وفاقی حکومت نے ایک بار پھر عوام کو سبسڈی دیتے ہوئے پیٹرولیم مصنوعات کی قیمتوں میں اضافہ نہ کرنے کا اعلان کیا ہے۔

اسلام آباد میں پریس کانفرنس کرتے ہوئے وزیر خزانہ مفتاح اسماعیل کا کہنا تھا اس وقت حکومت کا پیٹرولیم مصنوعات کی قیمت بڑھانے کا کوئی ارادہ نہیں ہے، وزیراعظم شہباز شریف نے عوام پر بوجھ ڈالنے سے انکار کر دیا ہے۔

وزیر خزانہ کا کہنا تھا کہ سابق وزیر خزانہ شوکت ترین نے عالمی مالیاتی فنڈ (آئی ایم ایف) سے وعدہ کیا تھا کہ ہم پیٹرولیم مصنوعات پر سبسڈی ختم کریں گے، ہم آئی ایم سے مذاکرات کریں گے اور معاملات کو خوش اسلوبی سے حل کریں گے۔

راولپنڈی: (ؤیب ڈیسک) سابق وزیر داخلہ شیخ رشید احمد نے دعویٰ کیا ہے کہ 31 مئی تک ڈالر 200 روپے کا ہو جائے گا۔
سابق وزیر داخلہ شیخ رشید احمد نے میڈیا سے گفتگو میں کہا کہ مہنگائی 30 فیصد بڑھ گئی ہے اور 31 مئی تک ڈالر 200 روپے کا ہو جائے گا۔ مہنگائی بڑھ جائے گی اور ہمارا ملبہ بھی ان پر پڑے گا۔
انہوں نے کہا کہ آصف علی زرداری نے گھیر کر آپ کو فیصل آباد کے گھنٹہ گھر میں مارا ہے اور آصف زرداری نے آپ کے ساتھ وہ کیا ہے کہ نہ آپ ادھر کے رہے نہ ادھر کے۔ پاسپورٹ مل گیا ہے اب نواز شریف کو واپس بلائیں۔
شیخ رشید احمد نے کہا کہ 2 وزیر خزانہ ہیں مفتاح اسماعیل اور اسحاق ڈار۔ اس جہاز سے ہی لوگ اتر جائیں گے کہ ان کے ساتھ سفر نہیں کرنا۔
انہوں نے کہا کہ جس نے یہ ماسٹر پلان بنایا اس نے عمران خان کی خدمت کی ہے اور عمران خان ہیرو بن گیا ہے اور یہ لوگ زیرو ہو گئے ہیں۔ ان تمام جماعتوں کا ستیاناس ہو گیا ہے جبکہ اگر انتخابات میں تاخیر ہوئی تو یہ عمران خان کی خدمت ہو گی۔
سابق وزیر داخلہ نے کہا کہ یہ سارے ادارے ہمارے ادارے ہیں اور ہمیں ان اداروں پر فخر ہے۔ مجھے عظیم افواج پر ناز ہے۔
انہوں نے کہا کہ ملک میں کوئی حکومت نام کی چیز نہیں ہے۔ اب شہباز شریف قوم سے خطاب کر کے بتائیں اگر ملک ڈیفالٹ ہو گیا تو کیا کریں گے۔ نیشنل سیکیورٹی کمیٹی میں نگران وزیر اعظم پر اتفاق کریں، نگران حکومت لائیں اور گھر چلے جائیں۔

لاہور: (ؤیب ڈیسک) سیاسی جماعتیں الیکشن سے پہلے متحرک ہونے لگیں، نون لیگ آج گجرات، پی ٹی آئی فیصل آباد اور پی ایس پی کراچی میں پاور شو کرے گی۔
گرم موسم میں سیاسی پارہ بھی ہائی، مسلم لیگ ن آج گجرات کوٹلہ میں میدان سجائے گی، فٹ بال گراؤنڈ میں تیاریاں مکمل ہو گئیں۔ مریم نواز اور وزیر اعلیٰ پنجاب حمزہ شہباز کارکنوں سے خطاب کریں گے۔
فیصل آباد کے دھوبی گھاٹ گروانڈ میں تحریک انصاف سیاسی پاور شو کرنے جا رہی ہے جہاں رہنماوں کے خطاب کیلئے سٹیج تیار کر لیا گیا ہے جبکہ جلسہ گاہ میں کارکنوں کی آمد کا سلسلہ جاری ہے۔
کراچی میں بھی آج رونق لگے گی، باغ جناح گراوُنڈ میں آج پی ایس پی خواتین کا جلسہ کرنے جا رہی ہے،خواتین کے جلسے سے چیئرمین پی ایس پی مصطفی کمال خطاب کریں گے۔

اسلام آباد: (ؤیب ڈیسک) پاکستان تحریک انصاف (پی ٹی آئی) کے چیئرمین عمران خان کی سیکیورٹی کے لیے سیکرٹری داخلہ کو خط لکھ دیا گیا۔
سابق وزیر اعظم عمران خان کی فول پروف سیکیورٹی کے لیے عمران خان کے چیف آف اسٹاف شہباز گل نے سیکرٹری داخلہ کو خط لکھا۔ شہباز گل نے کہا کہ حیران ہوں کہ متعلقہ سیکشن افسر سیکیورٹی انتظامات کے لیے پوچھ رہا ہے۔
خط کے متن میں لکھا کہ ایک ضمانت پر مجرم خاتون کو ملٹی لئیر سیکیورٹی حصار فراہم کیے جا رہے ہیں جبکہ تحقیقاتی ادارے نے اس خاتون کی ضمانت منسوخی کی درخواست بھی دی ہوئی ہے۔
یہ خاتون نہ تو بلیو بک کا حصہ ہے نہ ہی حکومتی رولز آف بزنس کے تحت سیکیورٹی کی حق دار ہے۔ وزارت کا سیکیورٹی دینے کے بجائے حفاظتی حصار کے انتظام کی ہدایت دینا حیران کن ہے۔
متن کے مطابق اس وقت پی ٹی آئی اپنے وسائل سے عمران خان کو سیکیورٹی دے رہی ہے اور حکومت کی جانب سے سیکیورٹی کے انتہائی محدود اقدامات کیے گئے ہیں۔
شہباز گل نے کہا کہ وزارت کا افسر باتیں کرنے کے بجائے فول پروف سیکیورٹی کا پلان شیئر کرے۔

لاہور: (ؤیب ڈیسک) رواں برس پاکستان میں پولیو کا تیسرا کیس رپورٹ ہو گیا۔ ترجمان وزارت صحت عبدالقادر پٹیل نے تصدیق کرتے ہوئے تشویش کا اظہار کیا ہے۔
ترجمان وزارت صحت عبد القادر پٹیل کا کہنا ہے کہ شمالی وزیرستان سے ایک سالہ بچے میں پولیو کی تصدیق ہوئی۔رواں برس پاکستان سے پولیو کا تیسرا کیس رپورٹ ہوا۔
ان کا کہنا ہے کہ پولیو کے خاتمے کیلئے کوششوں کو مزید تیز کیا جارہا ہے۔بحیثیت قوم پولیو کا خاتمہ نہ ہونا ایک بہت بڑا المیہ ہے۔ایک بھی کیس ہمارے لیے بہت بڑا نقصان ہے۔
انہوں نے کہا ہے کہ بچوں کو معذوری سے بچانے کیلئے لازمی ہے کہ ضرورقطرے پلوائے جائیں۔وائرس کے تدارک کیلئے ہنگامی بنیادوں پر اقدامات کاسلسلہ جاری ہے۔
ان کا کہنا ہے کہ میں بذات خود پولیو کے خاتمے کی کوششوں کی نگرانی کر رہا ہوں۔ میں نے کیسز رپورٹ ہونے کے بعد خیبرپختونخوا کا دورہ کیا ہے۔

لاہور: (ؤیب ڈیسک) وزیراعلیٰ پنجاب حمزہ شہباز نے کہا ہے کہ آٹا، گھی اور چینی سستی کر کے عام آدمی کو ریلیف دیں گے، مہنگائی نے عام آدمی کی زندگی اجیرن کر دی ہے۔
وزیر اعلی پنجاب حمزہ شہباز کی زیر صدارت اعلی سطح کا اجلاس ہوا جس میں عوام کو ریلیف دینے کیلئے خصوصی پیکج کے خدوخال کا جائزہ لیا گیا۔ اجلاس میں وزیراعلیٰ نے چیف منسٹر ریلیف پیکج کو چند روز میں حتمی شکل دینے کی ہدایت کی۔
اس موقع پر حمزہ شہباز نے کہا جس دن سے عہدہ سنبھالا ہے، عام آدمی کی آسانی کیلئے مہنگائی کا مسئلہ حل کرنے کیلئے کوشاں ہوں۔ حمزہ شہباز نے کہا کہ افسران کو گرانفروشی کے خاتمے کیلئے عملی اقدامات کرنے ہوں گے۔