اسلام آباد: (ویب ڈیسک) پاکستان تحریک انصاف (پی ٹی آئی) کے چیئرمین عمران خان نے کہا ہے کہ میں آج سیالکوٹ جاؤں گا، عوام اب ان کے خلاف کھڑے ہو چکے ہیں۔
چیئرمین پی ٹی آئی عمران خان نے سیالکوٹ واقعے کے بعد کہا کہ اس میں کوئی شک نہیں کہ میں آج سیالکوٹ جاؤں گا اور امپورٹڈ حکومت نے سیالکوٹ میں کارکنوں کے خلاف جو کیا وہ اشتعال انگیز ہے۔
انہوں نے کہا کہ مجرموں کا یہ گروپ ضمانت پر رہا ہے اور لندن میں مافیا باس نے ہمیشہ مخالفین کے خلاف فاشسٹ ہتھکنڈے استعمال کیے جبکہ ہماری حکومت نے کبھی ان کے کسی جلسے اور دھرنے کو نہیں روکا۔
عمران خان نے کہا کہ ہم جمہوریت کے لیے پرعزم ہیں اور میں آج سیالکوٹ میں ہوں گا۔ لوگ امپورٹڈ حکومت کے خلاف عشا کی نماز کے بعد اپنے علاقوں میں باہر نکلیں۔
انہوں نے کہا کہ جب وہ اقتدار میں ہوں تو سپریم کورٹ پر دھاوا، ماڈل ٹاؤن قتل و غارت، ججوں کو رشوت دیتے ہیں اور یہ جب اپوزیشن میں ہوتے تو جمہوریت کا غلط استعمال کرتے ہیں اور تمام جمہوری اصولوں کو مکمل طور پر تباہ کرتے ہیں۔ عوام اب ان کے خلاف کھڑے ہو چکے ہیں۔

سیالکوٹ: (ویب ڈیسک) تحریک انصاف نے سیالکوٹ میں جلسے کا مقام تبدیل کرلیا۔ اب جلسہ وی آئی پی کرکٹ گراؤنڈ میں ہوگا۔ شفقت محمود نے کہا کہ پرامن لوگوں پر تشدد کیا گیا، خواجہ آصف کے کہنے پر انتظامیہ حرکت میں آئی، اپنا جمہوری اور آئینی حق استعمال کر رہے ہیں۔
پاکستان تحریک انصاف کے رہنما شفقت محمود نے دیگر رہنماؤں کے ہمراہ پریس کانفرنس کرتے ہوئے کہا کہ ہمارے پر امن لوگوں پر تشدد کیا گیا، خواجہ آصف کے کہنے پر انتظامیہ نے تشدد کیا، گرفتاریوں کی شدید مذمت کرتے ہیں، عثمان ڈار اور دیگر کو فوری رہا کیا جائے، سیالکوٹ میں جلسہ ہر صورت ہوگا۔
شفقت محمود کا کہنا تھا کہ عمران خان شام 6 بجےسیالکوٹ پہنچ جائیں گے، ہم جمہوری طریقے سے اپنا حق استعمال کرنا چاہتے ہیں، حکومت ہوش کے ناخن لے، حکومت تشدد کا راستہ اختیار کرنے پرتلی ہوئی ہے، جو بھی نتائج ہوں گے اس کی ذمہ دار حکومت ہوگی۔

لاہور: (ویب ڈیسک) چودھری پرویزالٰہی نے کہا ہے کہ جلسہ کرنا پی ٹی آئی کا بنیادی حق ہے، عمران خان کی عوام میں مقبولیت دیکھ کر بچہ حکمران گھبرا گیا۔
چودھری پرویز الہی کا اپنے بیان میں کہنا تھا کہ پی ٹی آئی کا جلسہ انشاء اللہ ہونا ہے، لازمی ہونا ہے، جلسہ کرنا پی ٹی آئی کا بنیادی حق ہے، بغیر خرچے کے جلسے کی تشہیر پر عثمان ڈار کی طرف سے حمزہ شہباز کو شکریہ ادا کرنا چاہیے، جلسے کی تشہیر اور جوش پیدا کرنے کا مشکل کام جو اکیلا عثمان ڈار کر رہا تھا وہ ن لیگ اور حمزہ شہباز نے لے لیا ہے۔
پرویز الٰہی نے کہا کہ ایک چیز کھل کر سامنے آئی ہے کہ بچہ حکمران گھبرا گیا ہے، جمہوریت کی خدمت کا جو یہ دعویٰ کرتے ہیں اس کو پورا نہیں کرتے۔