اسلام آباد: (ویب ڈیسک) اسلام آباد ہائی کورٹ نے آصف زرداری کےخلاف پچیس سال پرانےکیسز کے خلاف نیب اپیلیں ایک بار پھر سماعت کے لیے مقرر کردیں۔
چیف جسٹس اطہر من اللہ کی سربراہی میں دو رکنی بنچ پیر کے روز سماعت کرے گا۔ عدالت نے نیب کو مزید عدالتی وقت ضائع نہ کرنے اور کیس کی تیاری کی ہدایت دے رکھی ہے۔
نیب نے آصف زرداری کی اُرسس ٹریکٹر، اے آر وائی گولڈ ریفرنس میں بریت کو چیلنج کیا ہے۔ ایس جی ایس اورکوٹیکنا ریفرنسز میں بھی آصف زرداری کی بریت کے خلاف نیب اپیل زیر سماعت ہے۔
نیب نے سات سال قبل آصف زرداری کی بریت کے خلاف اپیل دائرکی تھی۔

اسلام آباد: (ویب ڈیسک) وفاقی وزیر اطلاعات مریم اورنگزیب نے کہا ہے کہ عمران خان کس حیثیت میں سرکاری وسائل استعمال کر رہے ہیں ؟
وفاقی وزیر اطلاعات مریم اورنگزیب نے پریس کانفرنس کرتے ہوئے کہا کہ عمران خان صرف ڈرامہ کرنا چاہتے ہیں اور ان کا مقصد صرف تماشا لگانا ہے۔ 4 سال لوٹ مار کرنے والی گزشتہ حکومت 4 ہفتے پہلے آنے والی حکومت سے سوال کر رہی ہے۔
انہوں نے الزام عائد کیا کہ خیبر پختونخوا حکومت کا ہیلی کاپٹر جلسوں میں استعمال کیا جا رہا ہے اور عمران خان کس حیثیت سے سرکاری وسائل استعمال کر رہے ہیں۔ عمران خان نے آئین اور پارلیمان پر حملہ کیا اور 4 سال پارلیمنٹ کو آرڈینینس کے ذریعے چلایا گیا جبکہ گزشتہ روز اعتراف کیا گیا کہ نیب کو اپنے مقاصد کے لیے استعمال کیا گیا۔
مریم اورنگزیب نے کہا کہ 4 سال نالائق اور نااہل لوگ اقتدار سے چمٹے رہے جبکہ خیبر پختونخوا میں پی ٹی آئی کی حکومت کو 9 سال ہو گئے۔ پی ٹی آئی نے میڈیا کا استحصال کیا۔
سیالکوٹ جلسے کے حوالے سے بات کرتے ہوئے انہوں نے کہا کہ 9 مئی کو جلسہ گاہ کے حوالے سے خط لکھا گیا اور خط میں تمام تفصیلات لکھی گئی تھیں جبکہ مسیحی برادری نے اپنی جگہ کے استعمال پر احتجاج بھی کیا تھا۔ یہ حکومت اور پی ٹی آئی کا نہیں بلکہ مسیحی برادری اور پی ٹی آئی کا معاملہ ہے جبکہ پی ٹی آئی کو جلسہ کرنے سے کسی نے نہیں روکا۔
انہوں نے کہا کہ غنڈہ گردی سے لوگوں کو مائنڈ سیٹ کا پتہ چلتا ہے اور خود پریس ٹاک میں بھی مسیحی برادری کے احتجاج کا ذکر کیا۔ اس معاملے سے حکومت کا لینا دینا نہیں ہے تاہم رانا ثنااللہ کا تعلق خونی مارچ کی کال سے ضرور ہے اور ایسا خونی مارچ کرنے کا کوئی بھی قانونی حق نہیں رکھتا۔
وفاقی وزیر اطلاعات نے کہا کہ عمران خان نے نوجوانوں سے نوکریاں چھینیں، اداروں کو نقصان پہنچایا، عمران خان کو معیشت تباہ کرنے کا جواب دینا ہے سوال پوچھنا نہیں۔ عمران خان نے کہا تھا میں آلو ٹماٹر کے ریٹ نہیں دیکھنے آیا اور آپ نے ہارنے کا پتہ چلنے پر معیشت کے لیے بارودی سرنگیں بچھائیں۔
انہوں نے کہا کہ یہ ہمارے منصوبوں پر تختیاں لگاتے تھے اور عمران خان کہتے تھے کہ ٹی وی سے پتہ چلا ڈالر مہنگا ہو گیا ہے۔ عمران خان نے جھوٹ بول کر ہر ادارے کو نقصان پہنچایا اور عوام جھوٹ سن سن کر تھک گئے ہیں۔ عمران خان نے پیٹرول پر غیر قانونی سبسڈی دی اور غیر قانونی طور پر پیٹرول سستا۔ کیا۔
مریم اورنگزیب نے کہا کہ عمران خان پاکستان کی عوام کو بےوقوف نہیں بنا سکتے تاہم اب حکومت عوام کو مہنگائی سے بچانے کی کوشش کر رہی ہے۔ عمران خان نے ملک کی ترقی روکی لیکن اب 4 ہفتے کا جواب مانگتے ہیں۔ سچ بولیں، شیشہ دیکھیں، گریبانوں میں جھانکیں۔
انہوں نے کہا کہ آئی ایم ایف کے ساتھ معاہدے پر دستخط عمران خان کے ہیں اور یہ لوگ صرف اپنے فیصلوں کو مسلط کرنا چاہتے ہیں۔

پشاور : (ویب ڈیسک) پشاور کے علاقے پشتخرہ میں سی ٹی ڈی کی کارروائی کے دوران کوچہ رسالدار خودکش دھماکے کا ملزم ساتھی سمیت ہلاک ہو گیا۔
ترجمان سی ٹی ڈی نے دعویٰ کیا ہے کہ چھاپے کے دوران دہشت گردوں نے سیکیورٹی ٹیم پر حملہ کیا۔ مقابلے میں ملزم سمیت 2دہشت گرد ہلاک ہوئے۔ جبکہ 4 ملزم فرار ہو گئے۔
ترجمان سی ٹی ڈی کے مطابق ہلاک دہشت گرد 3 مارچ کوچہ رسالدار دھماکے میں ملوث تھا ،دوسرے ہلاک دہشت گرد کی شناخت تاحال نہیں ہوئی۔
ہلاک دہشت گردوں کا تعلق کالعدم تنظیم سے تھا۔ہلاک دہشت گردوں سے دو دستی بم ، دو پستول اور خود کش جیکٹ برآمد کی گئی ہیں۔
یاد رہے کہ کو چہ رسالدار جا مع مسجد کے خود کش حملے 66نمازی شہید اور 130 نمازی زخمی ہوئے تھے۔

سیالکوٹ: (ویب ڈیسک) عثمان ڈار سمیت کئی کارکنوں کو گرفتاری کے بعد رہا کر دیا گیا۔ اس موقع پر عثمان ڈار کا کہنا تھا کہ سیالکوٹ جلسہ کرنے جا رہا ہوں، امپورٹرڈ حکومت جلسہ کرنے سے نہیں روک سکتی۔
قبل ازیں سیالکوٹ کے سی ٹی آئی گراؤنڈ میں پی ٹی آئی کے جلسے کے انتظامات پولیس نے اُلٹ دیئے۔ عثمان ڈار سمیت اہم مقامی رہنماؤں اور کارکنوں کو گرفتار کیا گیا۔ سی ٹی آئی گراؤنڈ کو جانے والے تمام راستے سیل کر دیئے گئے۔
پولیس نے بغیر اجازت جلسے کے انتظامات کرنے پر کریک ڈاؤن کرتے ہوئے عثمان ڈار سمیت پی ٹی آئی رہنماؤں کو گرفتار کرلیا۔ جس پر تحریک انصاف کے کارکن مشتعل ہوگئے۔ پولیس نے شیلنگ اور لاٹھی چارج کی جبکہ گراؤنڈ کا مرکزی دروازہ اور راستے کنٹینر لگا کر بند کر دیئے۔ سی ٹی آئی گراؤنڈ جلسہ کے خلاف کریک ڈاؤن اور گرفتاریوں کے خلاف پی ٹی آئی کارکنوں نے کچہری چوک اور جناح ہاؤس کے باہر احتجاج کیا۔
اس موقع پر عثمان ڈار کا کہنا تھا کہ جیلیں بھرنے کیلئے تیار ہیں، گرفتاریوں سے ڈرنے والے نہیں۔ ڈی سی سیالکوٹ عمران قریشی نے کہا کہ یہ گراؤنڈ نجی ملکیت ہے، پی ٹی آئی شہر میں جہاں کہے گی جلسے کیلئے سہولیات فراہم کریں گے جبکہ ڈی پی او نے کہا عدالت نے ڈی سی کو دونوں فریقین سے مشاورت کے بعد فیصلہ کرنے کا کہا۔
جلسے کے انتظامات درہم برہم کرنے پر چیئرمین پی ٹی آئی نے ردعمل میں کہا کہ ریاستی طاقت کے استعمال پر افسوس ہوا، عمران خان نے مزید کہا کہ امپورٹڈ حکومت کا ایکشن اشتعال انگیز ہے لیکن غیر متوقع نہیں، تحریک انصاف کو آئینی اور قانونی حق سے محروم نہیں کیا جاسکتا۔