بچوں کو جنسی زیادتی کا نشانہ بنانیوالوں کیخلاف کارروائی کی جائے: پوپ فرانسس

نیو یارک (این این آئی) رومن کیتھولک مسیحیوں کے روحانی پیشوا پوپ فرانسس نے واضح طور کہا ہے کہ کم سن بچوں کو جنسی تشدد کا نشانہ بنانے والے پادریوں اور مذہبی پیشواو¿ں کے خلاف منظم کارروائی کرنے کا وقت آگیا ہے۔ پاپائیت کے مرکز ویٹی کن میں شروع ہونےوالی 4 روزہ کانفرنس کے افتتاحی سے خطاب کرتے ہوئے پوپ فرانسس نے کہا کہ پوری دنیا کی نگاہیں ہماری طرف امید سے دیکھ رہی ہیں اور اب مجرموں کے خلاف ٹھوس اقدامات اٹھانے کا وقت آچکا ہے۔ میڈیا رپورٹ کے مطابق یہ کانفرنس چرچز میں پادریوں کی جانب سے جنسی زیادتی و جنسی تشدد کا نشانہ بنائے گئے بچوں کو انصاف فراہم کرنے اور ایسے واقعات کو روکنے کےلئے منعقد کی گئی ہے۔ اس کانفرنس کے دوران 114 اعلیٰ بشپ کو ایسے واقعات روکنے اور مذہبی تعلیمات مکمل کرنے کے بعد دنیا بھر میں خدمات کےلئے بھیجا جائے گا، اگرچہ اس کانفرنس میں مسیحیت کے دیگر موضوعات بھی زیر بحث آئینگے، تاہم کانفرنس کا فوکس پادریوں کی جانب سے جنسی تشدد کی آنیوالی خبریں ہونگی۔ کانفرنس کے پہلے ہی دن پوپ فرانسس نے اپنے خطاب میں اس بات پر زور دیا کہ کم سن بچوں پر تشدد کرنے والوں کے خلاف منظم کارروائی کی جائے۔ پوپ فرانسس نے کہا کہ تشدد کا نشانہ بننے والے معصوم بچے ان کی طرف امید سے دیکھ رہے ہیں اور اللہ کے نیک بندے بھی ہم سے انصاف کی امیدیں لگائے بیٹھے ہیں۔ پوپ فرانسس نے کانفرنس میں موجود بشپس اور دیگر مذہبی پیشواو¿ں کو مخاطب ہوتے ہوئے کہا کہ وہ اس معصوم بچے کے رونے کی آواز سنیں جو ہم سے انصاف مانگ رہا ہے۔ مسیحیوں کے روحانی پیشوا نے واضح طور پر کہا کہ متاثرین اور ان کے اہل خانہ ظلم کی مذمت نہیں بلکہ ظالموں کے خلاف منظم کارروائی چاہتے ہیں اور اب وقت آ چکا کہ ہم بچوں پر ظلم کرنے والوں کے خلاف ٹھوس کارروائی کریں۔