ملک میں توانائی کا بحران برقرار ہے، بجلی کا شارٹ فال 4 ہزار 252 میگاواٹ ریکارڈ کیا گیا ۔
پاور ڈویژن ذرائع کے مطابق ملک میں بجلی کی مجموعی پیداوار 22 ہزار 248 میگاواٹ ہے جبکہ طلب 26 ہزار 500 میگاواٹ سے زائد ہے۔ شدید گرمی اور ہیٹ ویو کی موجودہ لہر میں شارٹ فال کے باعث ملک کے طول و عرض میں غیر اعلانیہ بجلی بندش کا سلسلہ جاری ہے۔
اس وقت شہروں میں آٹھ اور دیہات میں دس گھنٹے تک لوڈشیڈنگ کی جارہی ہے۔

وزیراعظم شہباز شریف سے ایم کیو ایم پاکستان کے کنوینر خالد مقبول صدیقی نے ملاقات کی جس کے دوران موجودہ ملکی سیاسی صورتحال پر گفتگو اور تفصیلی مشاورت ہوئی۔
وزیراعظم شہباز شریف کا ملاقات کے دوران کہنا تھا کہ مستقبل میں قومی مفاد کے فیصلوں میں اتحادیوں کا تعاون بہت اہمیت رکھتا ہے، انہوں نے حکومتی اصلاحات کے نفاذ میں اتحادی جماعتوں کے تعاون کا خیر مقدم کیا۔
متحدہ رہنما نے فلاحی منصوبوں کو حکومت کی اولین ترجیحات میں شامل کرنے پر اظہار تشکر کیا اور کراچی کی عوام کیلئے ترقیاتی منصوبوں پر فوری عملدرآمد کی ہدایات پر وزیراعظم کو خراجِ تحسین پیش کیا۔
دوسری جانب حکومت کو درپیش چیلنجز سے نمٹنے کیلئے وزیراعظم نےاتحادی جماعتوں کے قائدین کا مشاورتی اجلاس آج طلب کر رکھا ہے جس میں سیاسی، معاشی صورتحال اور انتخابی اصلاحات پر مشاورت ہو گی، حکومت کے مستقبل کے حوالے سے اہم بھی متوقع ہیں۔
اجلاس میں انتخابی اصلاحات پر بھی مشاورت ہو گی۔ وزیر اعظم بعد ازاں کابینہ کو بھی معاملے پر اعتماد میں لیں گے۔

وزیر اعظم شہباز شریف نے صوبوں کی جانب سے گندم کی خریداری کے لیے دئیے گئے اہداف پورے نا کرنے پر شدید برہمی کا اظہار کرتے ہوئے درآمدی گندم کی شفاف تقسیم کے لیے فوری کمیٹی قائم کرنے کی فوری ہدایت کردی۔

وزیر اعظم شہباز شریف نے صوبوں کی جانب سے گندم کی خریداری کے لیے دئیے گئے اہداف پورے نا کرنے پر شدید برہمی کا اظہار کیا ہے۔ انہوں نے ہدایت کی ہے کہ صوبے یکم جون تک گندم خریداری کے اہداف پورے کریں۔

وزیراعظم شہباز شریف کی زیرِ صدارت گزشتہ کابینہ اجلاس میں ملک میں گندم کی پیداوار، موجودہ ذخائر اور صوبائی و قومی سطح پر کھپت کے حوالے سے غور کیا گیا تھا، اجلاس میں بتایا گیا کہ رواں سال گندم کی مجموعی پیداوار کا ہدف دو کروڑ 29 لاکھ میٹرک ٹن مقرر کیا گیا تھا۔

اجلاس میں بتایا گیا تھا کہ رواں برس ملک میں گندم کی پیداوار دو کروڑ 26 لاکھ میٹرک ٹن مجموعی کھپت 3 کروڑ میٹرک ٹن ہوگی۔ ضرورت کے مقابلے میں گندم کی کم پیداوار کی وجہ سے وفاقی کابینہ نے ملک میں 30 لاکھ گندم کی درآمد کی منظوری دی تھی۔

اب وزیر اعظم نے بیرون ملک سے منگوائی جانے والی گندم کی صوبوں میں شفاف تقسیم کے لیے فوری کمیٹی قائم کرنے کی ہدایت کردی ہے۔

وزیر اعظم کا کہنا تھا کہ عوام کو کسی صورت مشکل میں نہیں ڈالا جا سکتا، کسی قسم کی کمی کو برداشت نہیں کیا جاسکتا،وفاقی حکومت ہر صورت کم قیمت پر آٹا فراہم کرے گی۔

واضح رہے کہ گزشتہ برس ملک میں دو کروڑ 28 لاکھ میٹرک ٹن گندم کی پیداوار ہوئی تھی، اس کے باوجود 20 لاکھ ٹن گندم درآمد کی گئی تھی۔

پاکستان تحریک انصاف کے رہنماء فواد چوہدری کا کہنا ہے کہ عمران خان کو کو گرفتار کرنے والا اپنا کمبوڈیا کا پاسپورٹ بنوا لے۔
سپریم کورٹ کے باہر میڈیا کے سوالات کا جواب دیتے ہوئے سابق وزیر اطلاعات فواد چوہدری نے کہا کہ رانا ثنااللہ پاگل ہی ہو گا اگر عمران خان کو گرفتار کرے گا، جس نے بھی عمران خان کو گرفتار کیا اس کا پاکستان میں رہنا مشکل ہو جائے گا۔ عمران خان کو گرفتار کرنے والا اپنا پاسپورٹ کمبوڈیا کا بنوا لے۔
انہوں نے کہا کہ سپریم کورٹ سے استدعا تھی کہ الیکشن کمیشن کا نئی حلقہ بندیوں کا شیڈول آئین کے منافی ہے، ایسا کرنا محض مردم شماری کے بعد ہی ممکن ہے۔ اگر نئی حلقہ بندیوں کو مانا جاتا ہے تو ایک سال تک ملک میں الیکشن نہیں ہوسکیں گے۔ الیکشن کمیشن کو ہر وقت انتخابات کے لیے تیار رہنا چاہیے۔
فواد چوہدری نے کہا کہ ہمیں 90 دن سے ایک بھی دن اوپر عبوری حکومت منظور نہیں، آج انتخابات کا اعلان کریں جس کے بعد پاکستان کے مسائل حل تلاش کریں گے۔

تربت: سی ٹی ڈی اور وومن پولیس نے کارروائی کرتے ہوئے سی پیک روٹ پر چینی قافلے کو نشانہ بنانے کے لیے تیار کی گئی خاتون خودکش بمبار کو گرفتار کرلیا۔

ترجمان سی ٹی ڈی کے مطابق تربت سی ٹی ڈی اور وومن پولیس نے خفیہ اطلاع پر ہوشاب میں آپریشن کے دوران خودکش بمبار خاتون کو گرفتار کرلیا ہے جس کے قبضے سے دھماکا خیز مواد اور ڈیٹونیٹر برآمد ہوئے ہیں۔

سی ٹی ڈی حکام نے بتایا کہ خاتون کا تعلق کالعدم تنظیم بی ایل اے مجید بریگیڈ سے ہے، دہشت گردوں کی جانب سے تیار خود کش بمبار خاتون سی پیک روٹ پر چینی قافلہ کو نشانہ بنانا جاہتی تھی اور گرفتار خاتون کا تعلق اسی گروپ سے ہے جس نے کراچی یونیورسٹی میں خودکش حملہ کیا تھا۔