بیجنگ:(ویب ڈیسک) چین اور پاکستان کے درمیان سائنس اور ٹیکنالوجی کے شعبے میں دو طرفہ تعاون کو فروغ دینے کے لیے ایک سنگ میل کے طور پر چائنہ میں ایس اینڈ ٹی سینٹر قائم کر دیا گیا ہے۔
اس سلسلے میں بیجنگ میں ایک ویبینار منعقد ہوا جس میں پاکستان کے سپیشل ٹیکنالوجی زونز اتھارٹی (ایس ٹی زیڈ اے ) اور چین کے ژونگ گوانکون بیلٹ اینڈ روڈ انڈسٹریل پروموشن ایسوسی ایشن(زیڈ بی آر اے) نے اس سینٹر کا آغاز کیا۔
ویبینار میں چین میں پاکستان کے سفیر معین الحق نے خطاب کرتے ہوئے کہا کہ وزیر اعظم محمد شہباز شریف کے حالیہ دورہ چین کے دوران انفارمیشن ٹیکنالوجی چائنہ پاک تعاون کے ایک اہم شعبے کے طور پر ابھری ہے جس کا ثبوت سی پیک کے تحت مشترکہ ورکنگ گروپ ایس اینڈ ٹی کا قیام ہے
اس موقع پر چین کے ژونگ گوانکون بیلٹ اینڈ روڈ انڈسٹریل پروموشن ایسوسی ایشن(زیڈ بی آر اے) کے صدر ژانگ ژیائوڈونگ نے کہا کہ ہم اس سینٹر کو ایک پلیٹ فارم کے طور پرچین اور پاکستان کی تمام جماعتوں کو متحرک کرنے، خاص طور پر ہائی ٹیک انٹرپرائزز اور اداروں کو سائنس اور ٹیکنالوجی کے تعاون کیلئے وسائل تیار کرنے کیلئے استعمال کریں گے۔ انہوں نے کہا کہ ایس اینڈ ٹی انٹرپرائزز کا ایک چینی وفد فیلڈ انویسٹی گیشن کے لیے آئندہ سال پاکستان کا دورہ کرے گا۔
پاکستان کے سپیشل ٹیکنالوجی زونز اتھارٹی (ایس ٹی زیڈ اے ) کے صدر حمزہ سعید اورکزئی نے ایس اینڈ ٹی سینٹر کو چینی کاروباری اداروں کیلئے رابطہ دفتر قرار دیتے ہوئے کہا کہ ایس اینڈ ٹی سینٹر جدت پسندی کو فروغ دینے کے علاوہ ٹیکنالوجی کی منتقلی،تعاون اور سرحد پار سرمایہ کاری کے لیے کاروباری پلیٹ فارم تشکیل دیا جائے گا اور عوامی اور مطالعاتی سطح پر وفود کے تبادلے اور طلبہ کے تعاون کے چینلز کو کاروبار بنانے کے لیے ڈیزائن کیا جائے گا۔
پاکستان کے ساتھ ٹیکنالوجی کے فروغ کیلئے چین میں سنٹر قائم
