پہلی بار ٹائٹل جیتنے کے لئے پر امید :سرفراز

کراچی(نیوزایجنسیاں)پاکستانی ٹیم اورکوئٹہ گلیڈی ایٹرزکے کپتان سرفراز احمد نے کہا کہ اپنے شہر میں اپنے مداحوں کے درمیان کھیل کر بہت لطف آیا۔تیسری بارپی ایس ایل فائنل میں ٹیم نے رسائی حاصل کی ہے ۔امید ہے اس بارفائنل نام کرکے پہلی بارٹائٹل جیتیں گے۔پی ایس ایل فور کے فائنل میں رسائی پانے والی کوئٹہ گلیڈی ایٹر زکے کپتان سرفراز احمد نے کہا ہے کہ پشاور زلمی کے خلاف کامیابی ٹیم ورک کا نتیجہ ہے۔ شین واٹسن نے عمدہ جارحانہ اننگ کھیل کی جیت میں کلیدی کردار ادا کیا،ٹائٹل جیتنے کے لیے بہت پر امید ہیں۔میڈیاسے گفتگو کرتے ہوئے سرفراز احمد نے کہا کہ ہماری ٹیم پورے ایونٹ میں اچھاکھیلی ہے،اپنے شہر میں اپنے مداحوں کے درمیان کھیل کر بہت لطف آیا۔رواں سیزن میں کوئٹہ کے اہم کھلاڑی شین واٹسن سمیت کئی غیر ملکی کھلاڑی پاکستان میں کھیلنے پہنچے ہیں۔شین واٹسن 332 رنز کے ساتھ سب سے زیادہ رنز بنانے والوں کی فہرست میں ٹاپ پر ہیں۔ خیال رہے کہ شین واٹسن نے پشاور زلمی کیخلاف 91 رنز کی اننگز کھیل کر کوئٹہ کو پلے آف میں پہنچایا۔سرفراز کی ٹیم کی اس شاندار کارکردگی کے بعد توقع کی جاسکتی ہے کہ ان کی ٹیم اس بار اپنے کپتان سرفراز کودھوکا نہیں دے گی اور پی ایس ایل چیمپئن بننے کا خواب پورا کرے گی۔کوئٹہ گلیڈی ایٹر کے منیجراعظم خان کے مطابق دوران میچ کیچ لیتے ہوئے گیند لگنے سے زخمی ہونے والے ٹیم کے کھلاڑی فواد احمد اپنے دانت سے محروم ہوگئے، آج نجی اسپتال میں ان کی سرجری ہوگی۔واضح رہے کہکوالیفائر میچ میں کوئٹہ گلیڈی ایٹرز نے پشاور زلمی کو 10 رنز سے شکست دیکر فائنل میں جگہ بنائی تھی۔پشاور زلمی 187 رنز کے ہدف کے تعاقب میں مقررہ اوورز میں 7 وکٹوں کے نقصان پر 176 رنز بناسکی تھی۔