کم آمدنی والے طبقے کیلئے راشن کارڈ جاری کرنے کے منصوبے پر غور

وزیراعظم عمران خان نے کہا ہے کہ حکومت غریب عوام کی تکالیف پر خاموش تماشائی نہیں بن سکتی لہٰذا عوام کو ریلیف فراہم کرنے کے لیے حکومت ہر حد تک جائے گی۔سماجی رابطوں کی ویب سائٹ فیس بک پر جاری ایک بیان میں بتایا گیا کہ وزیراعظم عمران خان کی زیر صدارت عوام الناس، خصوصاً غریب اور تنخواہ دار طبقے کو مہنگائی سے ریلیف فراہم کرنے کے حوالے سے ایک اجلاس ہوا۔اجلاس میں وزیراعظم کی معاون خصوصی برائے سماجی تحفظ ڈاکٹر ثانیہ نشتر، چیئرمین یوٹیلٹی اسٹورز ذوالفقار علی خان، وزارت خزانہ، صنعت و پیداوار اور سماجی تحفظ ڈویژن کے وفاقی سیکریٹری، ایم ڈی یوٹیلٹی اسٹور اور دیگر سینئر افسران شریک ہوئے۔مذکورہ اجلاس میں غریب اور تنخواہ دار طبقے کو مہنگائی سے ریلیف فراہم کرنے اور اشیائے ضروریات کی سستے داموں فراہمی کے حوالے سے اقدامات کا جائزہ لیا گیا۔