لاہور (خصوصی رپورٹ) حکومت نے مسلم لیگ ن کی طرف سے پنجاب میں متوقع عدم اعتماد کی تحریک لانے اور مولانا فضل الرحمن کے 6جماعتی اتحاد کی طرف سے حکومت مخالف مہم کے خلاف حکمت عملی وضع کرلی ہے جس کے تحت عدم اعتماد تحریک کو بھرپور طریقے سے ناکام بنایا جائے گا مولانا فضل الرحمن کو جلسے جلوس کرنے کیلئے فری ہینڈ دینے لیکن قانون ہاتھ میں لینے، توڑ پھوڑ شہریوں کیآمدورفت میں رکاوٹ، سرکاری نجی املاک کو نقصان پہنچانے پر قانون حرکت میں آئے گا اور سخت ترین کارروائی کی جائے ذرائع نے بتایا کہ وزیراعظم عمران خان سردار عثمان بزدار کو ہی وزیراعلیٰ پنجاب برقرار رکھنا چاہتے ہیں ن لیگ کی طرف سے اگر تحریک عدم اعتماد پیش کی جاتی ہے تو اس کا مقابلہ کرنے کیلئے اتحادیوں سے رابطے تیز کرکے حکومتی اتحادیوں کو مسترد رکھنے کی بھرپور کوشش کی جائے گی ناراض اتحادیوں کو منانے کا سلسلہ بھی تیز کیا جائے گا اس سلسلہ میں حکومتی وفد ق لیگ سے آج ملاقات کریں گے۔ تحریک انصاف کا وفد اپنی اتحادی جماعت کے تحفظات دور کرنے کی کوشش کرے گا۔ ملاقات لاہور میں چودھری برادران کے گھر پر ہوگی۔ حکومت کی مذاکراتی ٹیم میں وفاقی وزیر دفاع پرویز خٹک، وفاقی وزیر اسد عمر، گورنر چودھری محمد سرور، وزیراعلیٰ پنجاب عثمان بزدار اور وفاقی وزیر شفقت محمود شامل ہونگے۔ ق لیگ کی جانب سے ملاقات میں سپیکر پنجاب اسمبلی چودھری پرویز الہیٰ چودھری مونس الہیٰ وفاقی وزیر طارق بشیر چیمہ اور چودھری سالک حسین شریک ہونگے۔ ملاقات دوپہر ساڑھے بجے ہوگی جس میں حکومتی کمیٹی اور ق لیگ کے درمیان موجود سیاسی اتحاد کے حوالے گفت و شنید کی جائے گی۔ وفاقی وزیر اسد عمر کراچی میں ہیں اور ایم کیو ایم کے مطالبات کی روشن میں شہر قائد میں ترقیاتی منصوبے جاری کرنے کے انتظامات کا جائزہ لے رہے ہیں۔ حکومتی وفد جلد بلوچستان نیشنل پارٹی کے رہنما اختر مینگل سے بھی ملاقات کرے گا اس کے علاوہ 4آزاد ارکان جن میں سے دو چودھری نثار اور جگنو محسن نے تاحال رکنیت کا حلف نہیں اٹھایا سے بھی رابطے کرکے حمایت حاصل کرنے کی کوشش کی جائے گی۔ دوسری طرف عوام کو ریلیف دینے کیلئے مہنگائی میں کمی لانے کے اقدامات اور ذمہ داروں کو سزا دینے کا بھی وزیراعظم نے اعلان کردیا ہے ارکان اسمبلی کو ترقیاتی منصوبوں کیلئے فنڈز جاری کرنے کی تجویز بھی زیر غور ہے نچلی سطح پر عوامی مسائل کے حل کیلئے بلدیاتی نظام میں ترامیم کرکے فوری بلدیاتی الیکشن کانے پر بھی کام جاری ہے وزیراعظم نے ارکان اسمبلی کو عوام سے براہ راست رابطے کرکے ان کے مسائل و مشکلات سے آگہی حاصل کرنے کی ہدایت بھی دی ہے جبکہ ذرائع کے مطابق رواں ماہ میں انتہائی اہم اقدامات کا اعلان کرنے والے ہیں جن کے بعد اپوزیشن کے پاس شائد سیاسی دکانداری چمکانے کیلئے کوئی ایشو نہیں رہے گا۔
