افراد کو جعلی پولیس مقابلوں میں مارنے کے بھی الزامات ہیں۔

سیالکوٹ(ویب ڈیسک)صوبہ پنجاب کے شہر سیالکوٹ کے علاقے ڈسکہ کے قریب ایک تیز رفتار کار درخت سے ٹکرا گئی، جس کے نتیجے میں پکنک مناکر گجرانوالہ لوٹنے والے 4 دوست جاں بحق جبکہ 2 زخمی ہوگئے۔ حادثے میں جاں بحق ہونے والے نوجوانوں کا تعلق گجرانوالہ سے بتایا گیا۔واقعہ سیالکوٹ کی تحصیل ڈسکہ کے علاقے راجوکے میں پیش آیا جہاں تیز رفتار کار بے قابو ہو کر درخت سے ٹکرا گئی۔ حادثے کے نتیجے میں کار میں سوار نوجوان حسن، روشن، معظم اور حسام زیب موقع پر ہی جاں بحق ہوگئے جبکہ 2 دوست شدید زخمی ہوگئے۔زخمیوں کو طبی امداد کے لیے ڈسکہ سول اسپتال منتقل کردیا گیا۔جاں بحق ہونے والے نوجوانوں کا تعلق گجرانوالہ سے بتایا گیا ہے۔

اسلام آباد(ویب ڈیسک)’ہم ہمارے حکمرانوں کو ایوانوں میں لے تو آتے ہیں ووٹ دے کر لیکن آج تک ہم نے یاد نہیں رکھا کہ وہ کون سے وعدے کر کے ایوان میں آئے تھے اور کیا ایوان میں آنے کے بعد انھوں نے ان وعدوں کو پورا کیا‘۔ پاکستان کے ایک شہری سلمان سعید نے اس دلیل کے ساتھ ایک ویب سائٹ بنائی ہے جس کا نام ہے ’خان میٹر ڈاٹ کام‘۔ویب سائٹ کے تعارف میں انھوں نے اپنے آپ کو جمہوریت کا ایک ادنیٰ کارکن کہا ہے۔ ’خان میٹر‘ کے فیس بک پیج پر اپنے وڈیو بیان میں سلمان نے مزید کہا کہ ووٹروں کو یہ بھی دیکھنا چاہیے کہ اگر حکمرانوں نے وعدے پورے کیے تو اس سے معاشرے کو کیا فائدہ ہوا اور اگر وہ وعدے پورے نہیں ہوئے اس کی کیا وجہ تھی۔ویب سائٹ بنانے کی وجہ بتاتے ہوئے انھوں نے لکھا کہ انھوں نے نئے پاکستان کے لیے ووٹ دیا اور اب اس کو حاصل کرنا بھی ان کا کام ہے اور حکومت کا مقصد صرف یہ یقینی بنانا ہے کہ ان کے راستے میں کوئی رکاوٹ نہ آئے۔ ویب سائٹ میں پاکستان تحریک انصاف کی طرف سے ایک سو دنوں میں مختلف شعبوں میں کیے گئے وعدوں کا حساب رکھا جائے گا اور جوں جوں ویب سائٹ بنانے والوں کی نظر میں کوئی وعدہ پورا ہو گا اس کا اندراج ہو جائے گا۔ اب یہ ویب سائٹ کتنی قابل اعتبار اور غیر جانبدار ہو گی اس کا فیصلہ تو وقت کے ساتھ ہی ہوگا۔’خان میٹر‘ پر لوگوں نے اپنی رائے کا اظہار کیا ہے۔ ایک صاحب خان ذوالفقار نے لکھا کہ یہ تو پارٹی کی اپنی طرف سے بنائی گئی ویب سائٹ ہے جبکہ ان کے جواب میں وجیہ نے لکھا کہ اگر پی ٹی آئی نے خود بھی بنائی ہے تو اچھا اقدام ہے۔پھر جلال فدا نے لکھا کہ سو دن کے ایجنڈے کی تشریح انتہائی تنگ نظری سے کی جا رہی ہے۔ ستر سال کا گند ایک سال میں نہیں صاف ہو سکتا۔ ان کے جواب میں عثمان خلیل نے لکھا کہ ہم اس وعدے کو اس لیے سنجیدگی سے لے رہے ہیں کیونکہ انھوں نے یہ وعدہ کیا تھا۔ انھوں نے کہا کہ کوئی ان وعدوں کو سو دن میں پورا ہونے کی توقع نہیں کرتا لیکن ان پر کام شروع ہونا چاہیے ان میں سے کم سے کم ستر فیصد پر۔