کراچی: (ویب ڈیسک) پاکستان پیپلزپارٹی نے مسجد نبویﷺ کے واقعے کے خلاف کل سندھ بھر میں احتجاج کا اعلان کیا ہے۔
پی پی رہنما نثار کھوڑو کا کہنا تھاکہ مسجد نبوی ﷺ کی توہین کے خلاف کل سندھ میں احتجاج ہوگا۔
ان کا کہنا تھاکہ ریاست مدینہ کی دعویدار پی ٹی آئی مدینہ میں کھڑے ہوکر مدینے کی بے حرمتی کر رہی ہے، عمران خان اور اس کی ٹیم اقتدار جانے کے بعد ہوش و حواس کھو بیٹھی ہے، عمران خان کا ایجنڈا اقتدار، جھوٹ، انتشار، فساد اور عوام کی بربادی کرنا ہے۔
ان کا کہنا تھاکہ دوسروں کو چور کہنے والے عمران خان سب سے بڑے مکار اورڈاکو ہیں۔
واضح رہے کہ گزشتہ روز مسجد نبوی ﷺ میں وفاقی وزرا کی موجودگی کے موقع پر ناخوشگوار واقعہ پیش آیا جس میں کچھ افراد نے چور چور کےنعرے لگائے اور مریم اورنگزیب کو گالیاں دیں۔
اس کے علاوہ وفاقی وزیر شاہ زین بگٹی کے بال بھی کھینچے گئے جبکہ اس نعرے بازی میں پی ٹی آئی کے رہنما اور عمران خان کے سابق مشیر صاحبزادہ جہانگیر بھی پیش پیش تھے تاہم صاحبزادہ جہانگیر نے تردید کی ہے۔
مسجد نبویﷺ کواقعے کے بعد پاکستانی عوام میں شدید غم و غصہ پایا جاتا ہے اور سوشل میڈیا پر تحریک انصاف اور سابق وزرا کو شدید تنقید کا نشانہ بنایا جا رہا ہے۔
پی پی کا مسجد نبویﷺ کی بیحرمتی کیخلاف کل سندھ بھر میں احتجاج کا اعلان
